भांगरभूंय | प्रतिनिधी
ग्रंथालय शास्त्राचे जनक आनी गुरु डॉ. शियाली राममृत रंगनाथन हांची आयज जयंती. हो दीस ग्रंथपाल दीस म्हूण मनयतात. ते निमतान विशेश लेख
आज 12 ऑगस्ट राष्ट्रीय ग्रंथपाल दीस म्हणून मनयतात. ग्रंथालय शास्त्राचे जनक आनी गुरु डॉ शियाली राममृत रंगनाथन हांची ते दीस जयंती.
समाजान आपल्यो वेगवेगळ्यो गरजो पुराय करपा खातीर संस्था स्थापन केल्यो. देखीक शाळा विद्यालय, महाविद्यालयां, संशोधन केंद्रां, उद्देगीक प्रशिक्षण संस्था, हाॅस्पिटलां आनी ज्ञानाची, मनोरंजनाची, वाचनाची गरज भागोवपी ग्रंथालयांची स्थापना जाती. ग्रंथालयाचे समाजाच्या उदरगतीत खूब मोठें योगदान आसा. ग्रंथालयांनी पुस्तक रुपान वेगवेगळ्या विषयांची म्हायती वापरुन समाज शिक्षीत जाता. वाचनान सर्वांगी उदरगत जाता.
रंगनाथन हांणी हाची मांडणी कशी आसची हाचेर बरोवप केलें. तांणी ग्रंथालय शात्राचीं मार्गदर्शक तत्वां उजवाडाक हाडलीं. दरेक पुस्तक वाचका मेरेन आनी वाचक पुस्तकां मेरेन कसो पावतलो हाचेर मार्गदर्शन केलें. ग्रंथालयां स्थापन जातकच ताची मांडावळ आनी राखण करपाक ग्रंथपाल तयार जाले. वेवसायिक पदवी घेवन सेवा दिवपाक लागले. वाचकाक जायतें पुस्तक आनी म्हायती कमीत कमी वेळांत दिवप हें ग्रंथपालाचें पयलें काम जावन आसा. ग्रंथपाल हो पुस्तक आनी वाचकांच्या मदलो दुवो जावन आसा. वाचकाक आवडीचें पुस्तक आनी ताका जाय ती म्हायती दिवप हो ग्रंथालय शास्त्राचो मूळ उद्दे. जावन आसा. रंगनाथन हांणी घालून दिल्लीं मार्गदर्शक तत्वां ग्रंथपालाक वाचकाक सेवा दिवपाक आदार करतात.
आयच्या ह्या डिजिटल युगांत वेगवेगळ्या माध्यमांतल्यान म्हायती मेळटा, जशे की मोबायल इंटरनेट आनी हेर सोशल मिडिया. आजची ग्रंथालयां हीं दोनूय माध्यमांतल्या लोकांक सेवा दिता. ई जर्नल, ई बुक्स हांचे बरोबर छापील पुस्तकां लोकांची ज्ञानाची, मनोरंजनाची गरज भागयतात. बदलत्या काळा नुसार ग्रंथपालांनी ग्रंथालयाचें बदलते रूप स्वीकारून नवीं तंत्रां आत्मसात करून ग्रंथालय सेवा दिवपाक जाय.
गोंय राज्याची ग्रंथालय चळवळ गोंय मध्यवर्ती ग्रंथालय जें 1935 न स्थापन जालां थंयच्यान सुरु जाता. आतांचें कृष्णदास शामा मध्यवर्ती राज्य ग्रंथालय जें संस्कृती भवन पाटो- पणजी हांगां पाच मजली वास्तूंत दिमाखान उबें आसा. हें राज्य वाचनालय गोंयच्या सांस्कृतीक आनी शिक्षणिक मळार आपलें योगदान दिता. ह्या वाचनालयात आशिल्ले दुर्मिळ साहित्य जें 16 व्या शेंकड्यांतलें आसा ताची जतनाय करून फुडले पिळगे मेरेन सांस्कृतीक दायज पावोवपाचें काम हें राज्य वाचनालय करता. तशेंच वेगवेगळ्यो आधुनीक ग्रंथालय सेवा लोकां खातीर हांगां उपलब्ध आसात. भारतांत आनी भारता भायर ह्या राज्य वाचनालयाची नामना आसा.
राज्य मध्यवर्ती ग्रंथालयाच्या शेका खाला 7 सरकारी तालुको वाचनालयां (दिवचल, सांगें, वाळपय, मांद्रें, फोंडें, कुडचडे आनी काणकोण), 3 सरकारी नगर वाचनालयां (केपें, कुंकळ्ळी आनी सांखळी) हांगां कार्यरत आसात. तशेंच जिल्हो वाचनालय जंय सगळ्यो आधुनिक सुख सोयी आसात तें नावेली (साश्टी) हांगा आसा. तशेंच 145 ग्रामीण वाचनालयां आसात, जी सरकारी अनुदानाचेर वेगवेगळ्या ग्रामीण वाठारांनी कार्यरत आसात.
गोंय सरकार, कला आनी संस्कृती संचालनालय, राज्य मध्यवर्ती ग्रंथालय, गोंयच्या तळागाळांत वाचनसंस्कृती रुजोवपाचो यत्न करता. नवीं वाचनालयां स्थापन करप आनी आशिल्ल्या वाचनालयांत नवी उर्जा हाडपाचे यत्न सुरू आसात.
समाजीक माध्यमांतल्यान आनी पुस्तक रूपांत आशिल्ली म्हायती लोकां मेरेन पावोवक आनी वाचन संस्कृती तिगोवपाक गोंयची ग्रंथालय चळवळ प्रयत्नशील आसा.
– सुलक्षा कोळमुळे
राज्य सहायक ग्रंथपाल
राज्य मध्यवर्ती ग्रंथालय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
