भांगरभूंय | प्रतिनिधी
नवी दिल्ली, खबरां संस्था ः देशभरांत फाटल्या पांच वर्सांत वागांच्या हल्ल्याक लागून 302 जाणांक मरण आयलां, जाल्यार महाराष्ट्रांत 55 टक्के बळी पडल्यात. वागांच्या हल्ल्यांत मरण आयिल्ल्या लोकांच्या कुटुंबांक आतां मेरेन केंद्रान 29.57 कोटी रुपया लुकसाण भरपाय दिल्या अशी म्हायती सरकारान ह्या सप्तकांत लोकसभेक दिली.
2022 वर्सा 112, 2021 वर्सा 59, 2020 वर्सा 51, 2019 वर्सा 49 आनी 2018 वर्सा 31 जाणांक वागांच्या हल्ल्यात मरण आयलें. महाराष्ट्रांत ह्या हल्ल्यांत 170 जाणांक मरण आयलें. तातूंतले 2022 वर्सा 85, 2021 वर्सा 32, 2020 वर्सा 25, 2019 वर्सा 26 आनी 2018 वर्सा दोग जाणांक मरण आयलां.
फाटल्या पांच वर्सांत उत्तर प्रदेशांत वाग हल्ल्यांत 39 जाणांक मरण आयलां, तातूंत 2021 आनी 2022 वर्सा दरेकीं 11, 2020 वर्सा 4, 2019 वर्सा 8 आनी 2018 वर्सा 5 जाणांक मरण आयलां. अस्तंत बंगालांत 29 जाणांक मरण आयलां. पूण हो आंकडो 2018 वर्सा 15 आशिल्लो आनी 2022 वर्सा फकत एक जाला अशें तरेन फाटल्या कांय वर्सा सावन हो आकडो उणो जाला.
बिहारांत वागांच्या हल्ल्याक लागून जावपी मरणांत वाड जाल्या. वागाच्या हल्ल्यात मरण आयिल्ल्या मदीं 2019 वर्सा शून्य, 2020 वर्सा एक, 2021 वर्सा चार आनी 2022 वर्सा णव आसा. भारतांत वागांची संख्या 2018 वर्सा 2967 आशिल्ली ती 2022 वर्सा 3682 जाली. अंदूं जुलयांत जाहीर केल्ल्या सरकारी आंकड्यां प्रमाण वर्सुकी 6 टक्क्यांनी वाड जाल्ली आसा. फाटल्या चार वर्सांत वागांची संख्या 50 टक्क्यांनी वाडल्या. देशांत मध्य प्रदेशांत सगळ्यांत चड वाग 785, कर्नाटकांत 563, उत्तराखंडांत 560 आनी महाराष्ट्रांत 444 वाग आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
