भांगरभूंय | प्रतिनिधी
पाटणा, बंगळुरू आनी मुंबय अशी विरोधकांचो ‘मोदी हटाव’ ही एक कलमी कार्यावळ दोळ्यां सामकार दवरून जाल्ल्या सादारण तिनेक म्हयन्यांच्या प्रवासा उपरांत फाटीं वळून पयळल्यार तीन बसकां उपरांत हातांत सारकें कितें लागलां हाचो विचार केल्यार जी- 28 पंगडाच्या एकाय फुडाऱ्याक ताची समाधान करपी जाप दिवपाक दिवपाक जावची ना. लोकसभेच्यो वेंचणुको तीन-चार म्हयन्यां पयलीं घेतले हाची भिरांत एक वटेन नितीशकुमार हांच्या सयत जायते फुडारी उक्तायत आसतना ताका तोंड दिवपा खातीर धडाडीन कार्यावळ हातांत घेवपाची गरज आसूनय फाटल्या तीन म्हयन्यांच्या तेंपार वाजत गाजयत फकत तीन बसको जावच्यो आनी त्योय वांझ थारच्यो हाचे वयल्यान विरोधकांचें तथाकथीत आयएनडीआयए गठबंधन खऱ्यांनीच नरेंद्र मोदी हांकां केंद्रातल्या सत्ते भायरो करपाक खऱ्यानीच गंभीर आसात काय, ना हो प्रश्न उपस्थीत जाता.
तीन बसका उपरांतूय जी-28 तल्या पक्षांक अजिबात सूर लागना वा एका तोंडान कोणूय उलयना हें सिद्ध करपी जायत्यो गजाली सामकार येतात. आयज मतदारांक खऱ्यांनीच सत्ता बदल जाल्लो जाय आसलो तरीय मनान पुराय विस्कटल्ल्या ह्या गठबंधना कडेन सत्ता सुवादीन करचे पयलीं ते हजार फावट विचार करतले अशें दिसपा सारकी ही स्थिती आसा. मुंबयतली जी- 28 पंगडाची बसका जावंन दोन दिसूय उलगले नास्ततले, गठबंधनातल्या एका घटक पक्षाचे सर्वेसर्वा आशिल्ल्या एम के स्टालीन हांच्या चल्यान अशें विधान जाहिरपणान केलें की आघाडेंतल्या एक दोगांचो आडवाद सोडल्यार चडश्या पक्षांच्या फुडाऱ्यांनी खऱ्यांनीच कपलाचेर हात मारून घेतलो आसुये.
सनातन धर्माची तुळा डेंग्यू आनी मलेरिया कडेन करून हो धर्म सोंपोवपाची सध्या गरज आसा अशें वक्तव्य करीत स्टालीन पूत उदयनिधी स्टालीन हाणें तांच्याच गठबंधनान फाटल्या तिनेक म्हयन्यांत ओडून ताणून कांय जायनाका पूण मोदी आड बऱ्याच फुगयल्ल्या फुग्यांतलो वारोच पुराय काडून उडयलो. आनी हाचो परिणाम म्हणल्यार हो फुगो फुगोवपा खातीर तांकां परत श्रीगणेशा पसून सुरवात करची पडटली. वांझ जावूंदी पूण फाटल्या तीन बसकां उपरांत जी चड- थोडी हवा तयार जाल्ली ताचेर उदयनिधी स्टालीन हाच्या उलोवण्यान पुराय बोळो भोंवडायलो आनी भाजपाच्या हातांत तांकां अपेक्षीत अशें कोलीत दिलां आनी ताचें भांडवल कशें करचें हें सांगपाक वा सल्लो दिवपाक भाजपाक कोणाचीच गरज ना. स्टालीन हाचें विधान बरेंच खटकिल्ल्यान काँग्रेस फुडारी प्रमोद आचार्य हांणी उदयनिधीचेर जे तरेन चाबूक मारलां ताचे वयल्यान दिसून येता. सनातन धर्म हो सामाजीक न्याय आनी समतेच्या आड आशिल्ल्याचो जांवय सोद लावंन उदयनिधी स्टालीन हाणें कांय गजालींक विरोध करपाक मेळना तेन्ना त्यो गजाली सोंपोवच्योच पडटात अशें विधान केल्ल्यान ताचो फटको विरोधी आघाडेक बसल्यार तांचें अजाप दिसचें ना.
काँग्रेस आनी द्रमुक हे विरोधी गठबंधनांतले दोन मुखेल पक्ष आसात. ताच्या पक्षाच्या फुडाऱ्यान सनातन धर्म सोंपोवपाची केल्ली भास कोणूय मानून घेवचो ना तरी ताचें खापर आघाडेच्या मथ्यार फुटप आपसूक आसा. केंद्रांतली सत्ता मेळोवपाची वाट दिसान दीस चडूच कुस्तार जायत आस्तना विरोधकांचो सूर लागप, एका सुरांत उलोवप खूब म्हत्वाचें थारता. दुर्दैवान तशें जातना दिसना. विरोधी आघाडे सामकार सध्या आव्हानांची रास आसून तो हुपप अश्या घडणुकांक लागून चड कुस्तार जायत आसा. गठबंधनातल्या दरेका पक्षाची विचारधारा वेगळी आसा. फकत मोदी विरोधान तांकां एकठांय हाडल्यात आनी हीच एक कलमी कार्यावळ घेवंन विरोधक नरेंद्र मोदी हांच्या भाजपा कडेन येता ते लोकसभा वेंचणुकांत दोन हात करपाचे आसात जाल्यार तातूंतल्या कितें निश्पन्न जातलें हें कोणाक सांगपाची गरज ना. विरोधकां सामकार सध्या जीं आव्हाना आं करून उबीं आसात तातूंतलें पयलें आव्हान म्हणल्यार सगल्यांनी एका सुरांत उलोवपाचें आनी दुसरें सुवातो वांटपाचें. फकत म्हयन्यांतल्यान एक फावट बसका घेवंन फोटो सेशन करप आनी जेवणावळी केल्ल्यान अपेक्षीत ध्येय हातासपाक येश मेळटलें असो कोणाचोय भ्रम आसल्यार तो फटीचो थारतलो. तीन वांझ बसकांतल्यान किदें साध्य केलें ताचें समाधान करपी जाप कोणाच्यान दिवपाक जायना. उण्यांत उणेस सामायीक कार्यावळी विशीं जाल्यार अजून एक पावल लेगीत घातिल्लें दिसना. जी कार्यावळ इतले मेरेन लोकां सामकार येवपाची गरज आशिल्ली. घटक पक्षांतलीं आपापसांतली झगडीं, वाद, मतभेद हाचेंर मेरेन एकठांय येवंन चर्चा केल्ली जाल्यार घडये सुवातो वांटपाचे दिकेन कांय पावलां घालपाक मेळटाशिल्लीं.
मुंबयतले बसकेंत विरोधकांनी तथाकथीत एकवोटाचें प्रदर्शन केलेंच मात तशें केल्या उपरांतूय हे पक्ष एका काळजान एकमेकां खातीर काम करतले अशें केन्नाच दिसलें ना. वेगवेगळ्या पक्षांतले मतभेद प्रकर्शान सामकार आयले. ‘जुडेगा भारत, जितेगा इंडिया’ नारो बरो दिसलो पूण बसकेंतल्यान जें चित्र दिसलें तें पळयल्यार एकवोटान वेंचणूक लडोवप आघाडे खातीर फकत कुस्तार आशिल्ल्याचो निश्कर्श आतांच कोणीय काडचो. सगल्यांत पयलीं आघाडेच्या बोधचिन्हाचेर एकमत जावपाक शकलें ना आनी ताच्या वयल्यान तयार जाल्ले मतभेद उक्ते जाले. वास्तवीक हाचेर पयलीं मतां विचारांत घेवंन ताचेर निर्णय घेवपाक जाताशिल्लो. पूण तशें जालें ना. आघाडेची बसका सुरू जावपा पयलीं राहुल गांधीन तांचो सगल्यांत आवडीचो विशय आशिल्ल्या गौतम अडानीचेर घेतिल्ली पत्रकार परिशद वाद तयार करून गेली आनी ममतादिदीक आवर घालतना जायत्या जाणांचो कवटली लागली.
संयोजक वा निमंत्रक मुंबयतले बसकेंत थारतले अशें सांगताले. पूण ह्या पदा खातीर चार पांच जाण इत्सूक आशिल्ले. ताका लागून आयचें मरण फाल्यांर उडोवपाचो निर्णय जालो आनी कॅप्टना विणेंच आघाडेचे बोटीचें जनतारुपी म्हासागरांत ‘जलावतरण ‘ केलें गेलें. आतां कॅप्टना विणे ही बोट फुडले बसकें खातीर वचपाक भायर सरली. मात तिका दिका दिवपा खातीर कोणूय नाशिल्ल्यान ही बोट कांय दीस भरकटत रावल्यार तातूंत अजाप दिसपाचें कारण ना. सुवातो वाटपाच्या खडपाचेर ही बोट आपटून तिचो सोक्षमोक्ष लागचो न्हय हाची जतनाय सगल्यांत पयलीं घेवची पडटली. ममतादिदीन दिल्लो प्रस्ताव दाव्यांनी भायरायल्ल्यान ती नाराज जावन परत गेलीं हेंय आतां उक्तें जालां. आघाडेंतले फुडारी एका सुरांत उलयतले आनी सुवाताचें वांटप जातले तोच ‘इंडिया’ खातीर सुदिन थारतलो. पूण तशें घडून येवप तितलें सोंपें ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
