भांगरभूंय | प्रतिनिधी
पणजीः राज्यांत वाडत वचपी गुन्यांवकारी घडणुको आडावपा खातीर गोंय पुलिसांचे वेगवेगळें खातें खर यत्न करतात. हे संबंदी गोंय पुलिसांच्या घुंवळे वखदां विरोधी पंगडान गुप्त म्हायतीचेर आदारून वागातोर आनी हरमला धाड घाली. वागातोरच्या एका तरणाट्या कडल्यान वट्ट 10.98 लाखांचें ड्रग्स जप्त करून ताका अटक केली. जाल्यार हरमला एका यतरणाट्याक अटक करून ताचे कडल्यान 2 लाखांचें 200 ग्रॅम चरस जप्त केलां.
बडतर्फ पुलीस प्रशिक्षणार्थीक अटक
एनसीचो पंगड फाटल्या जायत्या सप्तकां पसून वागातोर आनी लागसारच्या वाठारांनी ड्रग्सची विक्री करपी एका मनशाच्या फाटल्यान आशिल्लो. मजगतीं हणजुणच्या ह्या मनशाक दुबाव आयिल्ल्यान ताणें शिटूक रावन आपलें काम चालूच दवरिल्लें. गुप्त सुत्रां कडल्यान मेळिल्ले म्हायती प्रमाण, गोंय पुलिसांच्या घुंवळे वखदां विरोधी पंगडान वागातोर पाळत दवरली. हो तरणाटो ड्रग्सची विक्री करपाक हे सुवातेर आयलो तेन्ना पुलिसांनी ताची तपासणी केली. ताचे कडेन कोकेन, मेथाम्फेटामायन आनी एक्स्टसी हीं घुवळे वखदां सांपडलीं. उपरांत ताका अटक केली. करण गोवेकार (33,हणजुण) अशें अटक केल्ल्या व्यक्तीचें नांव. धक्को दिवपी गजाल म्हणल्यार, दुबावीत करण हो बडतर्फ प्रशिक्षणार्थी पुलीस जावन आसा. प्रशिक्षणावेळार ताचे आड विनयभंगाचो गुन्यांव नोंद जाल्ल्यान ताका बडतर्फ केल्लो.
दुबावीत गोवेकर हाचे कडल्यान 37 ग्राम कोकेन, ३७ ग्राम मेथाम्फेटामायन आनी 15 ग्राम उच्च दर्जाच्यो एक्स्टसी टेबलेट्स असो माल जप्त केला. ह्या ड्रग्सची आंतराष्ट्रीय बाजारांत किंमत सुमार 8.98 लाख रुपया आसा. वांगडा एएनसी पंगडान ड्रग्सची येरादारी करपा खातीर वापरपी मारुती स्विफ्ट गाडीय जप्त केली.
हरमल एकल्याक अटक
मजगतीं, हरमलच्या तरणाट्या कडल्यान 2 लाखांचो 200 ग्रॅम चरस जप्त करून ताका अटक केली. एएनसी पंगडान शुक्रार 21 मार्चाक सकाळीं बस्त्यांव रॉड्रिगज (28, हरमल) ह्या तरणाट्याक अटक केली. ताचे कडल्यान 2 लाखांचो 200 ग्रॅम चरस जप्त केलो. पुलिसांनी कायदेशीर सोपस्कार पुराय करीत ताचेर घुंवळे वखदां विरोधी कायद्याच्या कलम 20(ब)(खख) खाला गुन्यांव नोंद करून अटक केली. हे विशीं फुडलो तपास उपनिरीक्षक दीनदयाळ रेडकार करतात.
मजगतीं, एएनसीन दोन दिसांनी दोन धडक छापे घालून दोगांक अटक केली. एएनसीचे अधिक्षक टिकम सिंह वर्मा, उपअधिक्षक राजेश कुमार हांच्या मार्गदर्शना खाला तशेंच निरीक्षक सजीत पिल्ले हांच्या फुडारपणा खाला पुलिसांनी कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
