वर्ल्ड कप ट्रॉफी घेवपाक नाचत कित्याक गेलो?

भांगरभूंय | प्रतिनिधी

प्रधानमंत्री नरेंद्र मोदी हांचो रोहीत शर्माक प्रस्न

टी-20 वर्ल्ड चँपियन टिम इंडियाची मोदीं बरोबर हांसत-खेळत गजाली

वर्ल्ड कप ट्रॉफी घेवपाक नाचत कित्याक गेलो? प्रधानमंत्री नरेंद्र मोदी हांणी रोहीत शर्माक प्रस्न विचारलो. टिम इंडिया प्रधानमंत्री मोदी हांकां मेळपाक गेल्ले. तेवेळार प्रधानमंत्र्यान टिम इंडिया बरोबर हांसत-खेळत गजाली केल्यो. तेवेळार रोहीत शर्माच्या आयकॉनीक चलपाविशीं, नाचत वचपाविशीं तांणी प्रस्न केलो. तशेंच ही चहलाची कल्पना काय कितें? असो प्रस्नूय केलो.
वर्ल्ड कप जिखलो, सपनपूर्ती जाली, तेन्ना ट्रॉफी घेवपाक हरशीं चलता तसो वचूं नाका म्हूण चहल आनी कुलदीपान सुचयिल्लें. तेन्ना असो गेलो म्हूण रोहीत शर्मान जाप दिली.
मॅच जिखल्या उपरांत मैदाना वयलीं माती कित्याक चाखली? असो प्रस्नूय मोदी हांणी केलो. वर्ल्ड कप जिखपाचो खीण खुबूच मोलादीक असो आशिल्लो. ह्यो यादी, तशेंच हो इतिहासीक खीण दिवपी मैदानाचो एक अंश हांव म्हज्या बरोबर सांसणाचो दवरूंक म्हूण हांवें मैदानाची माती चाखली, अशी रोहीतान जाप दिली.
विराट कोहलीन फायनलींतलो आपलो अणभव सांगतना म्हणलें, ह्या सर्तींत फायनलींत पावमेरेन म्हजो खेळ जावंक ना. तेन्ना फायनलींत बॅटींग करपाक वतना म्हाका जाय तसो खेळ जातलो कांय ना असो दुबाव येतालो. मात, जेन्ना हांवें सुरवेकूच दोन फोरी मारल्यो तेन्ना हो कसलो खेळ काय म्हूण मनांत प्रस्न आयलो. फुडें पंगडाक साल्वार करपाच्या नदरेन खेळ केलो आनी जायत गेलो.