भांगरभूंय | प्रतिनिधी
सावयवेरें: सांतेरीभाट, वळवयच्या श्रीशांतादुर्गा देवस्थानाचो वर्सुकी जात्रोत्सव आनी दिवजोत्सव भक्तीभावान मनयलो. ते निमतान सोमारा सकाळीं श्रीक अभिषेक, धर्मीक विधी आनी रातची श्रींची पालखेंतल्यान मिरवणूक, उपरांत श्रीगजांतलक्ष्मी कला संघ वळवय निर्मीत दशावतारी कालो आनी संकासूर वध हो कालोत्सव जालो.
मंगळारा सकाळीं फोणचेभाटांत ग्रामपुरसाक उंवाळणी करून सवायशिणींनी दिवजां घेवन शांतादुर्गा देवळांत प्रवेश केलो. हांगासरल्या पुरसाक उंवाळणी करून खांबा कडेन दिवे पेटोवन देवीक उंवाळणी करून प्रदक्षिणां घाल्यो.
पेटत्या दिवजांक लागून देवस्थानाचो वाठार उजवाडान भरिल्लो. दनपारां आरती, तिर्थप्रसाद आनी महाप्रसादान जात्रोत्सवाची सांगता जाली. महाप्रसाद श्रीमती विद्या सदाशीव नायक (पणजी) हांणी पुरस्कृत केल्लो.
गजांतलक्ष्मीची जात्रा दबाज्यान
वळयच्या श्रीगजांतलक्ष्मी देवस्थानाची वर्सुकी जात्रा आनी दिवजां व्हडा उमेदीन मनयली. सोमारा सकाळीं देवस्थानांत विवीध धर्मीक विधी, सांजवेळा हभप ब्रह्मय सुर्लकार हांच्या किर्तनाची कार्यावळ जाली.
मंगळारा देवस्थानांत फांतोडेर नौबत, अभिषेक, सकाळीं सवायशिणीं कडल्यान कुलपुरसाची दिवज उंवाळणी आनी नव्या जोडप्यांचे गांठवल, उपरांत श्रीसांतेरी शांतादुर्गा देवीचे पालखे बरोबर वाद्यवृंदा सयत सगल्या सवायशिणींन शिमेर प्रस्थान केले. उपरांत उंवाळणी आनी धर्मीक विधी जातकूच सवायशिणींचें पालखी मिरवणुके सयत श्रीगजांतलक्ष्मी देवळा कडेन आगमन जालें.
उपरांत सवायशिणींचें देवळांत श्रींचें दर्शन आनी दिवज उंवाळणी जावन देवळा भोंवतणी पांच प्रदक्षिणा काडले उपरांत श्रीरामपुरूष देवाक उंवाळणी करून जाले उपरांत दनपारां महाप्रसादान दिवजोत्सवाची सांगता जाली.
सांजवेळा रथोत्सवा निमतान श्रींची विद्यासहीत रथांतल्यान भव्य मिरवणूक काडली. उपरांत गजांतलक्ष्मी कला संघ वळय निर्मीत आनी विनायक तारी हांचे संकल्पनेंतल्यान साकारिल्लो ‘संकासूर वध’ हो दशवतारी कालोत्सव जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
