भांगरभूंय | प्रतिनिधी
जीसीझॅडएमएचो बांदकाम बंद करपाचो आदेश
भांगरभूंय । प्रतिनिधी
म्हापशें: वझरांत वागातोरचें बेकायदो बांदकाम बंद करचें अशें सांगून जीसीझॅडएमएन कारणां दाखय नोटीस जारी केल्या. तशेंच हे नोटिशेक 15 दिसां भितर जाप दिली ना जाल्यार कसलीच सुचोवणी दिनासतना तें बांदकाम मातये भरवण करतले, असोय निर्देश जीसीझॅडएमएन (गोंय दर्यादेग वाठार वेवस्थापन प्राधिकरण) प्रकल्पाच्या धनयाक दिला.
पंच सुरेंद्र गोवेकार हांणी ह्या बांदकामा आड गोंय दर्यादेग वाठार वेवस्थापन प्राधिकरणा कडेन कागाळ केल्ली. वझरांत वागातोरा सर्वे क्रमांक 213/17 आनी 18 ह्या वादग्रस्त क्लबाचे सुवातेंत वॉटर बीच लाँग अॅण्ड ग्रील प्रा. लि. हे कंपनीचो चालक तशेंच धनी समर मर्चंट हांणी अविकसीत वाठारांतल्यो देंवत्यो आनी सैमीक दोंगुल्ली कांपून लोखंडी, स्टील, सिमेंट आनी वीट चिऱ्यांचो वापर करून पक्कें बांदकाम हातांत घेतलां, अशें कागाळेंत तांणी म्हणिल्लें. ते भायर कागाळ पत्रा वांगडा पक्क्या बांदकामाचें फोटोय जोडिल्ले. ते भायर संबंदितान हंगामी लांकडी रॅस्टोरंटाचें बांदकाम करचे खातीर जीसीझॅडएमए कडल्यान परवानो घेतिल्लो. पूण हो परवानो एका सर्वे क्रमांकाचेर घेवन दुसऱ्याच सर्वे क्रमांकाचेर बांदकाम सुरू केल्ल्याचो दावो हे कागाळेंत केल्लो.
हे कागाळेच्या आदारान जीसीझॅडएमएचे वांगडी सचीव दशरथ रेडकार हांणी बांदकाम धनयाक ताकतिकेन काम बंद करपाचो आदेश दिवन कारणां दाखय नोटीस जारी केल्या. तशेंच हेंच बांदकाम चालू उरचें न्हय हे खातीर बार्देसाचे उपजिल्होधिकारी, पंचायत सचीव आनी हणजूणें पुलिशेक जतनाय घेवपाची सुचोवणी केल्या. मजगतीं, शुक्रारा 25 नोव्हेंबराक पंचायतीन ह्या बेकायदो बांदकामाची पळोवणी केल्ली. पळोवणे वेळार लोखंडी खांबे आनी हेर पक्क्या साहित्याचो वापर करून बांदकाम केल्ल्याचें स्पश्ट जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
