भांगरभूंय | प्रतिनिधी
म्हापशें: वागातोरच्या डब्ल्यू गोवा हॉटेलाच्या वाठारांतलें झाड पर्यटकांच्या चार मोटारींचेर पडलें. हे दुर्घटणेंत देड लाखाचें लुकसाण जालें.
ही घडणूक सोमारा सांजेच्या 5.50 वरांच्या सुमाराक घडली. डब्ल्यू गोवा हॉटेला कुशीक चार पर्यटक मोटारी पार्क करून प्रवासी पर्यटक दर्यादेगेर गेल्ले. जाल्यार मोटार चालक थंय लागींच बशिल्ले. ह्या वेळार अचकीत हॉटेलाच्या वाठारांतलें सुकिल्लें झाड जुस्त ह्या मोटारींचेर पडलें. ताका लागून मोटारीचे हारशे फुटले आनी हेर लुकसाण जालें. तशेंच डब्ल्यू गोवा हॉटेलाचे पत्राचे शेडीचेंय लुकसाण जालें. सुदैवान कोणाकूच दुखापत जावंक ना. घडणुकेची म्हायती मेळटाच म्हापशें उजो पालोवपी दळाचे हवालदार सुरज शेटगांवकार, वासुदेव ताटे, लविंदर साळगांवकार, प्रवीण पिसुर्लेंकार आनी श्रीनाथ नर्से ह्या जवानांनी झाड कांपून कुशीक काडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
