वस्त्रांतल्यान अभिनय विणपी : सिंपल कापडिया

भांगरभूंय | प्रतिनिधी

रुदाली सिनेमांतले वेशभूशेक लागून सिंपल कापडियाक उत्कृश्ट वेशभूशा निर्मणी करपाचो राष्ट्रीय चित्रपट पुरस्कार फावो जालो.

हिंदी सिनेमांत अभिनेतो म्हूण काम मेळपाक संघर्शा सयत नशिबाचोय वांगड आसप गरजेचें. संघर्श करुन येस मेळयले उपरांत एकाद्रे वेळार कलाकारान घेतिल्ले निर्णय ताका तेंगशें वयल्यान जमनीर उडोवपाक शकतात वा तो निर्णय मैलांतलो वाटचिरो कसोय थारपाक शकता हाची जिवी देख म्हणल्यार अभिनेत्री सिंपल कापाडिया.
15 ऑगस्टाक 1958 क म्हणल्यार स्वतंत्रताय दीस सिंपल कापडिया ही मुंबय गुजराती घराण्यांत जल्माक आयली. बापायचें नांव चुन्नीलालभाई कापडिया. तो व्हडलो कापड वेवसायीक आशिल्लो. सिंपलाक दोन व्हडल्यो भयणी आनी एक भाव. मदली डिंपल आनी रीमा कापडिया ह्यो दोन भयणी अभिनेत्री. 24 वर्सां पिरायेच्या रीमाक ड्रग्साक लागून मरण आयलें, अशें म्हणटात. येसाच्या तेंगशेर पावपाचे वाटेर आशिल्ली डिंपल कापाडियाची धाकटी भयण सिंपल स्वताची सुवात निर्माण करपाक योग्य संदीची वाट पळयताली.
डिंपलाच्या अदभूत यशाक लागून आनी सुपरस्टार राजेंश खन्ना कडेन जाल्ल्या लग्नाक लागून ह्या करणाच्या कडेन निर्मात्यांचें लक्ष ओडिल्लें. सिंपलाक पिरायेच्या 18 व्या वर्सा शक्ती सामंत हाणें 1977 वर्सा ‘अनुरोध’ ह्या चित्रपटांतल्यान पदार्पण करपाची संद दिली. तिच्या पयल्याच फिल्मांत तिचो भावोजी राजेश खन्ना तिचो नायक आशिल्लो. सुपरस्टारा वांगडा काम ही नव्या कलाकारा खातीर ही खूबच व्हडली संद आशिल्ली. ह्या सिनेमांतल्यान तिका कोडू- गोड अणभव मेळ्ळे ते तिणें एके मुलाखतींत हांसत जाप दितना सांगिल्लें “तिचे खातीर अभिनय करप एक आव्हान आशिल्लें ; कारण राजेश खन्ना भावोजी आशिल्यान ताचे वांगडा रोमँटीक दृश्य करप तिका भावनीक नदरेन कठीण आशिल्लें.”
अनुरोधा उपरांत सिंपलान खूब भुमिका केल्यो. दर खेपे ती वेगळी दिसताली. पात्रांचें भितर सरून अभिनय करपाची तांक तिका आशिल्ली. सिंपलाचो जितेंद्र, विनोद मेहरा आनी नीतू सिंग हांचे वांगडा बासू चटर्जी हाचो 1978 वर्सा ‘चक्रव्यूह’ हो दुसरो चित्रपट प्रदर्शित जालो. उपरांत ‘एहसास’ (1979) ‘मन पसंद’ (1980) ‘लूटमार’ (1980) ‘शाक्का’ (1981) ‘जमाने को दिखाना है’ (1981) ‘परख’ (1981) ‘दुल्हा बिकता है’ (1982) ‘जीवन धारा’ (1982) ‘तुम्हारे बिना’ (1982) ‘हम रहे ना हम’ (1984) ‘रेहगुजार’ (1985) आणि ‘प्यार के दो पल’ (1986 ) ह्या सिनेमांनी तिणें अभिनय केलो. बरी सुरवात जाली खरी, पूण सिंपलाची अभिनय कारकिर्दीक बहर येवंक ना.
1992 वर्सा राजिंदर सिंग शेट्टी कडेन तिचें लग्न जालें. 1993 वर्सा तांकां करण नांवाचो पूत जालो. पूण तांचें लग्नाचें जिवीत चड काळ तिगलें ना. पूण करणालें संगोपन करपाचेर तिणें पुराय लक्ष केंद्रित केलें. त्या तेंपार सिंपल कापडिया फिल्मां परस मोगाच्या संबंधा विशीं चड खबरांनी आसताली. तिच्या नांवाचो संबंद फिल्म निर्मातो टुटू शर्मा, अभिनेतो शेखर सुमन आनी बी टाऊन खलनायक रणजीत हांचे कडेन जोडिल्लें.
सिंपलान 80 च्या दशकांत अभिनयांतल्यान निवृत्ती घेतली, पूण चित्रपट उद्देगा कडेन संबंद तोडलो ना. ती कॉस्ट्युम डिझायनर जाली. वेशभूशा वाठारांत तिका नशिबान वांगड दिलो. वेशभूशा डिझायनर म्हणून तिचो 1987 तलो मुकुल आनंदालो ‘इंसाफ’ हो पयलो सिनेमा. फुडें सिंपलान शहजादे (1989), दृष्टी (1990), लेकिन (1990), अजुबा (1991) आनि डर (1993) ह्या चित्रपटांतले कलाकारांली वेशभूशेची निर्मणी केली. 1993 वर्सा प्रदर्शीत रुदाली सिनेमांतले वेशभूशेक लागून सिंपल कापडियाक उत्कृश्ट वेशभूशा निर्मणी करपाचो राष्ट्रीय चित्रपट पुरस्कार फावो जालो. 1998 वर्सा प्रदर्शित चाची ४२० ह्या सिनेमांत सिंपलान कमल हासनाच्या चाची ह्या पात्रा खातीर वेशभूशा तयार केली. चाची खातीर णववारी न्हेसणाक सोब सारकी कपला वयले मोठे तिकलेन कमल हासनाच्या व्यक्तिमत्वात लिंगिक रुपांतराक लागून प्रेक्षक प्रभावित जाल्ले. ते भायर ‘बरसात’ (1955), ‘घातक’ (1996), ‘जान’ (1996), ‘अजय’ (1996), ‘जब प्यार किसी होता है’ (1998), ‘इंडियन’ (2001), ‘कसम’ (2001), 23 मार्च 1931 : ‘शहीद’ ( 2002), ‘रोक सको तो रोक लो’ (2004), ‘सोचा ना था’ (2005), ‘नक्क्षा’ (2006) ह्या सिनेमां खातीर सिंपलान वेशभूशा केली. श्रीदेवी, अमृता सिंग, सनी देओल, तब्बू, प्रियंका चोप्रा,अमिताभ बच्चन, डिंपल, बॉबी देओल, कमल हसना सयत बॉलीवूडांतल्या कांय मोठ्या नावां खातीरुय वेशभूशा केल्या. नटांच्या पात्रांक जिवीत केल्यांत. फकत सोबितकाय शास्त्रा पुरतो विचार करिनासतना एकंदर कलावंतांच्या व्यक्तिमत्वाचो विचार करुन तांच्यो भूमिका जिव्यो करपाचे यत्न केले. अभिनया परस डिझायनर म्हूण सिंपलाली कारकीर्द खरेपणान फुलपाच्या वेळार नेमको भलायकेन घात घेतलो. निमाणो सिनेमा ‘घफला’ 2006 वर्सा प्रदर्शीत जालो आनी त्याच वर्सा सिंपलाक कॅन्सर जाला हें कळ्ळें. अशें आसून लेगीत ताणें कॅन्सराच्यो वेदना सोंशीत लेगीत काम चालू दवरलें. पूण 10 नोव्हेंबर 2009 दिसा सिंपल कापडियाक पिरायेच्या 51 व्या वर्सा मरण आयलें.
सिंपल कापडिया ही अभिनय आनी डिझायन ह्या दोनूय मळार आपली सुवात निर्माण करपी बहुआयामी कलाकार. स्वताचो मार्ग वेंचपाचें धाडस आनी आव्हानांक तोंड दिवपाचो निर्धार. तिचें नांव अजूनय प्रेरणेचें प्रतीक म्हणून सिनेमा कलाकार घेतात.

सुदिन वि. कुर्डीकार.
8275425404