भांगरभूंय | प्रतिनिधी
म्हापशेंः वागातोरा 31 डिसेंबराक सनबर्न महोत्सव जावचो ना, तशें स्पश्ट आस्वासन मुख्यमंत्री डॉ. प्रमोद सावंत हांणी दिलां, अशी म्हायती आमदार डिलायला लोबो हांणी पत्रकार परिशदेंत दिली.
वागातोरा 31 डिसेंबराक सनबर्न महोत्सव आयोजीत केल्लो. पूण ही तारीख महोत्सवा खातीर योग्य नाशिल्ल्यान थळाव्यांनी विरोध केलो. हे विशीं मुख्यमंत्र्यां कडेन चर्चा केले उपरांत तांणी ते दिसा सनबर्न जावचो ना, अशें आस्वासन दिलां, अशें अामदार डिलायला लोबो हिणें सांगलें.
आयोजकांनी अंदूं 28 ते 31 डिसेंबर ह्या चार दिसांच्या काळांत सनबर्न महोत्सव आयोजीत करपाचो निर्णय घेतला. वागातोर-हणजूणेंतल्या कांय थळावे तशेंच रेस्टोरण्ट वेवसायिकांनी महोत्सवाच्या 31 डिसेंबर हे तारखेक आक्षेप घेवन हे विशीं थळावी आमदार लोबो हांचे कडेन तारीख बदलपा खातीर विनवणी केली. उपरांत तिणें हे विशीं मुख्यमंत्र्या कडेन चर्चा केली.
सनबर्नच्या नव्या तारखेच्या विरोधांत हांवूय आसा. कारण आमी ख्रिश्चन समाजांतले लोक 31 डिसेंबराक मध्यान रातीं प्रार्थने खातीर (मास) चर्चीनी वतात, तशेंच ह्या दिसा थळाव्यांच्या रेस्टोरण्टांक व्हड वेवसाय जाता. ते दिसा महोत्सव जाल्यार थळाव्यांच्या तशेंच रेस्टोरण्टवाल्यांच्या वेवसायाचेर परिणाम जातलो, अशें लोबो हांणी म्हणलें. ते खातीरूच महोत्सवाची तारीख बदलप गरजेचें, अशेंय तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
