भांगरभूंय | प्रतिनिधी
दर दिसा वराक 30 परस चड लोक बुडून मरतात. म्हणल्यार संवसारांत वर्साक तीन लाखां वयर लोक जीव वगडायतात. संवसारीक बुडून येवपी मरणां आडावपाचो दीस 25 जुलयाक आसता. ही जागतीक वकिलीची कार्यावळ. हो दीस कुटुंब आनी समाजाचेर बुडून मरप्यांच्या दुख्खेस्त मरणान घरच्यांचेर येवपी आकांत आनी हेरांचेर जावपी खोलायेचो परिणाम उजवाडाक हाडप आनी हें आडावपा खातीर जिवीत वाचोवपी उपाय दिवपाची संद म्हणून वावुरता.
दर वर्सा अदमास 2,36,000 लोक बुडून मरतात आनी 5- 14 वर्सां पिरायेच्या भुरग्यांच्या मरणाच्या धा मुखेल कारणां मदीं बुडप हें एक. धाकट्या भुरग्यांक उदकाच्यो टांकयो वा हेर स्रोतां लागी निरीक्षणा बगर सोडूंक फावना तें हे पासत.
मोहिमेचो विशय
तुमची काणी एक जीव वाटावं शकता : सरभोंवतणच्यां लागीं शेअर केल्ल्या अणभवांतल्यान बुडपाचे अपघात आडावंया वा टाळूंया. मुखेल असुरक्षित घटक साबार आसात. दादल्यां मदीं बुडून मरण येवपाचें प्रमाण बायलां परस उणेंच म्हणल्यार दुपेट आसता. थळाव्या पांवड्यार बुडून मरण आयिल्ल्या लोकां मदीं 29 वर्सां मेरेनच्या भुरग्यांचो आनी तरणाट्यांचो 83% आस्पाव आसता.
स्थलांतर
अभ्यासा प्रमाण स्थलांतरीतांक नव्यान रावंक गेल्ल्या प्रदेशांत बुडपाचो धोको चड आसता. चड करून हेर वाठारांतल्यान दर्यावेळेच्या वाठारांनी वचून रावपी लोक. 2021 इस्वेंत संवसारीक पांवड्यार अदमासें बुडून मरण आयिल्ल्या तीन लाख लोकांतलीं 12% (35,000 मरणां) उदेंत भूंयमध्य दर्या वाठारांत जाल्लीं. संवसारी भलायकी संघटनेच्या (डब्ल्यूएचओ) अहवाला प्रमाण सगळ्या प्रदेशां परस उदेंत भूमध्य दर्यांत बुडून मरण येवपाचें प्रमाण दुसऱ्या क्रमांकाचेर आसा. हांगाच्या 5-14 वर्सां पिरायेच्या भुरग्यांच्या मरणांक बुडप हें दुसरें मुखेल कारण. ह्या पिरायेच्या गटांत ह्या प्रदेशांतल्या सगळ्या बुडून मरण आयिल्ल्या लोकां मदीं 23.4% हे पिरायेंतलीं भुररगीं आसात.
डब्ल्यूएचओच्या सगळ्या प्रदेशांतल्या 0- 4 वर्सां पिरायेच्या भुरग्यांमदीं बुडून मरण येवपाचें प्रमाण ह्या प्रदेशांत सगळ्यांत चड आसा. ह्या प्रदेशांत उण्या आनी उण्या मध्यम उत्पन्नाच्या देशां मदीं बुडून मरण येवपाचें प्रमाण सगळ्यांत चड आसा आनी चड उत्पन्न आशिल्ल्या देशां मदीं दुसऱ्या क्रमांकाचेर आसा.
आमचें गोंय
आमचें गोंय किनारी राज्य. तेच परीनं तें संवसारीक नामनेचें भोंवडे राज्य. हांगच्यो वेळो सैमान नटिल्ल्यो आनी नितळ. देखून भोंवडेकार आकर्शित जातात. दर्या वा न्हंय लागींच्यान पळोवं नाशिल्ल्यांक ‘ जाणे देखलें ना कालंव ताका दिसलें धरकल’ अशी गत जाता. तातूंत गोंयांत भोंवडे नावान सोरो सवाय आनी सोंपेपणान मेळटा. किनारी वाठार पळोवं नाशिल्लो लोक गोंयच्या वेळांचेर पिसो जाता. जायत्या भोंवडेकारांचे चोंबे सोरो पियेवन, पावसा दिसांनी बी उदकांत देवतात. न्हावपाक देवतात आनी जीव वगडायतात. कांय वर्सां फाटीं चड जाण बुडून मरताले. संवसारभर करंदाय जावंक लागली. मागीर सरकार जागें जालें. वेळांचेर जीवन रक्षक नेमणूक करुन हो आंकडो उणे करपाक यश आयलें.
तरी पावसांत बी मेळत थंय वेळांचेर, खडपांचेर बी वचून सॅल्फी काडपी अजून बुडून मरतात. जायते फावटी, कोणाचें लक्ष ना अशें पळोवन उदकांत उडी मारून जीव दिवपाच्योय घडणुको हांगां जातात. हें सगळें मतींत घेतल्यार संसारीक बुडून येवपी मरणां आडच्या दिसाचें म्हत्व लक्षांत येता.
प्रकाश वामन कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
