भांगरभूंय | प्रतिनिधी
पणजी: ‘गोवा वाग प्रकल्प’ स्थापन करपा विशींचो प्रस्ताव आशिल्ली एक सामकी म्हत्वाची शासकीय फायल फाटल्या सात वर्सां सावन शेणिल्ल्याचो धक्को दिवपी प्रकार मुखार आयला. उपवनसंरक्षकान पणजी पुलिशेंत अनवळखी मनशा आड कागाळ दाखल केल्या, ही फायल 23 मार्च 2018 सावन बेपत्ता आशिल्ल्याची नोंद आसा. बेपत्ता जाल्ले हे फायलींत वाग प्रकल्पा कडेन संबंदीत म्हत्वाचे अहवाल, पत्रवेव्हार आनी निर्णय नोंद आशिल्ले.
ही म्हत्त्वाची फायल शेणिल्ल्याचें प्रकरण हालींच दिल्लीच्या सर्वोच्च न्यायालयाच्या केंद्रीय सक्षम समिती मुखार जाल्ले सुनावणे मजगतीं मुखार आयिल्लें. फायल शेणिल्ल्यान समिती मुखार कागदपत्रां सादर करतना व्हड आडखळ निर्माण जाली. तेन्ना समितीन हे विशीं पुलिसां कडेन कागाळ दाखल करपाच्यो सुचवण्यो रान विभागाक दिल्ल्यो. ते प्रमाण, सात वर्सांच्या कळावा प्रमाण निमाणें पणजी पुलिसांनी ही कारवाय केल्या.
मजगतीं, उच्च न्यायालयान व्याघ्र प्रकल्प अधिसुचवणी करपाच्या दिल्ल्या आदेशाक राज्य सरकारान सर्वोच्च न्यायालयांत आव्हान दिलां. न्यायालयान हो विशय केंद्रीय सक्षम समितीकडेन दिला. ही समिती 6 ऑक्टोबरा पयलीं गोंयांत संबंधितांचें म्हणणें आयकून घेवपाक येतली.
राज्याचे प्रधान मुखेल वनसंरक्षक कमल दत्ता हांणी हे विशींची म्हायती दिली. फायल सापड नाशिल्ल्यान रान खात्याचेर घाळपणाचो थपको दवरिल्ल्यान, इतलो कळाव करपी संबंदीत अधिकार्यांच्या जापसालदारकेचो प्रस्न ह्या निमतान हाजीर जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
