भांगरभूंय | प्रतिनिधी
म्हजें मत
पूण, जेन्ना प्रामाणीक नागरिकांक फावटी मारपाक लायतात आनी उक्त्या गैरप्रकारां कडेन आडनदर जाता तेन्ना वेवस्थेचेर प्रस्नचिन्न उबें करप तितलेंच गरजेचें थारता.
खऱ्या नागरिकांक परत परत आपली वळख सिद्ध करपाक वेळ कित्याक फुकट घालोवचो पडटा? खरे मतदार त्रास सोंसतना बनावट नोंदी मात नेटान कित्याक वाडटात?
म्हज्या कामाच्या पुराय जिवितांत हांव सतत स्थलांतर करतां- बेंगळुरू, मुंबय, गल्फ आनी परत भारतांत- फक्त कामा खातीर. हजारांनी भारतीयां भशेन हांव जंय काम करतां थंय- थंय म्हज्या कुटुंबा वांगडा रावलां. हांवें केन्नाच मुद्दाम मतदान टाळूंक ना; परिस्थितीक लागून तें शक्य जावंक ना. फाटपुरवण करपाक वेळ नाशिल्लो आनी संदय नाशिल्ली.
म्हजी मूळ मतदार नोंदणी चार दशकां आदीं कुडचड्यार आशिल्ली. कांय काळा उपरांत ते वळेरेंतल्यान म्हजें नांव गायब जालें. फातोड्ड्यां फ्लॅट घेतकच हांवें परतून नोंदणी केली- योगायोगान म्हाका एक सामको कार्यक्षम बीएलओ मेळ्ळो आनी ताणें ही प्रक्रिया सुलभ केली. उपरांत माजोड्ड्यां स्थलांतरीत जाले उपरांत पुराय पारदर्शकतायेन आनी वेवस्थेन घाल्ल्या सगळ्या नेमा प्रमाण म्हजो पत्तो अपडेट केलो.
2019 वर्सा गोंयांत कायमचो थीर जाले उपरांतच अखेरेक मतदानाची संद मेळ्ळी. आनी आतां अचकीत म्हाका आनी म्हज्या कुटुंबाक सहाय्यक वेंचणूक नोंदणी अधिकाऱ्या मुखार व्यक्तिगतपणान हाजीर रावपाक सांगतात. जणू काय आमी गुन्यांव केला. हाचे फाटलें कारण 2002 वर्सा केल्ल्या एसआयआर संबंदीत विसंगती आशिल्ल्याचें सांगतात–त्या काळांत हांवें पुरायपणान कामाचेर लक्ष केंद्रीत केल्लें आनी ही गजाल पळोवपाची म्हाका मात्तूय संद नाशिल्ली.
हाका लागून एक गंभीर प्रस्न उप्रासता.
मडगांवा एकाच घरांत सुमार 27 वा 39 मतदारांची नोंद जाल्या, अशे पोस्ट लोक उक्तेपणान करतात (पळयात चिराग दत्ता नायक हांची पोस्ट : लिंक निमाणी दिल्या.), हें कशें शक्य आसा? आनी अशीं उक्ती प्रकरणां अस्तित्वांत आसतना म्हजे सारकिल्ल्या प्रामाणीक मनशाक परत परत स्वताक ‘सिद्ध’ करपाक कित्याक सांगतात?
सरकार व्हडल्या आवाजांत “सरकार तुज्या दारांत” अशें जाहीर करता. मागीर मतदान सारकिल्या मुळाव्या हक्का खातीर ज्येश्ठ नागरिकांक, काम करपी वेवसायीक आनी प्रामाणीक रहिवाशांनी वरांचीं वरां ऑफिसांनी उबे कित्याक रावचे पडटा?
जर दुबाव आसा जाल्यार संबंदीत अधिकाऱ्यांनी दुबाव आशिल्ल्या पत्त्याचेर भेट दिवन पडटाळणी कित्याक करची न्हय? नेमांक पुरायपणान पाळो दिवंक नाशिल्ल्या लोकांक फोन करचे परस प्रत्यक्ष थळाचेर तपासणी कित्याक करीनात?
प्रामाणीक मतदारांक त्रास दितकच लोकांचो सहभाग खचता, ते निरुत्साहीत जातात. आनी जेन्ना बऱ्या लोकांक वेवस्थेंतल्यान भायर काडटात तेन्ना उरता तेच- जांचे विशीं आमी मागीर कागाळ करतात: भ्रश्ट आनी संधीसादू राजकारण. हे सगळे प्रक्रियेचो कोणाकूच फायदो जायना. उरफाटी ती प्रक्रिये वयलो विस्वासूच उणो जाता.
हांव कायद्याक मान दितां म्हणून नियोजीत प्रवास रद्द करचो पडलो तरी हांव सहकार्य करपाचो यत्न करतलों. पूण, जेन्ना प्रामाणीक नागरिकांक फावटी मारपाक लायतात आनी उक्त्या गैरप्रकारां कडेन आडनदर जाता तेन्ना वेवस्थेचेर प्रस्नचिन्न उबें करप तितलेंच गरजेचें थारता.
मतदानाचो हक्क ही कोणाची कृपा, दान न्हय. तो एक संविधानीक हक्क.
(वयर उल्लेख केल्लें लिंक- https://www.facebook.com/share/p/14TCBnQHBLp/?mibextid=wwXIfr)
– अजय करमली
93737 46957
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
