भांगरभूंय | प्रतिनिधी
पालघर: शिक्षकांनी दिल्ले ख्यास्तीक लागून वसई वाठारांत एक काळीज पिळून उडोवपी घडणूक घडली. वसई पूर्व सातिवलीगच्या श्री हनुमंत विद्या मंदिर शाळेंत यत्ता सवेक शिकपी काजल उर्फ अंशिका गौड (१३) हे विद्यार्थिनीक शाळेंत पावपाक फकत धा मिनटां उशीर जाल्ल्यान शिक्षिकेन तिका १०० उठाबशी काडपाक लायल्यो. हे ख्यास्तीन तिचो जीव घेतलो. बाल दिसाच ते चलयेक मरण आयलें. हे घडणुकेक लागून पालक आनी नागरिकां मदीं तिडक पातळ्ळ्या.
नेमकें प्रकरण कितें?
८ नोव्हेंबराक काजल ही विद्यार्थीनी शाळेंत कांय मिनटा उसरां पावपी. उशीर जाल्ल्या शिक्षिकेन तिका फाटीर बॅग दवरून १०० उठाबशी काडपाची ख्यास्त आयकयली. अश्या खुबश्या विद्यार्थ्यांक फाटीर बॅग दवरून उठाबश्यो काडपाक लायिल्ल्यो. तातूंत काजलूय आशिल्लें. भियेल्ल्या काजलान सगल्यो १०० उठाबश्यो काडल्यो. घरा पावले उपरांत काजलाचें आंग दुखपाक लागलें. कुटुंबियांनी ताका रोखडेंच वसईच्या आस्था हॉस्पिटलांत दाखल केलें. तिची अवस्था आनीक इबाडिल्ल्यान ताका मुंबयच्या जे. जे. हॉस्पिटलांत हालयलें. मत, उपचारां मजगतीं १४ नोव्हेंबराचे रातीक ताका मरण आयलें.
हे घडणुकेक लागून शाळेच्या कार्यपद्धतीचेर गंभीर प्रस्न उबो जाला. शिक्षण कायद्या प्रमाण विद्यार्थ्यांक शरिरीक वा मानसीक शिक्षा करप गुन्यांव आशिल्ल्याचें गटशिक्षणाधिकारी हांणी स्पश्ट केलां. वसईचे गटशिक्षणाधिकारी पांडुरंग गलांगे हांणी हे घडणुके उपरांत खर चिंता उक्तायली. शिक्षण कायद्या प्रमाण विद्यार्थ्यांक शरिरीक वा मानसीक शिक्षा करप हो गुन्यांव. ह्या पुराय प्रकरणाची सविस्तर चवकशी करून अहवाल सादर सादर करतले. ह्या प्रकरणांत वालीव पुलिसांनी अकस्मात मरणाची नोंद केल्या.
काजलच्या कुटुंबियांनी शाळा प्रशासनान जापसालदारकी स्वीकारपाक न्हयकारिल्ल्याचो आरोप केला. हे घडणुके उपरांत थळाव्या नागरिकांनी आनी मनसे सयत विवीध राजकीय संघटनांनी शाळा प्रशासना मुखार खर तिडक उक्तायल्या. दोशी शिक्षिकेचेर गुन्यांव दाखल जाले बगर शाळा उगडपाक दिवचे ना, अशी शिटकावणी मनसेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
