भांगरभूंय | प्रतिनिधी
एक राजा आशिल्लो. ताच्या दरबारांत एक विद्वान आशिल्लो. दरबारांत तो विद्वान मनीस बसल्या शिवाय राजा सिंहासनाचेर बसनाशिल्लो. एक दीस राजान विद्वानाक एक प्रस्न विचारलो, ‘किदें चड म्हत्वाचें, वागणूक काय ज्ञान?’ हें आयकून विद्वानान राजाक सांगलें, ‘हो प्रस्न कठीण. म्हाका एक आठवडो दियात.’
विद्वानाक पलासींत खंयूय वचपाची मेकळीक आशिल्ली. दुसर्या दिसा तो खजान्याचे कुडींत गेलो आनी 2 भांगराचीं नाणीं ताणें चोरलीं. ताका चोरतना शिपायान पळयलो. पूण विद्वानाक खूब मान आशिल्लो देखून तो ओग्गी रावलो. अशे सेगीत दोन दीस 2-2 नाणीं चोरतकच शिaपायान मंत्र्याक सांगलें. मंत्र्यान ही गजाल राजाच्या कानार घाली. एका आठवड्यान विद्वान राजदरबारांत आयलो. पूण तेन्ना राजा सिंहासनावेलो उठलो ना.
‘तुवें भांगराचीं नाणीं चोरलीं?’ अशें राजान ताका विचारलें. तेन्ना ‘हय’ म्हणत विद्वानान आपले कडेन आशिल्लीं भांगराचीं नाणीं राजाक दिलीं. राजान म्हणलें, ‘दिवपाक जाय आशिल्लीं जाल्यार चोरलीं कित्याक?’ तेन्ना विद्वानान जाप दिली, ‘तुमच्या प्रस्नाची जाप दिवपाक. जेन्ना तुमकां कळ्ळें हांवें भांगराचीं नाणीं चोरलीं, म्हजे विशीं तुमच्या मनांत आशिल्लो आदर कमी जालो. म्हजें ज्ञान आजूय तितलेंच आसा, जितलें एका आठवड्या पयलीं आशिल्लें. पूण म्हजी वागणूक वायट जाली. देखून ज्ञाना परस वागणूक म्हत्वाची.’ ही जाप आयकून राजा खोशी जालो.
ही काणी आमकां जिवितांतलें एक व्हड सत्य सांगता. मनशाची वागणूक म्हत्वाची. मनीस कितलोय ज्ञानी आसूं, कितलोय हुशार वा कर्तृत्वी आसूं, जर ताची वागणूक सारकी ना जाल्यार कोणूच ताका मान दिवचो ना. ज्ञान म्हत्वाचेंच, पूण वागणूक चड म्हत्वाची.
संपदा कुंकळकार
9850149319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
