भांगरभूंय | प्रतिनिधी
रान खातें: वागांक राखपाक केल्यात उपाय
भांगरभूंय । प्रतिनिधी
पणजीः म्हादय अभयारण्यांत वागांच्या संरक्षणा खातीर आमी खूबश्यो उपाय येवजण्यो चालीक लायल्यात. जनावरांच्या संरक्षणां खातीर 24 वरां खातें पाळत दवरता. तशेंच रानवटी जनावरांक लागून पोशिल्ल्या जनावारांचें जाल्ले लुकसाणे खातीर भरपाय दिवपाचे प्रक्रियेक आमी गती दिल्या. ते खातीर गोंयांत वाग संरक्षण वाठाराची गरज ना, अशें रान खात्यांन सांगलां.
2020 त चार वागांक मारपाचे घडणुके उपरांत राष्ट्रीय वाग संरक्षण प्राधिकरणान घालून दिल्ले सुचोवणेचे अंमलबजावणे खातीर तशेंच वागांच्या सरंक्षणाक घटसाण मेळची हे खातीर म्हादय अभयारण्याचो कायदेशीर दर्जो वाडोवन तो वाग संरक्षीत वाठार घोशीत करपा संबंदांत फाटल्या दोन वर्सांत कसलीं पावलां उखल्ल्यांत असो प्रस्न कुडटरेचे आमदार आलेक्स रेजिनाल्ड लोरेन्स हांणी रान मंत्री विश्वजीत राणे हांकां विचारिल्लो.
विधानसभेच्या पटलार जाप दितना रान खात्यान सांगलें, रानवटी जीव संरक्षण कायदो 1972 हाच्यो कायदेशीर तजविजी रानवटी जीव अभयारण्य, राष्ट्रीय अभायरण्यां आनी वाग संरक्षण वाठारा खातीर चडश्यो समान आसात, अशें 12 जुलय 2023 ह्या दिसा मुख्यमंत्री डॉ. प्रमोद सावंत हांचे अध्यक्षतेखाला जाल्ले राज्य रानवटी जीव बोर्डाचे बसकेंत दिसून आयलें. पयलींची वस्तुस्थिती आनी सध्याची परिस्थिती लक्षांत घेवन, बोर्डान एकमतान थाराव घेतलो, राष्ट्रीय वाग संरक्षण प्राधिकरणान सुचोवणे प्रमाण अधिसुचीत राखीव वाठारांत वाग संरक्षण वाठार घोशीत केल्या पुराय वाठारांत निर्बंध लागतले आनी मुखेल हेतू आसा तो साध्य जावचो ना. राखीव वाठार खुबूच ल्हान आशिल्ल्यान आनी त्या वाठारा लागसार चड लोकसंख्या आशिल्ल्यान वाग संरक्षीत वाठार जाहीर करप सध्याचे स्थितींत शक्य ना, अशी जापर रान खात्यान दिल्या.
फाटल्या दोन वर्सां भितर राज्यभरांतल्या राखीव वाठारांत आठ अतिरिक्त एण्टी पॉचींग कॅम्प उबारल्यात. सगळे मेळून 29 एण्टी पॉचींग कॅम्प चलतात. वागांचें मॉनिटरींग करपा खातीर एम-स्ट्रायप्स ह्या तंत्रगिन्यानाचो वापर जाता आनी दीसभर गस्त घालपी कर्मचारी हाचेर देखरेख दवरतात. संरक्षीत वाठारांत पाळत दवरपा खातीर कार्यकारी कर्मचाऱ्यां वांगडा गस्त घालपी पंगड 24 वरां खातीर तैनात केल्यात. मोबायल फोन सेवा सयत, उच्च दाबाचे वायरलेस नॅटवर्क कम्युनिकेशन दुरुस्त करून घटमूट केल्यात आनी राखीव वाठारांत आडखळ नासतना संपर्क करपाक मजत जाता, अशें वाग संरक्षणा खातीर उपाय येवजणेची म्हायती दितना रान खात्यान सांगलें. गोंयांत दाव्यांचे आनी हक्कांचे निवारण करपा खातीर समर्पीत महसूल अधिकारी तशेंच जिल्होधिकारी नेमल्यात. गोंय रान उदरगत म्हामंडळा कडेन विशेश निधी दवरून रानवटी जनावरांच्या हल्ल्यांचे बळी थारपी लोकां खातीरचे लुकसाण भरपायेचे पयशे दिवपाक गती दिल्या, अशेंय खात्यान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
