भांगरभूंय | प्रतिनिधी
खबरां संस्था
चेन्नय : पाकिस्तान जिखून आयल्या उपरांत आत्मविस्वास मळबाक तेंकिल्ल्या बांगलादेशाक भारतान 280 धांवड्यांनी हारोवन जमनीर हाडलें. 2 टॅस्टींचे माळेंतल्या पयल्या टॅस्टींत भारतान बांगलादेशाचेर 280 धांवड्यांनी दणदणीत जैत जोडलें. 515 धांवड्यांचें महाकाय आव्हान घेवन मैदानार देंविल्ले बांगलादेश 234 धांवड्यांचेर ज्याम जालो. पयल्या डावांत जबरदस्त शेंकडो काडपी आनी दुसऱ्या डावांत 6 विकेटी घेवपी अश्टतासी रवीचंद्रन आश्वीन मॅन ऑफ दी मॅच थारलो.
भारताक जैता खातीर 6 विकेटींची गरज आशिल्ली. आयतारा सकाळींच बांगलादेशाचो खेळ खल्लास करून भारतान संवसारीक वस्तादपण जोडपा दिकेन भक्कम पावल घालें. पयलो वरभर बांगलादेशान वेवस्थीत खेळून काडलो. मात, उपरांत आश्वीन आनी जडेजा मुखार कांय वेळांतूच बांगलादेशाचो खेळ आटापलो. तांच्या नजमुल होसेन शांतोन 82 धांवड्यो काडल्यो. शाकिबान 25 धांवड्यांचें योगदान दिलें.
ह्या जैतान भारतान टॅस्ट चँपियनशीपींतली आपली सुवात आनीक घटमूट केली. पयल्या सुवातेर आशिल्ल्या भारताची आतां 71.67 पीसीटी अॅव्हरेज जाल्या. जाल्यार दुसरे सुवातेर आशिल्ल्या ऑस्ट्रेलियाची 62.50 अॅव्हरेज आशा. पाकिस्ताना आड जिखून चवथे सुवातेर पाविल्ले बांगलादेश सव्या सुवातेर घसरलें.
आतां दुसरी टॅस्ट मॅच शुक्रारा 27 सप्टेंबरसावन सुरू जातली.
ह्या मॅचींत नेटान कमबॅक करतले म्हूण बांगलादेशाचो कॅप्टन नझमुलान विस्वास उक्तायला. फाटल्यां कांय माळेंत बॉलर बरी कामगिरी करतात. बॅट्समॅन आतां बरी कामगिरी करतले, अशी आस्त ताणें उक्तायलीं.
टॅस्टी खातीर तयारी म्हत्वाची : रोहीत शर्मा
आमी कितल्या तेंपान टॅस्ट मॅच खेळ्ळें. मॅची पयलीं 7 दीस आदीं आमी हांगां आयिल्लें, अशें भारताचो कॅप्टन रोहीत शर्मा हांणें म्हणलें. ऋषभ पंत हो अव्वल दर्जाचो खेळगडो आसा. मदीं ताचो वायट काळ आयिल्लो. मात, ताणें येसस्वी पुनरागमन केलें. वर्ल्ड टी-20 कप जिखलो आनी आतां टॅस्टींत ताणें जबरदस्त शेंकडोय ठोकलो. आश्वीन हो आमच्या खातीर सदांच मोलादीक खेळगडो आसा. आयपीएल आनी तामिळनाडू प्रीमियर लीगाक लागून ताच्या बॅटिंगेंतूय सुदारणां जाल्या, अशेंय रोहीत उलयलो.
जडेजा बरोबर सर्त ना, इश्टागत आसा : आश्वीन
रवींद्र जडेजा बरोबर 4-5 वर्सां पयलीं सर्त आशिल्ली अशें म्हणूं येता. पूण आतां तशें ना. जशें आमी सुजाण जाता तशें सर्त ही गजाल दुय्यम थारता. जडेजा आनी हांव बरें इश्ट आशा. खेळा वेळार आमी जोडयेन काम करता. बॅटिंगे वेळार ताचो सल्लो खुपूच मोलादीक आसता. फाटल्या चारेक वर्सांचो रिकॉर्ड पळयल्यार जडेजा संवसारीक पांवड्यार एक बरो बॅट्समॅन म्हूण स्पश्ट जाता. ह्या टॅस्टींत म्हज्या शेंकड्यांत ताचो मोलादीक वांटो आसा, अशें आश्वीनान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
