भांगरभूंय | प्रतिनिधी
डॉ. जयंती नायकः ‘मायानगरी’ कथांझेल्याचें धेंपो म्हाविद्यालयांत लोकार्पण
पणजीः कोंकणी भूंय आनी भाशे कडेन निश्ठेन वावुरपी कथाकार वल्ली क्वाद्रुश. सदांच कोंकणीचो वावर समर्थपणान मुखार व्हरतना सगळ्यांक एकठांय करपी अशें व्यक्तिमत्व. वल्लीक साबार प्रस्न पडटात आनी त्या प्रस्नांची जाप तो कथेंतल्यान दिता. कोंकणी कथेंत म्हत्वाची भर घालपी हो ‘मायानगरी’ कथांझेलो थारतलो हातूंत दुबाव ना अशें मुखेल सोयरी ह्या नात्यान उलयतना डाॅ. जयंती नायक हांणी म्हणलें,.
धेंपे कला आनी विज्ञान म्हाविद्यालय आनी संजना पब्लिकेशन्स हांणी घडोवन हाडिल्ल्या वल्ली क्वाद्रुश हांच्या ‘मायानगरी’ ह्या कथांझेल्याचें लोकार्पण जालें. हें लोकार्पण धेंपे म्हाविद्यालयाच्या स्वामी विवेकानंद सभाघरांत जालें.
ह्या लोकार्पण सुवाळ्याक मुखेल सोयरी म्हणून डॉ. जयंती नायक, पुस्तकाचेर उलोवपी शैलेंद्र मेहता, पुस्तकाचे लेखक वल्ली क्वाद्रुश, म्हाविद्यालयाच्यो प्राचार्य डाॅ. वृंदा बोरकार आनी प्रकाशक दिनेश मणेरकार हाजीर आशिल्ले.
सुरवातीक प्रकाशक दिनेश मणेरकार हांणी सगळ्यांक येवकार दिलो. प्राचार्य डॉ. वृंदा बोरकार हांणी आपलें मनोगत उक्तायलें. शैलेंद्र मेहता हांणी पुस्तकाचेर उलयतना वल्ली क्वाद्रुश हांच्या लेखनाच्या विंगड विंगड तासांचेर भाश्य केलें.
हे कार्यावळीक धेंपे तशेंच हेर म्हाविद्यालयांतले शिक्षक आनी विद्यार्थी व्हड संख्येन हाजीर आशिल्ले. कार्यावळीचें सुत्रसंचालन आनी उपकाराचें उलोवप प्रा. गौरांग भांडीये हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
