भांगरभूंय | प्रतिनिधी
पणजी : गोयांत २०२५ वर्सा शारा गांवगिऱ्या भागांतल्या रस्त्यांर तिपेटिन भिरांकूळ अपघात जाल्यात. येरादारी पुलिसांच्या २०२५ च्या आंकडेवारिंतल्यान ही म्हायती मुखार आयल्या. फाटल्या वर्सा जाल्ल्या रस्तो अपघातांत गोंयच्या भागांत २१५ जाणांक मरण आयलें, जाल्यार शारांत ५८ जाणांनी जीव होगडायलो.
गोंयांत 2025 वर्सा वट्ट 2,370 अपघात जाले, तातूंतले 262 अपघात जीवघेणे थारले आनी तातूंत 273 जाणांक मरण आयलें. हे चडशे अपघात बेपर्वा आनी वेगान गाडी चलोवपाक लागून जाल्ले. हे चडशे अपघात दनपरां 1 ते 4 वरां मजगतीं जाल्ले. तातूंतले 98 जीवघेणे अपघात निवासी वाठारांनी जाले.
2025 वर्सा वट्ट जीवघेण्या अपघातांचो आंकडो आनी मरण आयिल्ल्यांचो आंकडो 2024 वर्सा परस उणो आशिल्ल्याचें एका वरिश्ठ येरादारी पुलीस अधिकाऱ्यान सांगलें. अपघात जावचे न्हय म्हणून रस्त्यांचेर गरजेची अभियांत्रिकी जतनाय घेवपाचो प्रस्ताव येरादारी खात्यान भौशीक बांदकाम खात्याक धाडला अशें तांणी स्पश्ट केलें. येरादारी विभागाने अपघात उणे करपा खातीर मोहीम सुरू केल्ल्यान, तातूंत जागृती करपा वांगडाच निश्काळजीपणान आनी नेम मोडून वाहनां धांवडावप्यांचेर कारवाय करतात.
नेम पाळचे
वाहन चालकांनी येरादारी नेम पाळून गाडयो चलोवपाक जाय. दोन चाकी वाहन चालक आनी फाटल्यान बसपी लोकांनी हेल्मेट घालचें आनी चार चाकी वाहन चालक आनी प्रवाशांनी सीट बेल्ट घालप गरजेचें. तशेंच सोरो वा हेर खंयच्याच मादक पदार्थाचे धुंदिन गाडी चलोवची न्हय असो उलो येरादारी पुलिसांनी मारला.
2024 वर्सा जाल्ले चडशे अपघात सांजवेळा 6 ते 7 वरां मजगतीं जाल्ले. कर्मचारी ह्या वेळार ऑफिसांतल्यान भायर सरतात आनी घरा पावपाची घाई केल्ल्यान ह्या वेळार अपघात जाल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
