भांगरभूंय | प्रतिनिधी
बळिश्ट बायलेक खबर आसता, तिचे कडेन जिविताच्या प्रवासाक फावो तें बळगें आसा, पूण बळगें आशिल्ले बायलेक खबर आसता ती प्रवासांत खंय बळिश्ट जातली तें.
“यशस्विनी 2023” हो बायलपणाची भावना मनोवपा खातीर आयोजित केल्लो कार्यक्रम. गोंयभरांतल्या सगळ्या आपमजत गटांच्या बायलांक आपली प्रतिभा दाखोवपाची, आपल्यो जिणेच्यो काणयो सांगपाची आनी तांकां आपलीं मतां उक्तावपाची माची दिवपाची ही संद आशिल्ली. यशस्विनी ही एक बायल, जी पारंपारीक नेम आनी रूढिवादांक लागून आडखळ ना. आत्मनिर्भर जावपा वांगडाच हेर बायलांकय तशें करपाक आनी समाजांत योग्य आनी न्याय्य आशिल्ल्या गजालीं खातीर आनी नांवानच स्पश्ट केल्ल्या प्रमाण “यशस्वी जावप” अशें करपाक प्रेरणा दिता.
आमचे कडेन वेगवेगळ्या कुटुंबीक आनी समाजीक फाटभूंय आशिल्ल्यो बायलां आसात, जांणी आपले कश्ट, उर्बा दिवपी कथा आनी अविश्वसनीय प्रतिभा सांगल्यो. आमचे कडेन स्वताची रिक्षा चलोवपी बायलो आसात. सफाई वॉरियर हें नांव सार्थ करपी बायलो आसात. जिणें गांवाक कोयर वेवस्थापनाचे मोल शिकयलें. ताची तांकां ताची संवय केली. मांव, मायन आदार दिल्ल्या बायलांच्यो काणयो आशिल्ल्यो, दुख्खाच्यो काणयो ते धाडसी काणयां मेरेन.
मिस यशीस्विनी 2013 ची जैतिवंत वर्षा नायक, तिचे फाटल्यान प्रगती नायक, शिल्पा वांतेकार, आनी नंदा जांबोटकार आशिल्लीं.
गोवा उदरनिर्वाह मंचान गोवा राज्य उदरनिर्वाह मिशन (जीएसआरएलएम), नॅशनल बँक फॉर एग्रीकल्चर अँड रुरल डेव्हलपमेंट (नाबार्ड), सेंट्रल ब्युरो ऑफ कम्युनिकेशन, जेसीआय मापुसा, सी 20 इंडिया आनी जी 20 हांच्या पालवान ही कार्यावळ घडोवन हाडली.
ह्या कार्यक्रमाक 800 परस चड मजत गट बायलो वांटो घेतल्यो. सुलक्षणा सावंत पुरस्कार समारंभाक मुखेल सोयरी आशिल्ली. तिणें आयच्या बायलांक स्वतंत्र जावप, उद्देजक जावप, आनी अर्थीक शिक्षण घेवप, पोशक अन्न खावप, बरी भलायकी सांबाळप कितलें म्हत्वाचें आनी कशें एक बायलेक फकत आपलें जिवीत न्हय तर आपल्या भोंवतणच्या सगळ्यांचें जिवीत बदलपाची तांक आसता, तें सांगलें. स्नेहा भागवत, आशा आरोंदेकार, आशा वेर्णेंकार, प्रेरणा पावसकार, हर्ष नायक आनी निकिता गुप्ता हांणीय उलोवप केलें.
वर्षा नायक हांणी कड्डणां एक पोशक अन्न म्हूण आनी बायलांचो तांचो उत्पन्नाचो स्रोत वाडोवपाक तीं कशीं मदत करूंक शकता हाचेर विचार मांडले. नामनेची गायिका हेमा सरदेसाय हांणी उर्बाभरीत विचार मांडून बायलांक मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
