वाचन संस्कृती खातीर गोंय बोर्डाचो अभिनय उपक्रम

भांगरभूंय | प्रतिनिधी

अभ्यासक्रमा भायर विद्यार्थ्यांनी वर्साक 10 पुस्तकां वाचचीं

भांगरभूंय I प्रतिनिधी
पणजी : गोंयांत वाचन संस्कृतीक उर्बा दिवपाक यत्ता णवी आनी धावेच्या विद्यार्थ्यांक अभ्यासक्रमा भायर वर्साक दरेकी 10 पुस्तकां वाचपाचो निर्णय गोंय माध्यमीक आनी उच्च माध्यमीक शिक्षण मंडळान (गोंय बोर्ड) घेतला. चालू शिक्षणीक वर्सा पसून हो अभिनय उपक्रम सुरू करतले.
हे विशीं आमच्या प्रतिनिधी कडेन उलयतना मंडळाचे अध्यक्ष भगिरथ शेटये हांणी म्हणलें, फाटल्या कांय वर्सां पसून गोंयकार विद्यार्थ्यां मदली वाचनाची आवड उणी जायत आशिल्ल्याचे दिसून येता. वाचन करपाचें प्रमाण उणे जाल्ल्यान विद्यार्थ्यांक फुडारांत जायत्या समस्यांक तोंड दिवचे पडटले. ते खातीरूच मंडळान चालू शिक्षणीक वर्सा पसून यत्ता णवी आनी धावेंत शिकपी दरेक विद्यार्थ्याक वर्साक उण्यांत 10 पुस्तकांचें वाचन करपाक लावपाचो निर्णय घेतला. फुडल्या कांय दिसांत दरेक शाळेंत ह्या निर्णयाची अंमलबजावणी करतले, अशें शेटये हांणी म्हणलें.
मजगतीं, कलाकार, साहित्यिकांची खण म्हूण गोंयची नामनां आसा. जायत्या गोंयकार साहित्यिकांनी गोंयची नामनां संवसारभर पावयल्या. जिणेंत येसस्वी जावपाक वाचन करप म्हत्वाचें. पूण फाटल्या कांय वर्सांपसून राज्यांतली वाचन संस्कृती उणी जायत चल्ल्या. विद्यार्थ्यांक शालेय जिणे पसुनूच वाचनाची आवड निर्माण जावपाक जाय, जाल्यारूच फुडारांत तांचो प्रवास सोंपो जातलो. ही गजाल मतींत घेवन गोंय बोर्डान णवी आनी धावेच्या विद्यार्थ्यां मदीं ह्या उपक्रमा खाला वाचन संस्कृती वाडोवपाचो निश्चेव केला. हाचो विद्यार्थ्यांक निश्चीत फायदो जातलो, असो विस्वास शेटये हांणी उक्तायला.

यत्ता णवी आनी धावेंत शिकपी दरेक विद्यार्थ्याक वर्साक अभ्यासक्रमा खेरीत दरेकी 10 पुस्तकांचें वाचन करचे पडटले.
विद्यार्थ्यांनी खंयचीं पुस्तकां वाचचीं हे मंडळ निश्चीत करून ताची वळेरी शिक्षण संस्थांक दितले.
मंडळान निश्चीत केल्ली पुस्तकां लागसारच्या वाचनालयांत वा बाजारांत उपलब्ध आसतली.
कोंकणी, मराठी, हिंदी सयत हेर भाशांतल्यान शिकपी विद्यार्थ्यांक त्या त्या भाशांतल्या पुस्तकांचें वाचन करचें पडटलें.
विद्यार्थ्यांक आपूण वाचिल्ल्या पुस्तकांचेर वर्साचे अखेरेक समिक्षण बरोवचें पडटलें.