वर्स विधानसभा वेंचणुकांचें, बदलांचे

भांगरभूंय | प्रतिनिधी

केंद्रीय अर्थसंकल्पांत देशांतल्या व्हड राज्यां बराबरीन उदरगतीच्या मार्गार पाविल्लें गोंय दिसतलें, एकवटीत यत्नांतल्यान.

केरळ, अस्तंत बंगाल ह्या व्हड राज्यांच्यो विधानसभा वेंचणुको अंदूं जातल्यो. भाजपाक नवे राष्ट्रीय अध्यक्ष मेळ्ळ्यात. काँग्रेसीक नवो युवाध्यक्ष गोंया मेळ्ळा, राष्ट्रीय अध्यक्षय बदलपाची जाणविकाय वरिश्ठांक दिसपाक लागल्या. दक्षीण भारतांतल्या आंध्र प्रदेशांत महाराष्ट्रा वरी परतून अर्थकारणाक नवी दिका दिवपाक सुरवात जाल्या. विधानसभा वेंचणुकेचेर नदर दवरून उत्तराधिकारी दिवपा पासत, राजकारणांत बदल हाडपा पासत दक्षीणेंतल्या राज्यांनी राजकारणाक बोवाळ सुरू जाला. केंद्रीय अर्थसंकल्पांतल्यान नव्यो अपेक्षा, आशा आसात. विदेश निती आपणावचे परस स्वतंत्र विचारांतल्यान मुखार वचप आयज भारताक शक्य जालां. पांच स वर्सां उसरां भारत महासत्ते लागीं पावपाची वाट मेकळी जाल्या, मातयेक मोल येवपाक लागलां. मुळावण घट आशिल्ल्यान राष्टट्रीय विचारांतल्यान प्रदेशीकतायेक बळगें मेळटा. दायज सांबाळटना नवे दिकेन वचपाचो हावेस बाळगुया.
गोंय सरकाराचो अर्थसंकल्प विधानसभा वेंचणुकेंत पुराय भौमताचेर दोळो दवरून आसतलो. विरोधी पक्ष राजकारण करपाचे यत्न करतले. सरकारान धिटाय दाखयल्यार, निश्चेव केल्यार नवो मार्ग, नवी दिका गोंयच्या राजकारणाक मेळटली. ते दिकेन वचपाचो वावर जाता हें लोकोत्सव 2026 दाखयता. लोकोत्सवाचें उक्तावण दिवलेवरी दिवज पेटोवन करपी काणकोणचे आमदार, कला आनी संस्कृती मंत्री रमेश तवडकार लोकोत्सवाची नवी येवजण करतले. लोकोत्सव लोकांच्या दारांत गोंयच्या व्हड शारांतल्यान व्हरपाक जाय ताची जाणविकाय तांकां जाल्या. काणकोणचो लोकोत्सव पणजे, सत्तरी, पेडणें, पर्वरेंत ते हाडटले असो विश्वासय तांकां मेळ्ळा. स्वयंपूर्णा सुदारता, अन्नपुर्णेची वाट व्हडली जाता तें लोकोत्सवांत पळोवंक मेळटा. विधानसभा वेंचणुकेचें वर्स तिका आनीक बळगें दितलें, तिच्या अर्थकारणाक ताचो तेंको मेळटा हें लोकोत्सव दाखयता. सवकासायेन त्या अर्थकारणातल्यान ती राजकी मळार येवंक शकता, उच्च शिक्षण घेतिल्ले अस्तुरेकय लोकोत्सवाचें म्हत्व कळ्ळां. लोकोत्सवांतल्या स्टाॅलार राज्यांचें नांव पयलीं वरी बरयिल्लें कित्याक दिसना?
लोकोत्सव म्हणल्यार फक्त कला आनी संस्कृती न्हय. लोकांकय एकठांय हाडपी, वेपार, वेवसायाचो उत्सव. गोंयची अस्तुरीय वेगळे दिकेन वता, गिन्यांनातल्यान ती वेपार, वेवसायांत घुस्पून घेवंक लागल्या. फुडलीं पांच वर्सां बदलाक, तिका उर्बा दिवपी आसतलीं. नाचण्याच्या सत्वा इतलीच नाचण्याची भाकरी, आंबील शिंयाच्या दिसांनी उपेगी. उकडे तांदूळ, मेथयो, गोड घालून केल्लें आटवल फक्त बाळंटिणीक न्हय शिंयाळ्या दिसांनी भुरगीं, जाण्ट्यांच्या हाडांक घटसाण दिवपी. सोय जेवणांतल्यान उणी करपाक जाय ती शिकल्या. ओव्हन, इंडक्शनाच्या उपेगांतल्यान जेवण, मातयेंतल्यान तेल घालपाच्यो बाटल्यो करपी गोंयची अस्तुरी लोकोत्सवांत दिसता.
गोंयचे क्रोशे, शिंवण आनी भरतकाम, गोधडी व्हड जाता तेन्ना ती करपी, विकपी धा अस्तुऱ्यो आसतात. लोकोत्सवांत कोयर, प्लास्टीक वेवस्थानपनांतले अस्तुरेची तोखणाय जावची. 26 वो लोकोत्सव कपड्याच्यो पिशव्यो दिवपी, प्लास्टिकाक धांवडावपी आसतलो हेखातीर सगल्या उत्सवांनी वांटेकार जावपी अस्तुरेक प्रशिक्षण मेळपाची तजवीज करची. गोंय विधानसभा वेंचणुकेच्या अजेंडांत तो मुखेल विशय आसचो. घरांतल्या दीसपट्ट्या ओल्यो, सुक्या कोयराचो विलो लावपाक पणजेकच न्हय गोंयाक 75 टक्क्यां वयर जैत मेळटा, फाटल्या धा बरा वर्सांतलें एक व्हड पावल. कपडे तशेंच हेर घण कोयर एकठांय करपाची नवी येवजण हाडपा पासत सरकारान तयारी केल्या, जागृताय उत्सवांतल्यान जाता. कोयर वेवस्थापन म्हामंडळांतल्यान कोयर वेवस्थापन खातें जालां, क्लायमेट चेंज (हवामान बदल) खात्याची बुन्याद वर्सा भितर घालपाक जाय.
गोंय सरकारान 4000 हजार कोटी रुपयांची येवजण अर्थ मंत्र्यांचे केंद्रीय बसकेंत मांडली. वेंचणुकेच्या वर्सांत सगले पयशे मेळचे ना, नव्या प्रकल्पांची येवजण जातली. दोन तीन वर्सां भितर समाजीक सुरक्षा येवजणेतले अस्तुरेचो, असंघटीत कामगारांचो पांवडो सुदारप, म्हादय न्हंयेचेर ल्हान धरण, खणी खातीर शक्तीपीठ मार्गा पासत पयसो उबारप शक्य जातलें. म्हजें घर येवजण गरज पडल्यार बदलांतल्यान लोकां मेरेन पावोवप शक्य आसा, केंद्रीय येवजणेंत तिचो आस्पाव जायत व्हय? दर्यावेळो म्हेळ्यो, अशीर जातात तें आडावपा पासत सरकाराची खाशेली येवजण येता हें मुख्यमंत्र्यांनी केंद्रीय अर्थ मंत्र्यांचे बसकेंत निधी मागतना कळीत केलां.
केरळ, आंध्र प्रदेश, तामीळनाडू, अस्तंत बंगाल भुगोलीक नदरेंतल्यान गोंय ल्हान. केरळांतलें पर्यटन बदलता, दक्षीणेंतल्या हेर राज्यांत पर्यटन वेवसाय मूळ धरपाक लागला पूण शांतिकाय गोंयांत आसा. सादूर रावन ते शांतिकायेंत इबाड जावचो न्हय, खत पडचें न्हय हेखातीर सरकार वावराक लागलां. फुडल्या दोन वर्सां भितर अध्यात्म पर्यटनाची कवाडां भोंवडेकारांक आपले वटेन व्हरतलीं. केंद्रीय अर्थसंकल्पांत देशांतल्या व्हड राज्यां बराबरीन उदरगतीच्या मार्गार पाविल्लें गोंय दिसतलें, एकवटीत यत्नांतल्यान.
गोंयचे जिल्हो वेंचणुकेंत विधानसभा वेंचणुकेचें मिनी राजकी रुपडें दिसलें. महाराष्ट्रांत मिनी विधानसभा वेंचणूक जाल्ली नगरपालिका, म्हापालिकेच्या वेंचणुकेंतल्यान दिसली. दोन विखुरील्ले ठाकरे भाव एकठांय माचयेर आयले पूण वेंचणूक चिन्नां वेगळीं, ताचो लाव भाजपाक मुखेलपणान मेळ्ळो. विखुरिल्ली शिवसेनाच न्हय राष्ट्रवादी काँग्रेस पक्ष फुडल्या स म्हयन्या भितर एक जातले, वेंचणूक चिन्नाचो प्रस्न सुटावो जातलो अशें महाराष्ट्र नगरपालिका, म्हापालिका वेंचणुकेच्या उपरांत दिसूंक लागलां.
गोंयांत, देशांतल्या राजकारणांत, हवामानांत जावपी बदल सगल्या राजकी पक्षांनी समजून घेवपाक जाय. हवामान, वातावरणांतल्या बदलांतल्यान परिक्षा पद्दत बदलता जाल्यार शिक्षणाचें वेळापत्रक आनीक बदलपाचो विचार सरकारान करचो. आवय भाशे परस राजभाशेंतल्यान शिक्षण दिवप गरजेचें आसा, उत्सवांतले तकटेय देशी भाशेंतल्यान आसचे. विशय ल्हान संस्कृताय, दायज राखपाक देशी भाशेचो म्हत्वाचो वांटो आसा, आसतलो.
जिणेशैलीच्या बदलांतल्यान हाॅटेलां, गाड्यांचेर खावप वाडटा तेन्ना गांवगिरे अन्नपुर्णेक ताजें अन्न कशें दिवप, कचेऱ्यांनी तें कशें पावोवप तें कळूंक लागलां. तेखातीर अर्थीक मजत दिवपाक सरकारान येवजण करची. अंदूंच्या अर्थसंकल्पांत तशेंच विधानसभा वेंचणूक अजेंडांत त्या येवजणेची पुराय म्हायती मेळची ना. सरकारी कचेऱ्यो, बॅंको ती म्हायती गांवांनी ल्हान माचये वेल्यान दिवंक शकतात. देशी भास, राजभाशेंतल्यान उलयल्यार अर्थकारण गांवचे अस्तुरे मेरेन पावता. मल्टीमिडिया तेखातीर उपेगी.
प्रदेश भाजपाच्या राजकारणांत एक कार्यकर्तो ते प्रदेशाध्यक्ष पदा मेरेन दामोदर नायक पावल्यात. वर्सा भितर जिल्हो वेंचणुकेंत मेळयिल्ल्या जैतांतल्यान मुखार वतना तांचो फातोड्डें मतदारसंघ भाजपाक परतून मेळोवन दिवपाची जापसालदारकी तांचेर आसा. तें वेंचणुकेंत आसतले? कार्यकर्त्यांच्यो समित्यो आपल्याय मतदारसंघांत वेगळे पद्दतीन बांदतले? भाजपाक नवें नेतृत्व फातोड्डें मतदारसंघांत मेळटलें? फुडले स म्हयने तांचे खातीर म्हत्वाचे आसात.
प्रदेश काँग्रेसचे युवाध्यक्ष अर्चीत शांताराम नायक युवक काँग्रेसीचे कार्यकर्ते, हेर पदां सांबाळत अध्यक्षपदा मेरेन पावले. तरणाट्यांक 20 टक्के मतदारसंघ वेंचणुकेंत दिवपाची तांची मागणी आसा. युवक काँग्रेसीक ते नवी दिका दितले? तीन चार म्हयन्या भितर तें कळटलें.

सुहासिनी प्रभुगांवकार
9881099260