वर्स नवे उमेदवार, नव्या येवजण्यांचें

भांगरभूंय | प्रतिनिधी

विधानसभा वेंचणुकेचो प्रचार, तयारेंत पाच- स म्हयने वेंचणूक आचारसंहिते आदीं वतात. गोंय विधानसभा वेंचणुको बेगीन घेवपाच्यो जाल्यार त्यो डिसेंबर 2026 च्या पयल्या सप्तकांत जातल्यो. अंदूचें केंद्र, राज्याचें अदमासपत्रक ते खातीर सरकाराक म्हत्वाचें आसा. केंद्रांत भाजपा आघाडी सरकार आशिल्ल्यान ताचो लाव राज्य सरकाराक जाता. सगल्या राजकी पक्षाचे लोकप्रतिनिधी सरकारी येवजणींतल्यान उदरगत आपल्या मतदारसंघांनी करुंक शकल्यात. विधानसभा वेंचणुको लागीं येतात तेन्ना आंदोलनां, रास्ता रोको जातात तेन्ना फाटल्यान राजकारण, राजकारणी आसतात. ज्यो येवजणी 2000, 2012, 2014 त भाजपा- म. गो. युती सरकारान केल्ल्यो त्यो लोकां मेरेन पावल्यात. लोकजीण सुदारल्या, उंचेलें शिक्षण हेर मागासवर्गा मेरेन पावलां. सेवा क्षेत्र, देशी पर्यटन, शेतकाम मळाची नवी दिका स्वयंपूर्णा, स्वयंसिद्धतेक उपेगी. कांय येवजणीत सुदारप जालां, वेंचणुकेच्या वर्सा नव्यो येवजणी येतल्यो, आदल्या येवजणींक घटाय मेळटली अशी आस्त आसा.
नवें युवा नेतृत्व घडोवपाक पक्ष मुखार आसा हें राश्ट्रीय पावंड्यार भाजपान दाखोवन दिलां. 2027 चे गोंय विधानसभा वेंचणुके खातीर उमेदवारी दितना प्रदेश भाजपाक ती नवी वाट आसा. भाजपाचे राश्ट्रीय अध्यक्ष नवीन नबी ते दिकेन वचपाक उर्बा दितले. भाजपांतल्या कुटुंबराज्याक मात्सो त्या बोवाळांत धपको बसल्यार अजाप दिसचें ना. मुळाव्या कार्यकर्त्यां मेरेन वचपाचो व्हड वावर प्रदेस भाजपाध्यक्ष दामोदर नाईक हांणी वर्सा भितर केला. मार्च- एप्रील एक म्हयनो मिशन साश्ट ताणी कित्याक करचें न्हय? जिल्हो वेंचणुकेन तांकां प्रदेस भाजपाची उणेपणा कळ्ळीं. मात्शे कश्ट केल्यार साश्टच न्हय दक्षीण गोंयांत भाजपची शक्त वाडूंक शकता.
अँटी इनकम्बन्सी फॅक्टर – प्रदेस भाजपांतल्या ज्येश्ठ आमदारांक त्रासाचो. नवें नेतृत्व त्या मतदारसंघांनी भाजपांत आसा. त्या नेतृत्वाक एकचित्तपणान आपल्या मतदारसंघांतल्या वावरांत घुस्पावप, मतदारां मेरेन पावोवप गरजेचें. आमदार निलेश काब्राल हांकां पक्षाच्या कार्यांत साश्टींतल्यान व्हेल्यार कांय मतदारसंघ प्रदेस भाजपा वटेन येवंक येतात? अदमास घेतल्यार, समाजाचीं गणितां मेजल्यार मांद्रें, दिवचल मतदारसंघ परतून भाजपाक मेळटले. म्हापशें, थिवी, सांताक्रूज, सांत आंद्रें, कुंभारजुवें, पणजी मतदारसंघांतल्यान नवे उमेदवार दिवपाचो विचार भाजपा करुंक शकता.
पावणेदोन वर्सां आदीं कांय मंत्र्यांच्या वावराचो नियाळ करपाची सुचोवणी केंद्रीय मंत्री नितीन गडकरी हाणी केल्ली. कला अकादमीचेर मारिल्ले, पडिल्ले फातर अकादमीक आनीक घटाय दितात हें लोकोत्सवान दाखोवन दिलां. आमदार गोविंद गावडे, आमदार आलेक्स सिक्वेरा मंत्रीमंडळांतल्यान नासले तरी मतदारसंघांत, समाजीक वावरांत आसात. गोविंदबाबान आपलें अस्तित्व तिगोवन दवरलां तें मतदारसंघांतल्यान दिसतलें. आमदार आलेक्स सिक्वेरा तशेच हेर ज्येश्ठ मंत्र्यांची पिराय मतींत घेवन तांच्या मतदारसंघांत तरणाट्यांक, अस्तुरेक उमेदवारी दिवपाचो अभ्यास बेगीन जावचो. अनुसुचित जमाती, अस्तुरी राखीवता चालीक लायतना उमेदवारी मेळोवपाक, घेवपाक खेटाखेट जावंक शकता. प्रदेश भाजपाध्यक्षांच्या वाडदिसा निमतान गोंय राज्य भाजप कार्यालयांत जमिल्ल्या कार्यकर्त्यांनी तसो रकाद धाडला.
जिल्ह्यांक अधिकार दिवन ते बेगीन चालीक लावपाची मोख सरकाराक दवरची पडटली. दिव्यांग, अस्तुरी, ज्येश्ठ नागरिकांक बसींत चड सुवाती राखून दवरपाचो निर्णय सरकाराक घेवचो पडटलो. लाडली लक्ष्मी, यशदामिनी, गृह आधार येवजणेच्या नेमावळींत बदल करतना महालेखापालान केल्ल्यो सुचोवण्यो मानून घेवच्यो. कला आनी संस्कृती खातें उत्सवां परस शिक्षणाक म्हत्व दिवन नवनिर्मणेक तेंको दिता हें दाखोवन दिवपाचो वगत आयला. कांय आदल्या येवजणींनी बदल करपाची गरज आसा. एक सारक्यो येवजणी, पुरस्कार चार खातीं दितात जाल्यार त्या पुरस्कारां पासत एकच येवजण दवरची. एकाच पुरस्काराच्या रुपान चड पयशे दिवपाची तजवीज जावची.
दायज येवजण चालीक लायतना तें राखून दवरपी, मुखार व्हरपी गोंयकार कितले आसात ताचो नियाळ करुन येवजणेंत सुदारप जावचें. दायजांतली मिक्स भाजी मूळ शेणयता, हवामान बदलांतल्यान गोंयकार आपले संस्कृतायेंत बदल करपाक शिकल्यात परंपरा सांबाळून.
चिंबला युनिटी माॅल, प्रशासन स्तंभ येवजण तयार केली तेन्नाचे आनी अंदू जाल्ले हवामानांतले बदल अभ्यास करपा सारके आसात. पणजे, मडगांव, म्हापसा, मुरगांव शारांत साठ सत्तर वर्सांच्योच न्हय फाटल्या धा- पंधरा वर्सांनी बांदिल्यो बिल्डिंगो उपेगांत कित्याक ना? भिकाऱ्यांची, गुन्यांवकारांची घरां थंय जातात? नगरविकास खात्यान नियाळ करचो, त्यो बिल्डिंगो कोणाच्यो, उपेगांत कशो हाडपाच्यो तें थारावपाचो वगत आयला.
नागरी पुरवण खात्याचे येवजणीचो लाव चडांत चड कोण घेतात? तांकां माॅल पयस आसा? गोंयकारांची जीणेशैली बदलता तेन्ना जागृताय उपेगाची.
येरादारीच्यो सुविधा, साधनांय वाडटात तेन्ना गती वाडटा, अॅक्सिडेंट वाडटात. येरादारी पुलीस पणजेवरी शारांत, स्मार्ट सिटीच्या मुखेल वाठारांत पार्किंग वेवस्था सांबाळटना खासावीस जातात. चूक कोणाची? स्मार्ट सिटी येवजणे खाला स्मार्ट इ बसी आयल्यो, त्या बसीं पासत रस्ते जाय तशे आसात? पणजी स्मार्ट सिटी करतना पंचवीस वर्सांआदीं बांदिल्ल्यो पासयो गाडयो, सायकली पार्किंगा पासत उपेगी जातात. लोकोत्सवाच्या पंचवीसाव्या वर्सा निमतान लोकोत्सवाचें विकेंद्रीकरण करप, लोकोत्सव हेर व्हडा शारांतल्यान लोकां लागीं व्हरप, लोकसंस्कृतायेची जतनाय घेवपाक येवजण जाय. कला आनी संस्कृतीमंत्री रमेश तवडकार कला, संस्कृती खात्यांत बदलाचें वारें हाडटले अनुसुचित जमाती खात्यावरी अंदूच्या अर्थसंकल्पांत.
लोकजीण बदलता, गरीब श्रीमंत जाता तेन्ना नवे गरीबय जल्माक येतात. तांकां उजवाडाचो दिवो सरकारान दाखोवचो मार्गदर्शनांतल्यान, तांचे मेरेन वचून. आडमेळ्यांतल्यान फुडें वतना सरकारान कितें केंलां तें अचूक सांगपाची गरज उपरासल्या. उतरांची सर्कस जाता तेन्ना फातरय चुकीच्या नागरिकांक लागतात, उजो पेटोवन करोडपती जावपीय आसतात. सरकाराक तें होल्मलां, चुको सुदारपाच्या वावराक सरकार लागलां तेन्ना दुस्मान इश्टागत करपाक येतले. इश्ट, दुस्मानांचेर नदर दवरतना इश्ट, दुस्मान सरकाराच्या फाटल्यान लागतात. कळत सरकाराक?

सुहासिनी प्रभुगांवकार
9881099260