भांगरभूंय | प्रतिनिधी
पणजी : ‘गोंय वाग प्रकल्प’ स्थापन करपा विशींचो प्रस्ताव आशिल्ली एक सामकी म्हत्वाची शासकीय फायल फाटल्या सात वर्सां सावन शेणिल्ल्याचो धपको दिवपी प्रकार मुखार आयला. उपवनसंरक्षकान पणजी पुलिशेंत अनवळखी मनशा आड कागाळ दाखल केल्या, ही फायल 23 मार्च 2018 सावन बेपत्ता आशिल्ल्याची नोंद आसा. बेपत्ता जाल्ले हे फायलींत वाग प्रकल्पा कडेन संबंदीत म्हत्वाचे अहवाल, पत्रवेव्हार आनी निर्णय नोंद आशिल्ले.
ही म्हत्त्वाची फायल शेणिल्ल्याचें प्रकरण हालींच दिल्लीच्या सर्वोच्च न्यायालयाच्या केंद्रीय सक्षम समिती मुखार जाल्ले सुनावणे मजगतीं मुखार आयिल्लें. फायल शेणिल्ल्यान समिती मुखार कागदपत्रां सादर करतना व्हड आडखळ निर्माण जाली. तेन्ना समितीन हे विशीं पुलिसां कडेन कागाळ दाखल करपाच्यो सुचवण्यो रान विभागाक दिल्ल्यो. ते प्रमाण, सात वर्सांच्या कळावा उपरांत निमाणें पणजी पुलिसांनी ही कारवाय केल्या.
मजगतीं, उच्च न्यायालयान व्याघ्र प्रकल्प अधिसुचवणी करपाच्या दिल्ल्या आदेशाक राज्य सरकारान सर्वोच्च न्यायालयांत आव्हान दिलां. न्यायालयान हो विशय केंद्रीय सक्षम समिती कडेन दिला. ही समिती 6 ऑक्टोबरा पयलीं गोंयांत संबंदितांचें म्हणणें आयकून घेवपाक येतली.
राज्याचे प्रधान मुखेल वनसंरक्षक कमल दत्ता हांणी हे विशींची म्हायती दिली. फायल सांपडूंक नाशिल्ल्यान रान खात्याचेर घाळपणाचो दोश दवरिल्ल्यान, इतलो कळाव करपी संबंदीत अधिकार्यांचे जापसालदारकेचो प्रस्न ह्या निमतान उपस्थीत जाला.
जोयडा : हनूर बफर वाठारांतल्या पच्चेदोड्डी लागसारच्या रानांत एका 12 वर्सांच्या नर वागाचे तीन कुडके करून ताका मारून उडयिल्ल्याचें मुखार आयलें. बिरेस्तारा सांजेच्या 6 वरांच्या सुमाराक गस्त घातिल्ल्या रान कर्मचार्यांक ह्या भागांत जमनींतल्यान कसलो तरी घाण मारिल्ल्याचो दुबाव आयलो. तांणी जमीन खणून माती काडून पळयलें तेन्ना तांकां वाठाच्या पांयांचो भाग सांपडलो. उपरांत तांणी रोखडीच हे विशीं वरिश्ठ अधिकार्यांक म्हायती दिली. शुक्रारा सकाळीं, एसीएफ विराज होसूर हांचे सयत अधिकारी घडणुके सुवातेर दाखल जाले. तपासा मजगतीं वाघाचे कुडीचो आनीक एक भाग मेळ्ळो. मात ताचे फाटलो भाग गायब आशिल्लो. अधिकार्यांनी खोलायेन तपास केले उपरांत हो प्रकार शिकारेचो आशिल्ल्याचें निश्चीत जालें. उपरांत क्रायम सीन टीम, पुलीस, बंडीपूरचें सुण्यांचो पंगड आनी फिंगरप्रिंट पंगड घडणुके सुवातेर दाखल जालो. तांणी उरिल्ल्या कुडींचो सोद घेतलो. पोस्टमार्टमा उपरांत कुडी लासल्यो. ह्या प्रकरणांत रान विभागान एका थळाव्याचेर दुबाव उक्तायला. सुणें तपासा मजगतीं सरळ त्या मनशाच्या घरा पावले. मात चवकशी सुरू जाताच तो दुबावीत मनीस पळून गेलो अशें मुखार आयलां. ताचो सोद सध्या घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
