भांगरभूंय | प्रतिनिधी
गोंयांत 64 हजार सरकारी कर्मचारी आसात खंय. म्हणल्यार 25 मनशां फाटल्यान एक पडलो. तरीय सरकारी कर्मचारी, कार्यालयां आड दिसाळीं, सोशल मिडियाचेर सप्तकांतल्यान 10 तरी कागाळी वाचूंक मेळटातच. आतां सरकारी कर्मचाऱ्यांक गळ्यांत वळखपत्र घालप सक्तीचें केलां. नाजाल्यार शिस्तभंगाची कारवाय जातली. मात वळखपत्र लोकांक दिसता तशें आसचें. सरकारी पद म्हणल्यार अधिकार न्हय, ती सरकारान लोकांची दिल्ली जापसालदारकी. पगार सरकार दिता, पूण लोक हे कर्मचाऱ्यांचे पात्रांव. कचेरेंत काम घेवन येवपी मनशाच्या वेळाचो तांणी मान राखप, ही खरी प्रशासकी शिस्त. आमचे कडेन लोकशाय आसा आनी तिचो एक आधारस्तंभ म्हणल्यार सरकारी कर्मचारी. ते सेवेकरी प्रमाण वागतात, जाल्यारूच कचेरी देवळा भशेन पवित्र जाता. तेन्ना सगल्यांचीं कामां दिल्ले मुजतींत जावंक जाय. फायल हालोवपाक शक्त लागना, तर इत्साशक्त लागता, हें दरेकल्या कर्मचाऱ्यान मतींत दवरुंक फावो.
सरकारी कर्मचाऱ्यांक वळखपत्र घालपाची सक्ती केल्या. ड्युटीचेर आसतना, ड्युटी निमतान भायर वतना तांणी तें गळ्यांत घालप सक्तीचें. सुचोवण्यो दिवन पसून कर्मचारी त्यो पाळिनात, अशें दिसून आयलां खंय. कार्यालयीन शिस्त, कर्मचाऱ्याची वळख पटची, कचेरेंतली सुरक्षा वेवस्था घटमूट जावची म्हूण हो निर्णय घेतला. कचेऱ्यांच्या सायबांक कर्मचारी वळखपत्र घालतात काय नात, तें पळोवचें पडटलें. आरटीओ, मामलेदार, हाॅस्पिटला सारक्या चड लोकांचो संबंद येवपी कचेऱ्यांनी वळखपत्र सक्ती चड खरायेन जावंक जाय. कर्मचाऱ्याचें नांव स्पश्ट दिसतलें, अशी वेवस्था केल्यार बरी.
कचेरेंत येतात ते लोक आपली वावराडी, कामेरीं, मानाय जाल्ले भशेन वागपी कर्मचारी आसात. थोडे लग्नाच्यो धा धुवो आशिल्ले भशेन कायम त्राशिल्ले, बेजारिल्ले आसतात. संविधानांतल्या कर्तव्या प्रमाण, कर्मचाऱ्यांनी सगल्यांक मानान वागोवंक जाय. वळख, पयसो, पक्ष, मनीस पळोवन काम करपाक जायना. वेळांत सेवा दिवंक जाय. कसले दाखले हाडपाक जाय, तें एकदांच सांगप गरजेचें. 50- 60 किलोमिटरां वयल्यान सद्दां यो- वच शक्य नासता. च्यावेक पयशे मागपूय चुकीचें. कारण सरकार पगार दिता. कामाच्या वेळांत कचेरेंत हाजीर जाय. एकलो ना जाल्यार दुसऱ्यान ताचें काम करचें. कार्यालयाचो वेळ पाळप हें कर्तव्य. सायबाचें थंय लक्ष आसचें. वळखपत्र म्हत्वाचेंच, पूण हीं कर्तव्यांय म्हत्वाचीं. तांचीय सक्ती जावंक जाय.
सरकारी कचेऱ्यां भायर नागरीक सनद म्हणल्यार सिटीझनस् चार्टर आसतात. लावंक नात जाल्यार ते लावचे. शक्य नासल्यार ‘हांव मजत करूं’ असो तक्टो लावन एकल्याक बसोवचो. कांय कचेऱ्यांनी ते आसात, पूण तांकां सोदपाक दुसऱ्यांची मजत घेवची पडटा. सिटीझन्स चार्टरांत खंयचें काम, खंयच्या अधिकाऱ्या कडेन, कितल्या दिसांत पुराय जातलें, तें बरयिल्लें आसता. ते मुजतींत जायना जाल्यार संबंदिताक दोशी धरून शिस्तभंग कारवाय करतात. गोंयांत लोकसेवा हक्क कायदो आसा. म्हणटकच ताचो वापर करपाक जाय. आरटीआय वरवीं कामाची म्हायती मागूंक जाय. कागाळ करपाक जाय. म्हणटकच प्रशासकी कामांक वेग येतलो. सरकारान म्हत्वाच्यो सेवा आॅनलायन करुंक फावो. परवाने काडपाची, हप्ते बी भरपाची सुविधा आॅनलायन जाली जाल्यार कोणाक हप्ते दिवपाचो वेळ येवचो ना. बरेच कर्मचारी प्रामाणीक आसात. तांकांच लागून तर प्रशासन चलता. मात कांय वेळार ‘हो खाता, म्हूण तो खाता’, आनी बाबडे सगलेच बदनाम जातात.
फक्त वळखपत्रूच न्हय, तर ड्रेस कोड करचो, पुलिसांकूय नेमप्लेट, वळखपत्र घालपाक लावचें, अशीं मतां व्यक्त जावंक लागल्यांत. कचेरेंत येवपी चडशे लोक हे नीज गोंयकार आनी भितर काम करपीय नीज गोंयकार. मागीर वशिलो लावचो पडटा, लांच दिवपी पडटा अश्यो कागाळी कित्याक जातात, तेंच कळना!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
