भांगरभूंय | प्रतिनिधी
मुख्यमंत्री : सांखळे मनयली बिरसा मुंडा जयंती
भांगरभूंय । प्रतिनिधी
सांखळी : सध्याचें सरकार हें अंत्योदय तत्वाचेर काम करता. वनहक्क कायद्या खाला आतां मेरेन सुमार 4 हजार दावेदारांचीं प्रकरणां हाता वेगळीं करपाक शकलें. येता त्या वर्सांत अश्या वनहक्क कायद्या खाला सगळ्या दावेदारांची प्रकरणां हाता वेगळीं करून तांकां न्याय्य हक्क दिवपाचो निश्चेव सरकारान केला, अशें मुख्यमंत्री डॉ. प्रमोद सावंत हांणी सांगलें. आदिवासी कल्याण संचालनालय आदिवासी संशोधन संस्था गोंय सरकार तशेंच केंद्रीय वन जीवन कार्य मंत्रालय हांच्या जोडपालवान आयोजीत भगवान बिरसा मुंडा हांचे 150 वे जयंती निमतान संमेलन आयोजीत केल्लें. ह्या संमेलनात मुख्यमंत्री डॉ. सावंत उलयताले. तांचे वांगडा माचयेर कला आनी संस्कृती मंत्री रमेश तवडकार, मयेंचे आमदार प्रेमेंद्र शेट, जिल्हो पंचायत वांगडी गोपाळ सुर्लकार, महेश सावंत, खात्याचे संचालक निलेश घायकोणकार, रवींद्र भवनाचे उपाध्यक्ष दत्ताराम चिमुलकार हाजीर आशिल्ले.
फाटलीं कितलीशींच वर्सां आपल्या हक्का खातीर जगपी आदिवासी समाजाक खरो न्याय सत्तेर आशिल्ल्या भाजप सरकारानूच दिला. तांकां हें समाधान मेळोवन दिवपाक आपलें योगदान लाबलें, ही आपले खातीर समाधानाची गजाल. केंद्र सरकारान तशेंच प्रधानमंत्री नरेंद्र मोदी हांणी ल्हान समाजा खातीर व्हड कामगिरी करतना ह्या समाजाक सगले तेरन न्याय्य हक्क मेळोवन दिवचे खातीर केल्ल्या यत्नांक लागून आयज हो समाज हेर समाजा वांगडा मुख्य प्रवाहांत येता. हें चित्र फक्त गोंयांतूच न्हय जाल्यार पुराय देशांत दिसता, अशें मुख्यमंत्र्यान सांगले.
देशांत पयलेच खेपे प्रधानमंत्री मोदी हांणी ह्या देशा खातीर तशेंच आपापल्या समाजा खातीर व्हड योगदान दिल्ल्या तशेंच विसर पडिल्ल्या फुडाऱ्यांचो उगडास तेचवरी तांचो वावर समाजा मुखार आनी देशा मुखार हाडपाचे यत्न केल्यात. हेच संकल्पनेंतल्यान आयज भगवान बिरसा मुंडा हांचें चित्र देशा मुखार येता. फक्त 25 वर्सांची जीण जगून उदक, रान हाचे खातीर संघर्श केल्ल्या तशेंच तेन्नाच्या ब्रिटीश राजवटी आड झुजिल्ल्या बिरसा मुंडा हांचो वावर आनी योगदान हें देशा खातीर प्रेरणा दिवपी आसा. तांच्या वावराची प्रेरणा देशभरांतले युवा पिळगेक जावची हे खातीर प्रधानमंत्री मोदी वावर करतात. आयच्या तरणाट्यांनी नाविन्यपूर्ण, तंत्रज्ञान, संशोधन आनी कुशळटाय हीं सुत्रां आपणायतना विकसीत भारत साकारपा खातीर आपलें योगदान दिवचें, असोय उलो मुख्यमंत्री डॉ. सावंत हांणी मारलो.
केंद्र सरकारान पुराय देशभरांत केल्ली बिरसा मुंडा जयंती निमतान केल्ली जागृती आनी सगल्या राज्यांक तांचो वावर आनी योगदान लोकां मुखार हाडपाची केल्ली सुचोवणी हाका लागून आयज तांच्या वावराचो भोवमान सगले कडेन जाता. पोरूं गोंयांत जाल्ल्या कार्यावळींचो भोवमान केंद्र सरकारा वतीन केलो. पुराय देशांत गोंयांत सादर जाल्ल्यो कार्यावळी पयल्या नंबरा वयल्यो आशिल्ल्यो. असो पुरस्कार गोंय राज्याचो देश पांवड्यार जालो. ह्याच वावरांतल्यान प्रेरणा घेवन गोंयांत अशेच तरेच्या वावरांतल्यान ल्हान समाजाच्यो समस्या सोडोवचे खातीर केंद्र सरकारा वतीन चालीक लायिल्ले ‘आदी कर्मयोगी’ हे संकल्पनेंतल्यान देशभरांतल्या ल्हान समाजाक वयर काडपाचें काम करतले, अशें मंत्री रमेश तवडकार हांणी सांगलें.
आमदार प्रेमेंद्र शेट हांणी सांगलें, भगवान बिरसा मुंडा हांणी आपल्या समाजा वयलो अन्याय्य पयस करचे खातीर केल्लो संघर्श हो अभिमान दिसपा सारको आसा. तांच्या संघर्शांतल्यान तांणी दिल्लें बलिदान हें आमकां आमचें सैम, उदकां जिवीत आनी जैवविविधताय सांबाळपा खातीर उर्बा दिता. ह्या वेळार मुख्यमंत्री डॉ. प्रमोद सावंत हांचे हस्तुकीं दिवचल म्हालांतल्या विवीध मळांचेर भरीव योगदान दिवपी मानेस्तांचो सत्कार केलो. सिद्धी उपाध्ये हांणी सुत्रसंचालन केलें जाल्यार गोपाळ सुर्लकार हांणी उपकार मानले. ह्या उपचारीक कार्यावळी उपरांत विवीध लोककला आनी लोक संस्कृतीचें दर्शन घडोवपी सांस्कृतीक कार्यावळी जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
