भांगरभूंय | प्रतिनिधी
पणजी : राष्ट्रीय वाग संवर्धन प्राधिकरणाच्या (एनटीसीए) शिफारसी प्रमाण म्हादय आनी आशिकुशीकचो प्रदेश ‘वाग वाठार’म्हणून जाहीर जाल्यार ताचे कसले परिणाम जातले? हे विशींच्यो समस्या, सुचवण्यो आनी हरकती तज्ज्ञां मुखार मांडपाची संद पांच मतदारसंघांतले लोकप्रतिनिधी आनी ग्रामस्थांक मेळटली. सर्वोच्च न्यायालयान नियुक्त केल्ले तज्ज्ञ समितीची (सीईसी) बसका आयज सांजेवेळार सुरू जातली.
सांवड्डें, वाळपय, काणकोण, सांगें आनी पर्यें ह्या पाच मतदारसंघांतल्या लोकप्रतिनिधी/ ग्रामस्थांच्यो समस्या तज्ज्ञ समिती आयकतली. सरकारी अधिकारी, लोकप्रतिनिधी आनी ग्रामस्थांच्यो सुचवण्यो आनी समस्या आयकले उपरांत तज्ज्ञ समिती (सीईसी) सर्वोच्च न्यायालयाक अहवाल सादर करतली. हाका लागून आयचे बसकेक बरेंच म्हत्व आयलां. समितीचे वांगडी चंद्रप्रकाश गोयल आनी सुनिल लिमये हे अहवाल सादर करतले.
गोंयांत वाग वाठार म्हणून अधिसुचीत करपाक गोंय सरकाराचो खर विरोध आसा. हाका लागून उच्च न्यायालयाच्या निवाड्याक सरकारान सर्वोच्च न्यायालयांत आव्हान दिलां. ते याचिके विशीं लोकां कडेन चर्चा करपा वांगडा एकंदर अभ्यास करून अहवाल सादर करपा खातीर सर्वोच्च न्यायालयान तज्ज्ञ समितीची नियुक्ती केल्या. ही समिती आयज आनी फाल्यां (16 आनी 17 ऑक्टोबर) अशे दोन दीस गोंयांत आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
