भांगरभूंय | प्रतिनिधी
दर्यादेगेर सरकारी मालमत्तेंत अतिक्रमण केल्ल्यान खंडपिठाचो आदेश
भांगरभूंय प्रतिनिधी
म्हापशेंः वझरांत वागातोरा रोमियो लेन रेस्टोरण्टाचें बांदकामाचेर मुंबय उच्च न्यायालयाच्या गोंय खंडपिठाच्या आदेशा प्रमाण पर्यटन खात्यान कारवाय करपाक सुरवात केल्या. शेनवारा सकाळीं पर्यटन खात्यान हे सरकारी मालमत्तेंतलें अतिक्रमण मोडपाचें काम हातांत घेतलां.
उत्तर गोंयांत दर्यादेग वाठारांनी सातत्यान जावपी बेकायदो बांदकामां, हॉटेल्स आनी आस्थापनांचो विस्तार हाचे आड मुंबय उच्च न्यायालयाच्या गोंय खंडपिठान खर भुमिका घेतल्या. ही बांदकामां बेगोबेग पाडपाचें आदेश उच्च न्यायालयान जारी केल्यात. ह्याच आदेशा प्रमाण सीआरझॅड आनी पर्यटन खातें हांणी वागातोरा दर्यादेगे वयलीं बेकायदो बांदकामां मोडपाची कार्यवाही सुरू केल्या. हातूंत रोमियो लेन रेस्टोरण्टाचाेय आस्पाव आसा.
ह्या प्रकरणांत नीलेश फडते हांणी खंडपिठांत याचिका दाखल केल्ली. हे याचिकेंत राज्याचे मुख्य सचीव, पर्यटन खातें आनी गोंय दर्यादेग क्षेत्र प्राधिकरणा वांगडा रोमियो लेनचे धनी आन्तोनियो डिसोझा आनी रॉबर्ट कुतिन्हो हांकां प्रतिवादी केल्ले.
गोंय दर्यादेग वाठार क्षेत्राचे उल्लंघन करून गोंय पर्यटन उदरगत म्हामंडळाचे जागेंत अतिक्रमण करून वयल्या रेस्टोरण्टाचें बांदकाम केल्ल्याचें सुनावणे उपरांत खंडपिठाच्या निदर्शनाक आयिल्लें.
ते प्रमाण खंडपिठान 14 डिसेंबर 2023 दिसा आदेश जारी करून रेस्टोरण्टांतले सगले वेव्हार बंद करचे, असो आदेश दिल्लो. तशेंच संबंदींत बांदकाम मोडपाचे निर्देश पर्यटन खात्याक दिल्लें.
तरी लेगीत रेस्टोरण्टांत वेव्हार सुरूच आशिल्ले. ह्या प्रकारा उपरांत फडते हांणी खंडपिठांत अवमान याचिका दाखल केली. ते प्रमाण 15 जानेवारी दिसा खंडपिठान पर्यटन खात्याक धारेर धरून वयल्या रेस्टोरण्टाचें बांदकाम मोडपाचो आदेश दिल्लो. ह्या आदेशाची कार्यवाही पर्यटन खात्यान शेनवारा हातांत घेतल्या.
खंडपिठाच्या आदेशा प्रमाण रोमिओ लेन रेस्टोरण्टाचें बांदकाम पाडपाचें काम आमी सुरू केलां. सदर रेस्टोरण्ट धनयान पर्यटन खात्याचे मालमत्तेंत अतिक्रमण करून बांदकाम केल्लें, अशी म्हायती पर्यटन खात्याच्या अधिकाऱ्यांनी दिली.
रोमियो लेन रेस्टोरण्टाच्या धनयान पर्यटन विभागाच्या मालकीच्या जमनींत वागातोर दर्यादेगेर कायमस्वरूपी बांदकाम केलां. थंय बेकायदो वेवसाय सुरू आशिल्ले, अशी याचिका थळाव्यान उच्च न्यायालयांत दाखल केल्ली. तेन्ना तें बांदकाम मोडपाचो आदेश उच्च न्यायालयान डिसेंबर 2023 दिसा दिल्लो. ते प्रमाण आतां कारवाय सुरू केल्या.
वागातोरा दर्यादेगे वयल्या बेकायदो बांदकामाचें प्रकरण फाटल्या तीन वर्सां पसून गाजता. वागातोर दर्यादगेर गोंय पर्यटन विकास मंडळाच्या जमनीचेर बेकायदो बांदकाम मातये भरवण केल्लें आसतना, थंय पतून बांदकाम उबारिल्ले. ह्या प्रकरणांत थळाव्या नुस्तेकारांनी आवाड काडिल्लो. ते विरोधांत उच्च न्यायालयांत अवमान याचिका दाखल केल्ली. ताचेर परतून ही बांदकामां मोडपाचो आदेश उच्च न्यायालयान दिला. तरी लेगीत कांय जाण ह्या बांदकामांतल्यान वेवसाय चलयताले. अखेर पर्यटन खात्यान सीआरझॅड सयत जोड रितीन कारवाय करून ही बांदकामां मोडल्यात. हातूंत रोमियो लेन रेस्टोरंटाचोय आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
