भांगरभूंय | प्रतिनिधी
रान खात्याच्या अधिकाऱ्यां कडल्यान प्रक्रियेक गती
भांगरभूंय । प्रतिनिधी
पणजी : बोंडला प्राणी संग्रहालयांत वांस्वेलाचे जोडये सयत हेर कांय जनावरां हाडपाचे प्रक्रियेक रान खात्यान गती दिल्या. भोपाळच्या (मध्यप्रदेश) प्राणी संग्रहलयांतल्यान वांस्वेलाची जोडी हाडून ताच्या बदल्यात बोंडलाचे दोन गवे भोपाळ प्राणी संग्रहालयाक दिवपा संबंदांतली प्रक्रिया खात्या कडल्यान सध्या सुरू आसा, अशी म्हायती रान खात्याच्या वरिश्ठ अधिकाऱ्यान ‘भांगरभूंय’ कडेन उलयतना दिली.
केंद्रीय प्राणी संग्रहालय प्राधिकरणान दोन वर्सां आदीं गोंयाक वांस्वेलाची जोडी दिवपाक मंजुरी दिल्या. ताका लागून भोपाळ सावन वांस्वेलाची जोडी बोंडला प्राणी संग्रहालयांत हाडपाचें आनी ताच्या बदल्यात बोंडला प्राणी संग्रहालयांत ज्या जनावरांची संख्या चड आसा, तातूंतलीं दोन जनावरां भोपाळ प्राणी संग्रहालयाक दिवपाचें खात्यान निश्चीत केल्लें. वांस्वेलाचे जोडयेच्या बदल्यात बोंडलाचे दोन गवे दिवपाचोय निर्णय जाल्लो. हे संबंदांतले कागदी सोपस्कार लेगीत सुरू केल्ले. पूण मदल्या काळांत ही प्रक्रिया आडावल्ली. आतां खात्याच्या अधिकाऱ्यांनी हे प्रक्रियेक गती दिल्या. ताका लागून फुडल्या कांय म्हयन्यां भितर बोंडला प्राणी संग्रहालयांत वांस्वेलाचे जोडये सयत हेर कांय जनावरां येतलीं, अशें सुत्रांनी स्पश्ट केलें. मजगतीं, गोंयांतल्या एकसुऱ्या बोंडला प्राणी संग्रहालयाक दर वर्सा हजारांनी देशी-विदेशी पर्यटक भेट दितात. ताका लागून थंयच्या जनावरांची संख्या वाडोवपाचो निर्णय रान खात्यान घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
