भांगरभूंय | प्रतिनिधी
बलय, बलय, शबय म्हणीत फाल्गून म्हयनो सोंपलो. चैत्र म्हयन्यांत फुलांक, फळांक तर फुलपाचे जशें पिशेंच लागता, पोपटी रंगाची नवीताल्ल पानां झाडांक पालवतात त्याच बरोबर आंब्याक चंवर फुट्टा. चैतन्यमय रूप घेवन येवपी म्हयनो म्हणजे चैत्र आनी ऋतूंचो राजा म्हणजे वसंत ऋतू. तशें पळोवपाक वचत जाल्यार फाल्गून, चैत्र आनी वैशाख हे तीन म्हयने वेगवेगळ्या रंगान रुपान नटिल्ले आमी पळयतात.
चैत्र म्हयनो म्हळ्यार ऋतू बदलपाचो म्हयनो. चैत्राचो श्रृंगार करून सजिल्लो म्हयनो. दोंगरार फळांचो तर भार जाल्लो पळोवपाक मेळटा. तातूंत चारां, चुन्नां, काण्णां, चिंवरां, भेडसां, फागलां, चाफेरां, पिटकोळ्यो, झिरमुले, पुड्डे, कणेरां हांचो आसपाव जाता. धवीं फुल्ल चुन्नां तर काट्यांतल्यान तकली वयर काडून बुटू बुटू करून पळयतात. काण्णां काडटल्याच्या हाताक जरी दीख लागता आसत, जाल्यार आंबट गोड मिटक्यो मारीत खातनां ती तितलींच रुचीक लागतात. जांबळांच्या झाडां पोंदा तर जांबळ्या रंगांची खातड जाल्ली आसता. काजींनी मुट्ट्यांच्या वासान पुराय रान परमळटा.
आंब्या चंवरांचो गंध हुंगता म्हळ्यार आंब्याच्या झाडाचेर तोरांचे घोंस वाऱ्याच्या तालार धोलतात. पणस गच्च दाटिल्ले पळोवपाक मेळटात. ओंवळांच्या गंधाचो परमळ उणो जवचे पयलींच सुरंगांचो भार जाता तेन्नाच बायलां हे सुरंगा वळेसर केंसांत माळून वावुरतना दिसतात. मोगऱ्यांचो तर भार जातना मनांत एक वेगळींच खोस उदेवपाक लागता तशेंच शिरगांवची लइराईची जात्रां लागी पावल्या म्हणपाचें जाणवता.
हो म्हयनो सगळ्यांच्या मनांत चैतन्य जागयता. सगळ्यांच्या मनांतल्यो संवेदना नव्यो करून उडयता. वसंत ऋतू हो सैमाची प्रेयसी म्हळ्यार चुकीचें जावंचें ना. पुराय सृश्टीक फळोवपाची कला ताच्या भितर आसा तशेंच वसंत ऋतुच्या माध्यमांतल्यान दोळे आनी मन तृप्त जावन वता.
️ स्नेहा ह. साळगांवकार
8999717850
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
