भांगरभूंय | प्रतिनिधी
खबरां संस्था
लखनौः दोन मॅचींत हार घेतल्या उपरांत ऑस्ट्रेलियेन वन-डे वर्ल्ड कप सर्तींतल्या आपल्या पयल्यान जैताची नोंद करतना श्रीलंकेक 5 विकेटींनी हारयलें. मार्कस स्टोयनिसान सको हुबोवन पंगडाच्या जैताची म्होर लायली. लखनौच्या इकाना स्टेडियमार श्रीलंकेक 209 धांवड्यांत गुठलायल्या उपरांत 35.2 ओव्हरींत जैताचें लक्ष्य हातासले. ओपनर मिचेळ मार्श आनी जोस इंग्लिस हांणी अर्द शेकडे करून जैताची बुन्याद घातली. एडम झम्पान 4 श्रीलंकेच्यो चार विकेटी घेवन ह्या जैतांत म्हत्वाचें योगदान दिले.
मार्नस लाबुशेन (40), ग्लॅन मॅस्कवेल (नाबाद 31) आनी स्टोयनिस (नाबाद 20) हांणी ऑस्ट्रेलियेच्या जैताची गुडी लायली. इंग्लिसान आपल्या वन-डे कारकिर्दींतलो दुसरो अर्द शेंकडो जाल्यार वर्ल्ड कपांतलो पयलो अर्द शेंकडो केलो. 59 बॉलांत 5 चौके आनी एका सक्यान ताणे 58 धांवड्यो केल्यो. जैताच्या सामक्या लागीं आसतना ताणे आपली विकेट दिली.
मिचेळ मार्श आवट जातगीर लाबुशेन आनी इंग्लिसान चवथे विकेटी खातीर अर्द शेंकड्याची भागिदारी करून पंगडाच्या जैताचें मुळावण घातलें. तांणी 86 बॉलांत 77 धांवड्याची भागिदारी केली आनी तीच निमाणे निर्णायक थारली. दिलशानान लाबुशेनाक आवट करून ही जोडी फोडली. मार्शान वन-डे वर्ल्ड कपांतलो आपलो पयलो अर्द शेंकडो केलो. वन-डे कारकिर्दींतलो ताचो व्हो 18वो अर्द शेंकडो आसा. ताणे 51 बॉलांत 9 चौक्यांनी 52 धांवड्यो केल्यो. श्रीलंके खातीर दिशान मदुशंकान 38 धांवड्यांत 3 आनी वेल्लालेगान एक विकेट घेतली. मार्श रनआवट जालो.
लंकेन दिलें 210 धांवड्याचें लक्ष्य
श्रीलंकेचो कॅप्टन कुसल मेंडीसान टॉस जिखून पयली बॅटिंग करपाचो निर्णय घेतलो. बरी सुरवात केल्या उपरांत तांची घसरगुंडी जाली आनी 43.3 ओव्हरींत 209 धांवड्यांत तांचो डाव सोपलो. पथुम निसांकाच्यो 61 आनी कुशल परेरान केल्ल्या 78 धांवड्याक लागून श्रीलंका पंगड 209 धांवड्यो करपाक शकलो. चरीथ असलंकान 25 धांवड्यांचें योगदान दिलें. बाकीचे बॅट्समन विशेश कांय करपाक शकले नात.
ऑस्ट्रेलिये वतीन एडम झम्पान 4 विकेटी घेतल्यो कॅप्टन पेंट कमिन्स आनी मिचेल स्टार्कान दरेकी दोन विकेटी घेतल्यो. ग्लॅन मॅक्सवेलाक एक विकेट मेळ्ळी. श्रीलंकेच्या डावांतल्यो 32.1 ओव्हरी घालून जाल्ल्यो तेन्ना पावस पडपाक सुरवात जाली आनी खेळ थांबोवचो पडलो. सुमार अर्द वर वाट पळल्या उपरांत खेळ सुरू केलो. मात ओव्हरी कमी केल्यो नात. स्पीनर एडम झंम्पान श्रीलंकेच्या मदले फळयेंतल्या बॅट्समनाक सतायलें,
कुसल परेरान 78 धांवड्याची खेळी केकली. ताणे आपल्या वन-डे कारकिर्दींतलो 16वो अर्द शेंकडो केलो. 82 बॉलांत ताणे 12 चौके आनी 95.12 स्ट्रायक रेटान धांवड्यो काडल्यो. श्रीलंकेचो ओपनर पथुम निसांकान वन-डे कारकिर्दींतलो 11वो अर्द शेंकडो केलो. ताका 61 धांवड्यांचेर कॅप्टन पॅट कमिन्सान डेव्हीड वॉर्नरा वरवी कॅच आवट केलें. पथुम निसांका आनी कुसल परेरान श्रीलंकेच्या डावाची सुरवात सामकी बरी केली. ताणी 130 बॉलांत 125 धांवड्यांची सलामीची भागिदारी केली. पॅट कमिन्सान ही जोडी फोडली. 10 ओव्हरींच्या पॉवर प्लेत श्रीलंकेच्या ओपनरांनी 51 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
