भांगरभूंय | प्रतिनिधी
आर्विल्लो संवसार आंतरजाळाचेर निंबून आसा. मोबायल फोनान संवसार एक गांव कसो जाला. मोबायल, टीव्ही येवचें आदीं लोक वेवसया खातीर वा शासकी कामां खातीर पोस्टसेवेचो उपेग करताले. आतांय करतात. पूण इमेल आनी मोबायलार आशिल्ले हेर अॅप वापरल्यार जायतीं कामां सहज शक्य जातात. आतांचीं भुरगीं तरणाटे, जेश्ठ आर्विल्ली, पुर्विल्ली पिळगी मोबायलाच्या मोहजाळांत आडकल्यात. पूण मोबायल, टीव्ही येवचे पयलीं लोक दीसपट्टीं कामां करून रातच्या वेळार रेडियोचेर प्रसारीत जावपी कार्यावळी आयकताले. सांजे वाचनालयांत वचून पुस्तकां, दिसाळीं वाचताले. पूण जें पुस्तक वा दिसाळें हातांत धरून वाचपाचो घोस्त मेळटालो ताची सर मोबायलार केल्ल्या वाचनाक येवची ना.
तुमकां खबर आसा दर दिसा कांय खीण वाचन केल्यार मन प्रसन्न जाता, बुद्धीत वाड जाता आनी मुख्य म्हणल्यार तणाव उणो जाता. आयच्या धांवपळीच्या जिवितांत वाचनाचो उणाव जाला. दरेकलो मोबायल स्क्रोलिंग करता. पयलीं भशेन रातची झेम येता मेरेन पुस्तक वाचन कमी जालां. वाचनाचे खूब फायदे आसात, जे आज काल आडनदर जाल्यात. वाचनाचें म्हत्व लक्षांत घेनात. म्हाका वाचनांत आयिल्ले सात म्हत्वाचे फायदे समजून सांगचें अशें दिसता.
वाचन बुद्धीक म्हणल्यार अर्थात मेंदूक उत्तेजीत करता. संशोधना प्रमाण, मानसीक नदरेन सक्रीय रावप म्हणल्यार वाचन, कुंवाडी सोडवप, खेळ खेळप, अल्झायमर, डिमेंशिया सारकीं दुयेंसां उणीं जावंक शकता. मेंदवाची भलायकी रोग मुक्त दवरपा खातीर वाचन व्यायाम केल्यार बरो फायदो जाता. वाचन केल्यार ज्ञानांत भर पडटा. वाचिल्लें दरेक पुस्तक, लेख वा मॅगझीन मनांत नवी म्हायती जोडटा. हें ज्ञान जिणेंत येवपी आडमेळ्यांक कुशळटायेन हाताळपा खातीर खूब मोलाचे थारपाक शकता, आनी मेळयिल्लें ज्ञान दुसरो कोणूच काडून घेवंक शकना.
लेखकाचे पुराय अणभव तुमचे जातात. वाचन तणाव उणो करपाचो एक बळिश्ट उपाय. रोमांटीक, साहसी, गूढ कथा वा आकर्शक लेख वाचून सदचे जिणेंतल्या कामां संबंदी, तणावा पसून मानसीक शांती परतून मेळोवपाची पळवाट म्हणल्यार वाचन. वाचनाचो आनीक एक फायदो म्हणल्यार उतरांचे भांडवल वाडटा. वाचनांतल्यान नवी उतरां शिकप अदीक उलोवपाक मजत करता. तशेंच वाचनान आत्मविस्वास लेगीत वाडटा. फुडारांतल्या कारकिर्दीची संधी आनी संप्रेशण कुशळटाय सुदारतात.
कळटा ते खंयचेय भाशेंतलें साहित्य वाचल्यार बरें. वाचनान बरे वक्ते जावपाक आदार मेळटा. वाचन स्मरणशक्त सुदारूंक शकता. पुस्तकांतलीं पात्रां, कथा आनी तपशील लक्षांत दवरून मेंदवाचो व्यायाम करता आनी म्हायती लक्षात दवरूंक मजत करता. हें खासा गुन्यांवगारी कथा वा कल्पनेंतल्या कथांक लागून लेगीत शक्य जाता. देखून ताकाच लागून वाचन हो एक बरो ब्रेन एक्सरसायझ.
वाचन लक्ष केंद्रीत करपाची क्षमता आनी लक्ष दिवपाची क्षमता वाडोवपाक मजत करता. आयच्या विचलीत जगांत पुस्तकां पुरायपणान बुडून वाचल्यार एकाग्रतायेंत वाड जावपाक मजत जाता. सद्दां सकाळीं फक्त 15-20 मिणटां वाचन केल्यार पुराय दिसभरांतल्या कामा कडेन वेवस्थीत लक्ष लागता. वाचनाक लागून विंगड विंगड लेखन शैली दिसून येतात, जाचो उपेग स्वताचे लेखन क्षमतेंत सुदारणा करपा खातीर जावपाक शकता. अणभवी लेखकांनी आपलें साहित्य कशें रचलां हाचें निरिक्षण करून वाक्य रचणूक, विचार उदरगत आनी योग्य उतरां वेंचूक शिकोवपाक शकता.
थोड्याच उतरांनी सांगपाचें जाल्यार दर दिसा वाचपाक थोडो वेळ दिल्यार मानसीक भलायके खातीर आनी वैयक्तीक वाडी खातीर खूब फायदेशीर थारूंक शकता. देखून आयजच पुस्तक, लेख वा नेमाळें वाचपाचो नेम तयार करात आनी अणभवांत वाचल्यारूच वाचतले अशी मोख दवरात.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
