भांगरभूंय | प्रतिनिधी
सात पालिकांनी घेतली निर्बिजीकरण मोहीम
पणजीः फाटल्या एका वर्साच्या काळा भितर राज्यांतल्या 7673 सुण्यांचे निर्बिजीकरण जालां. सुण्यांची निर्बिजीकरण मोहीम हातांत घेवपा खातीर पालिकांक सरकारा कडल्यान निधी मंजूर जाला वा काय पालिकांनी स्वता आपल्या कोफरेंतलो निधी खर्च केला, अशी म्हायती शार उदरगत खात्यान दिली.
खात्यान दिल्ले म्हायती प्रमाण गोंयांत 14 पालिका आनी म्हानगरपालिके मदल्या फक्त सातच पालिकांनी सुण्यांची निर्बिजीकरण मोहीम हातांत घेतल्या. 2025 ह्या वर्सा भितर सगल्यांत चड निर्बिजीकरण मडगांव पालिकेंत जालां जाल्यार सगल्यांत उणें सांगें पालिकेंत जालां.
पणजे म्हानगरपालिकेच्या पणजी अॅनिमल वॅलफेअर सोसायटी (पॉवस) हांणी वर्सा भितर 2918 सुण्यांचें निर्बिजीकरण केलां आनी सरकारा कडल्यान तांकां रु. 55.63 लाख इतलो नीधी मंजूर जाला. जाल्यार केपें पालिकेन गोवा अॅनिमल वॅल्फेर ट्रस्ट हांचे कडेन समजिकायेची कबलात करून 19 सुण्यांचे निर्बिजीकरण केलां. पशूवैजकी खात्या कडल्यान निधी मंजूर जाले उपरांत आनीक सुण्यांचे निर्बिजीकरण जातलें.
फोंडें पालिकेन वर्ल्ड वायड व्हॅटेनेरी सर्विसेस (डब्ल्यूव्हीएस) आनी मिशन रेबीज हांचे वांगडा कबलात करून 1121 सुण्यांचें निर्बिजीकरण केलां आनी हे खातीर फोंडें पालिकेन रु. 10.32 लाख निधी खर्च केला. कुडचडें पालिकेन 243 सुण्यांचें निर्बिजीकरण करुन हे खातीर पालिकेक 33.99 लाख इतलो निधी मंजूर केला.
जाल्यार मडगांव पालिकेन डब्ल्यूव्हीएस हांचे मजतीन निर्बिजीकरण मोहीम हातांत घेवन 2970 सुण्यांचें निर्बिजीकरण करून स्वताचो 3.12 लाख इतलो निधी खर्च केला. जाल्यार पेडणें पालिकेन 408 सुण्यांचें निर्बिजीकरण केलां. पूण हे खातीर सरकारा कडल्यान तांकां एकय दुडू येवंक ना. जाल्यार सांगे पालिकेन कुडचडें अॅनिमल वेल्फेर ट्रस्ट हांचे वांगडा कबलात करून फक्त 4 सुण्यांचे निर्बिजीकरण केलां आनी हे खातीर रु. 12 लाख सरकारा कडल्यान मंजूर जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
