भांगरभूंय | प्रतिनिधी
(उदकान गियर बॉक्स, आमचे कपडे सगळें ओलेचिप्प जाले. मात इतलें सगळें जावनय डिझल गाडी आशिल्ल्यान इंजिन बंद पडलेंना….. आतां मुखार….)
हांव सकल देंवलों. मंदाक सांगलें, एक्सलेटराचेर पांय दामून दवर. मागीर हांवें रेवेंतल्यान रोदां मेकळीं केलीं. जीपीक ट्राॅलीचें वजन जातालें, म्हुणून ट्राॅली सोडली आनी परत जीप भायर काडपाक येत्न केलो. हो वेळ मेरेन जीपींतले सगळे उदकांतच आसले. अखेरेक नेटान झटको मारतकच एकदम जीप भायर सल्ली. उपरांत ट्राॅलीक दोरी बांदून तीय कशीतरी ओडून काडली.
हेमलकसा- नागेपल्ली अंतर फकत 65 किलोमीटर. पूण थंय पावपाक आमकां 12 वरां लागलीं ! जगनागेर पावतकच मात्सो जिवांत जीव आयलो. तो मेरेन आमी सगळे भिजिल्ल्या कपड्यांत आशिल्ले. कपडे बदलपय शक्य नासलें, कारण ट्राॅलींतल्यो सुटकेसी, तातूंतले कपडे उदकान पुराय भिजिल्ले. तांकां त्या हुंवाराच्या उदकाचो कुबट वास मारतालो. मागीर परत सगळे कपडे धुले, कोळशाचें फेर्र तापयलें आनी कपडे सुकयले. तेन्नाच आंगावेल्या ओल्या कपड्यांतल्यान आमची सुटका जाली. जगनान हाडपाक सांगिल्ली साकर उदकांत विरघळून गेल्ली आनी चण्या दाळीक वास मारपाक लागिल्लो. ताका लागून तीय उडोवची पडली. अशेतरेन, म्हजो अति आत्मविस्वास बरोच नडलो. तरी त्याच आत्मविस्वासाच्या बळग्यार आमी आमची सुटकाय करून घेतिल्ली.
हेमलकसांतलें आमचें जिवीत हें अशें सैमाकडेन झगडत फुडें सरतालें. उटंगाराचो पावस आनी त्या उपरांत येवपी हुंवार हाका लागून जशे जिवावेले प्रसंग उप्रासले तशेच जनावरां खातीरय जगावेगळे अणभव आयले.
खंयचोय प्राणी तुमी त्रास दिल्या बगर तुमचेर हल्लो करना, हो म्हजो अणभव. ताकाय मनशाचो भंय आसता. ताका लागून बरेचदां ताणें केल्लो हल्लो हो आपले राखणे खातीर आसता. वांस्वेलां हीं कांय म्हाका नवीं नासलीं; पूण एकदां सामकें अचकीत ताका तोंड दिवपाचो प्रसंग आयलो. ही 1976 तली खबर. दिनेश प्रभू नांवाचो म्हजो गोंयचो इश्ट बाबां कडेन दोन वर्सां रावपाक आसलो. तो आमकां मेळपाक हेमलकसाक आयिल्लो. आयतार आसलो देखून आमी दोगुय भोंवत भोंवत त्रिवेणी संगमाचेर गेले. न्हंयेक चडशें उदक नासलें म्हुणून पेंवत पलतडीन गेले. लागींच ल्हानशी दोंगुल्ली आसली. उलयत उलयत आमी वयर चडले. अचकीत मुखार लक्ष गेलें, एक वाशेल आमच्याच वटेन येतालें. ताच्या आनी आमचे मदीं फकत शंबर फुटांचें अंतर आसलें. वाशेल अशें लागींच्यान पयलेच पावटी पळयतालों. कितें करप कळ्ळेंना. भिवून धाविल्ले तर तें आमकां दोन मिन्टांत धरता आसलें. वांस्वेलांच्या घुरये विशीं आयकल्लें याद जाली. तोंड फोडिल्ले पेशंट दोळ्यां सामकार दिसपाक लागले. कितें करप आनी ह्या अरिश्टांतल्यान सुटका करून घेवप, हें येवजलेंच ना. जणू मत गुल्ल जावनशी आमी फकत खुटे कशे घट्ट जावन त्या वांस्वेलाक पळयत उबे रावले. तेंय आमचे कडेन पळयत रावलें. मागीर कांयच करनासतना तें थंडपणान आपले वाटेन गेलें. आमी ताका त्रास दिवचेनात हें भोवतेक ताच्या लक्षांत आयलें जातलें, ताका लागून ताणें आमकां भोगशिलें जातलें.
हुस्कारो सोडीत आमी मागीर त्या दोंगुल्लेवेल्या एका व्हड तळपार बसले. त्या तळपा सकल एक घोल आसली आनी तातूंत एक वांस्वेल आसलें. पयलींचेंच आसत वा दुसरेंय आसत, आमकां कांयच खबर नासलें. आमी खबरो करीत थंय बसले आनी मागीर घोली फुडल्यानच मुखार गेले. फाटल्यान अचकीत वांस्वेलाचो गुरगुरपाचो आवाज आयलो. आमी भिले. पयलींच्या प्रसंगांत आमी शांत राविल्ल्यान वांस्वेलाक धोको दिसलोना जातलो. पूण आतां एकादीं आमच्या उलोवपाच्या आवाजान ताका राग आयलो आसतलो. कारण ताच्या आवाजावेल्यान तें ‘चार्ज’ जालांशें दिसतालें. वांस्वेल घुरी घालपाक तयार आसत तर खूब फोर्सान, भिरांकुळ आरड मारता. हें आड्डप तशेंच आसलें. तें आमच्या दिकेन नेटान येता तें पळोवन आमी दोगांनीय एकदम मोट्यान आरड माल्ली. कितें करप तें आमकां सुचना जाल्लें, देखून आमची बोब उत्स्फूर्त आनी सभाविक प्रतिक्रिया आसली. आमची हुयेल आयकून तें काचाबूल जालें आसतलें वा नेटान देंवतना देंवणेचेर थांबपाक जालेंना जातलें; पूण तें आमकां घश्टून फुडें गेलें. तें वता तें पळोवन आमी आनीक व्हडान आड्डत रावले. तें खूबच पयस पावलें हाची खातरी जातकच आमी बोवाळ थांबयलो.
वांस्वेलान जर आमचेर हल्लो केल्लो तर तें कोणाक कळचेंय नासलें. वाशेल जितो मारना हें खरें पूण सामकें वायट तरेन जखमी करता. थंय आमकां सोदपाक कोण येतलो आसलो? आमी अशेच भोंवपाक म्हुणून भायर सरिल्ले. खंय वचप तें थारावंक नासलें. ताका लागून आमी खंय आसात हें कोणाकच खबर नासलें. आनीक आमी न्हंय पेंवून पलतडीं गेल्ले. त्या वाठारांत तर कोणाचीच वस्ती नासली. पयस- पयस लेगीत कोण्ण दिसनासलो. वांस्वेलान आमचेर घुरी घाल्ली तर आमची आनी धडगत नासली.
(मुखार चलता)
प्रकाशवाटा (मूळ लेखक : डॉ. प्रकाश आमटे)
देविदास गजानन नायक
98505 35051
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
