भांगरभूंय | प्रतिनिधी
पणजीः एक वर्स मायज जालें अजून मेरेन गोंय बाल हक्क आयोगाची नवी समिती वेंचून काडूंक ना. सद्या आयोगाचो अध्यक्ष नाशिल्ल्यान हो आयोग निश्क्रीय जाला. ही समिती वेंचपाची प्रक्रिया अजून मेरेन सरकारा कडेन पडून आसा.
गोंयांत खंयच्याय दिसा एका तरी भुरग्याचेर अत्याच्यार जाताच, पूण ह्या अत्याचार आड कारवायेचो आदेश दिवपी भुरग्यां खातीरचो हो आयोग आतां फक्त नांवां पुरतोच जावन उरला. कळंगूटे दोन सान पिरायेच्या चलयांचें अपहरण करून तांचेर लैंगीक छळ करपाची घडणूक ताजी आसतनाच ह्या आयोगाची बरखास्त जाल्ली समिती रिती दवरप ही हुस्क्याची गजाल जावन आसा.
गोंय राज्य भुरगीं हक्क राखण आयोगाचे अध्यक्ष पिटर बोर्जीस आशिल्ले. पिटर हांच्या फुडारपणा खाला नेमिल्ली समितीचो कार्यकाळ सोंपिल्ल्यान 19 मे 2024 दिसा ती बरखास्त केल्ली. आतां आमी 19 जून 2025 दिसा आसात. पूण हें रितें आशिल्लें अध्यक्षपद अजून मेरेन भरूंक ना आनी नवी समिती वेंचून हाडपाची प्रक्रिया फाटले वर्सभर जालें आडखळून उरल्या अशें गोपांनी सांगलें.
ही समिती वेंचून हाडपा खातीरची प्रक्रिया आडखळून कित्याक उरली हाचेर स्पश्टीकरण दिल्लें ना. हे समिती खातीर मुलाखती चालू आशिल्ल्यो पूण फुडे कितें जालें हाचेर स्पश्टीकरण ना. सद्या व्हड प्रकरणां आयोगा कडेन येनात आनी जर असलीं प्रकरणां आयलीं जाल्यार तीं आमी बायलां आनी भुरगीं उदरगत खात्या कडेन धाडून दितात. खात्याची भुरगीं कल्याण समिती समस्येचें निवारण करता. समितीचे गैरहाजिरेंत शिक्षकान विद्यार्थ्यांक मारिल्ल्याची एकच कागाळ आयोगा कडे आयल्ली ताचें निवारण भुरगीं कल्याण समितीन केल्या अशी म्हायती गोपांनी दिली.
गोंय भुरगीं हक्क आयोग बायलां आनी भुरगीं उदरगत खात्या खाला येता. हे विशीं खात्याच्या वरिश्ठ अधिकाऱ्यान म्हायती दितना सांगलें की नवीन समिती वेंचून काडपाची प्रक्रिया आमी सरकाराक धाडल्या आनी ही प्रक्रिया सरकारा कडेन प्रलंबीत आसाया. येता त्या कांय दिसांनी नवे समिती वांगडा अध्यक्षाची निवड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
