भांगरभूंय | प्रतिनिधी
झेक प्रजासत्ताकाची बिगर मानांकीत बायल टॅनीस खेळगडी मार्केता वांद्रोसोव्हान विम्बल्डन बायलांच्या एकोड्या गटांतलो किताब जिखून इतिहास घडयलो. फायनलींत तिणें ट्युनिशियाची ओन्स जेब्युर हिका 6-4 आनी 6-4 अशा सरळ सेटांनी हारोवन कारकिर्दींतलो पयलोच ग्रॅण्ड स्लॅम किताब जिखलो. फायनल 1 वर आनी 20 मिनटां मेरेन चल्ली.
24 वर्सां पिरायेची वांद्रोसोव्हा ओपन अॅरांतले विम्बल्डन सर्तीच्या बायलांच्या एकोड्या गटांत वस्तादपण जोडपी पयली बिगर मानांकीत टॅनीस खेळगडी थारली. फाटल्या 55 वर्सां सावन विम्बल्डनांत एकाय बिगर मानांकीत बायल खेळगडयेक एकोड्या गटांतलें वस्तादपण जोडपाक जमूंक नाशिल्लें.
1963त बिगर मानांकीत बिली जीन किंग हिणें फायनलींत प्रवेश केल्लो. पूण, ते उपरांत तिका ऑस्ट्रेलियेचे मार्गारेट कोर्टा कडल्यान हार घेवची पडिल्ली.
सव्या मानांकीत ओन्स जेब्युराक फायनलींत आपलो सर्वोत्कृश्ट खेळ करपाक जमलो ना. दुसरे वटेन वांद्रोसोव्हान सुरवाती सावन जबरदस्त प्रदर्शन केलें. वांद्रोसोव्हान सातांतल्या स खेपे जेब्युराची सर्व्हिस मोडली, दुसरे वटेन जेब्युराक 10तल्या फकत 4 खेपे प्रतिस्पर्धी खेळगडेयची सर्व्हिस ब्रेक करप शक्य जालें.
28 वर्सां पिरायेची ओन्स सेगीत दुसरे खेपे विम्बल्डनाचे फायनलींत पाविल्ली. पूण, परतून तिका उप वस्तादपणाचेर समाधान मानचें पडलें.
मजगतीं, दादल्यांच्या एकोड्या गटांतली फायनल सर्बियाचो दिग्गज नोवाक जोकोवीच आनी स्पेनाच्या कार्लोस अल्कराज हांचे मदीं आयज जातली. सध्याचो वस्ताद जोकोवीच णववे खेपे सर्तीचे फायनलींत पावला. तो सेगीत पांचवे खेपे विम्बल्डनाचे फायनलींत खेळटलो. जोकोवीच आयज जिखता तर तो स्वित्झर्लेण्डाचो आदलो खेळगडो रोजर फॅडरराची बरोबरी करतलो. फॅडरर आठ खेपे विम्बल्डन सर्त जिखला.
जोकोवीचान अजून मेरेन 23 ग्रॅण्ड स्लॅम किताब जिखल्यात. सगल्यांत चड ग्रॅण्ड स्लॅम किताब जिखपाचे वळेरेंत तो दुसरे सुवातेर आसा. पयले सुवातेर ऑस्ट्रेलियेची मार्गारेट कोर्ट आसा. तिणें 24 ग्रॅण्ड स्लॅम किताब जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
