भांगरभूंय | प्रतिनिधी
पणजी: हिंदू आनी बौद्ध धर्मांत अध्यात्माचे प्रतीक सुरू जाल्ल्या इतिहासीक मंडाला कलेचो सुरेख आविश्कार घडोवपी मनचक्र हें चित्रप्रदर्शन वागातोरा उज्वल आर्ट गॅलरींत रसिकांक आकर्शीत करीत आसा.
आपशिक्षीत प्रतिभाशाली चित्रकार सुवर्णा गांवकार आनी अॅड. श्वेता गायतोंडे हांणी मंडाला शेलींत रेखाटिल्लीं चित्रां म्हणल्यार रंग रेशांचो कलात्मक सुवाळोच आसा. सुमार 60 चित्रकृती प्रदर्शनांत मांडल्यांत आनी तातूंतली कुशळटाय प्रभावी आसा.
सुवर्णा हांच्या अॅडक्रलीक ऑन कॅनव्हास जाल्यार श्वेता हांच्यो चडश्यो चित्रकृती पेन आनी अॅक्रलीक आनी कांय मिश्र माध्यमांतल्यो आसात. सुवर्णा हांची गणेश रुपां खुबूच वेधक आसात. माँ दुर्गा, द रायजींग, ट्रँक्विलिटी, फुल्ल ऑफ लायफ बी चित्रां खुबूच सुंदर आसात.
श्वेता हांची फायर्सी, सँडी ब्युटी, चक्र मंडाला, ब्लॅक अॅण्ड व्हायट, बर्ड फोक मंडाला बीं चित्रां प्रदर्शनाची शान वाडयतात.
पद्मिनी फावंडेशनाच्यो अध्यक्षा सुलक्षणा सावंत हांचे हस्तुकीं प्रदर्शनाचें उक्तावण जालें. ह्या वेळार ज्येश्ठ चित्रकार सदाशीव परब, मानाचे सोयरे म्हूण हाजीर आशिल्ले. तशेंच उज्वल गॅलरीचे संचालक सुदेश पेडणेंकार हाजीर आशिल्ले. हें प्रदर्शन सकाळीं 11 ते रातीं 9 मेरेन उक्तें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
