भांगरभूंय | प्रतिनिधी
सुकण्यांची, मानग्यांची, बिबट्यांची जातली मेजणी
पणजी: वाघेरी दोंगर रान वाठारांत वा रानजीव अभयारण्याचे शिमेंत हाडपाचो यत्न करतले. हाका लागून कसल्याच प्रकारच्या बांदकामांक परवानो मेळचो ना. राज्यांतल्या सुकण्यांची, मानग्यांची आनी बिबट्यांची मेजणी करतले अशें रानां मंत्री विश्वजीत राणे हांणी सांगलें.
मंगळारा पणजेंत जाल्ले पत्रकार परिशदेंत ते उलयताले. ताचे पयलीं खात्यांतल्या वरिश्ठ अधिकाऱ्यां बराबर बसका घेवन विवीध निर्णय घेतिल्ल्याचें तांणी सांगलें.
मंत्री राणे हांणी म्हणलें, वाघेरी दोंगरार म्हज्या नांवान जमनी नात. थंय म्हजो बापूय भागधारक आसा. अशें आसलें तरी म्हजेर थंयच्यो जमनी विकिल्ल्याचो फटीचो आरोप जाता. हें आडावपा खातीर आमी हो वाठार रानजीव अभयारण्यांत हाडटले. थंय कसलेंच बांदकाम, रस्ते बांदपाक परवानगी मेळची ना. हालींच हांगा बांदकाम केल्ल्या एका मनशाचेर एफआयआर करपाचे आदेश दिल्यात. गरज आसल्यार नगर नियोजन कायद्यांत बदल करून देंवते वेल्या बांदकामाक परवानगी दिवपाची बंद करतले. बसकेंत राज्यांतल्या पाणथळ थळार आशिल्ल्या मानग्यांचीं मेजणी आनी मॅपिंग करपाचो निर्णय घेतला. ही म्हायती थळाव्या स्वराज्य संस्था, नागरपालिकांक दितले. हाका लागून फुडारांत दुर्दैवी घडणुको टाळप शक्य आसा. कांय दिसां पयलीं वाहनाचो धपको बसून ब्लॅक पँथराक मरण आयिल्लें. अशे प्रकार टाळपा खातीर बिबट्यांची लेगीत मेजणी करतले. जखमी रान प्राण्यां खातीर रॅपीड रिस्पॉन्स टीम, वैजकी आपत्कालीन सेवा आनी बचाव केंद्र स्थापन करतले. हे खातीर राज्यांतल्या एनजीओंक बराबर घेवपाचो निर्णय घेतला.
————-
व्हर्टिकल फॉरेस्ट प्रणाली वापरप गरजेचें
नागरी वाठारांत पाचवें तण तयार करप, थंयचें तापमान उणें करपा खातीर यत्न करतात. ते प्रमाण थंय 250 वयर एफएसआय आशिल्ल्या बांदकामांक व्हर्टिकल फॉरेस्ट प्रणाली वापरप गरजेचे करतले अशें विश्वजीत राणे हांणी सांगलें.
बसकेंत हेर म्हत्वाचे निर्णय
रान वाठारांत प्राण्यांक रस्तो हुपपा खातीर विशेश कॉरिडॉर करपा खातीर यत्न.
राज्यांतल्यो 3550 हॅक्टर खारफुटी राखीव करतले.
खाजगी रान वाठाराचें 480 दावे रोखडेच निकालांत काडटले.
राज्यांतल्या लांकूड कापपाच्या कारखान्यांचें जातलें ऑडीट.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
