भांगरभूंय | प्रतिनिधी
वलसाड : शेनवारा भयण-भावांनी रक्षाबंधन उमेदीन मनयलो. मात वलसाडाक जाल्लो भय-भावाचो हो सुवाळो दोळ्यांत उदक येवपा सारको थारलो. एका भावाक ताचे मरण आयिल्ले भयणीच्या हातांतल्यान राखी बांदली. विशेश म्हणल्यार, तो हात सध्या जिवो आसा. मरण आयले उपरांत त्या भावाचे खाश्या भयणीचो हात दुसरे चलयेक प्रत्यारोपीत केल्लो.
जाणून घेवया ह्या खाशेल्या रक्षाबंधना विशीं
सप्टेंबर २०२४ वर्सां ९ वर्सां पिरायेचें रिया मिस्त्री हाका ब्रेन हॅमरेजाक लागून मरण आयलें. रियाचे पालक, बॉबी आनी तृष्णा, हांणी धाडसी निर्णय घेवन तिचे अवयव दान केले. तिच्यो किडन्यो, लिवर, फुफ्फुस, कॉर्निया आनी उजवो हात आनी हेर अवयव गरजूंक दिले. रियाचो उजवो हात मुंबयच्या १६ वर्सां पिरायेच्या अनमता अहमद हिका प्रत्यारोपीत केलो. अनमता ही संवसारांतली सगल्यांत ल्हान पिरायेच्या ‘शोल्डर लेव्हल’ हात प्रत्यारोपण घेवपी चली थारल्या.
ह्या वर्साच्या रक्षाबंधनाक अनमता खास मुंबयच्यान वलसाडाक आयली आनी रियाचो भाव शिवमच्या हाताक राखी बांदली. हे भेटी वेळार रियाचे आवय-बापूय, भाव आनी सोयर्यांनी अनमताचो हात हातांत घेतलो. सगल्यांच्या दोळ्यांत दुकां आसलीं.
अनमता हांणी म्हणलें, म्हाका भाव नाशिल्लो. मात आतां म्हाका भाव मेळ्ळो. रियाचें कुटूंब आतां म्हजेंच कुटूंब.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
