भांगरभूंय | प्रतिनिधी
सरकारी म्हाल वाचनालय सांगें वतीन मनयलो पुस्तक दीस
सांगें : वाचन मनशाक घडयता. आमी जशे वाचन करतात तेन्ना कसल्याय विशयाचेर उलोवपाक आमी कमी पडनात. उलोवपाची आनी मनाची भास एक जाली जाल्यार साहित्य निर्मिती जावंक शकता अशें मत सुरेश भंडारी हांणी मांडलें. कला आनी संस्कृती खात्या वतीन सरकारी म्हाल वाचनालय सांगें हांच्या जोडपालवान संवसारीक पुस्तक दिसा गुरुकुल सभाघरांत आयोजीत केल्ले कार्यावळीक ते मुखेल सोयरे म्हणून उलयताले.
ह्या वेळार माचयेर खासा आमंत्रीत म्हणून वितोरीन कुलासो, ग्रथपाल सोनाली नायक, निवृत्त शिक्षिका नुतन प्रियोळकार, पत्रकार आनी लेखक संदीप मापारी, सुटके झुजारी सदानंद नाडकर्णी, कलाकार आलेसिनो फर्नांडीस आनी हेर मानेस्त हाजीर आशिल्ले. कार्यावळीचे सुरवातेक परंपरीक दिवली पेटोवन हे कार्यावळीची सुरवात जाली.
ह्या वेळार वितोरीन कुलासो हांणी, भुरग्यांच्या हातांतले मोबायल उणे करुन बारीक बारीक पुस्तकां दिवचीं. तातूंतल्यान भुरग्यांक वाचपाची गोडी तयार जातली आनी भुरग्यांचे विचार वाडटले, अशें तांणी म्हणलें. ह्या वेळार मेगन फर्नांडीस, श्राग्वी प्रियोळकार, अनुष्का खोब्रेकार हांणी वाचन कित्याक करपाक जाय हाचेर विचार मांडले.
कार्यावळीचें सुत्रसंचालन अॅडवीन फर्नांडीस हांणी केलें. येवकार आलेसिनो फर्नांडीस जाल्यार उपकार नुतन प्रियोळकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
