भांगरभूंय | प्रतिनिधी
भुमिका देवस्थान 24 डिसेंबर मेरेन बंद दवरपाचो आदेश
भांगरभूंय । प्रतिनिधी
वाळपयः पर्येंच्या भुमिका देवस्थाना कडेन संलग्नीत आशिल्ल्या सांखळेश्वर देवस्थानाच्या वर्धापन दीस मनोवपाच्या कारणा वयल्यान वाद निर्माण जाले उपरांत त्या वाठारांत तणावाची परिस्थिती निर्माण जाली. ह्या देवस्थानाचो वर्धापन दीस सगळ्या 12 म्हाजनांनी मनोवचो असो आदेश सत्तरी उपजिल्होधिकाऱ्यान दिल्लो. तरी लेगीत माजीक ह्याच गटान फांतोडेर हो विधी केल्ल्यान गांवकार म्हाजन गटान हाका खर हरकत घेतली. आदेश मोडिल्ल्यान तांचेर गुन्यांव दाखल करचो आनी तांकां अटक करची, अशी मागणी करून गांवकार म्हाजन गटान सत्तरी उपजिल्होधिकारी कार्यालया मुखार निदर्शनां केलीं.
सत्तरी उपजिल्होधिकारी आयएएस पल्लवी हांणी सांखळेश्वर देवस्थानाची पळोवणी करपाचो निर्णय घेतलो आनी राती उसरां तांणी पुलीस निरिक्षक विदेश शिरोडकार हांचे सयत प्रत्यक्ष भेट घेवन परिस्थितीची पळोवणी केली. तणावाची परिस्थितीचो अभ्यास करून तांणी 21 आनी 23 डिसेंबराक जावपी धर्मीक सप्ता आनी गवळण कालो बंद दवरपाचे निर्देश दिले. तशेंच 24 डिसेंबर मेरेन भुमिका देवस्थान बंद दवरपाचो आदेश दिला.
सगळ्या म्हाजनांक घेवन सांखळेश्वर देवस्थानाचो वर्धापन दीस मनोवचो असो आदेश उपजिल्होधिकाऱ्यान दिल्लो. ते खातीर 19 डिसेंबरच्या राती सावन थंय पुलीस बंदोबस्त दवरपाची गरज आशिल्ली. मात पुलीस यंत्रणा ह्या कामांत उणी पडली, असो आरोप गांवकार म्हाजन गटा वतीन संजय गांवकार आनी भिसो गांवकार हांणी केलो. जे मेरेन संबंदितांचेर गुन्यांव दाखल जायनात ते मेरेन सुवाते वयल्यान हालचे नात, अशीय तांणी शिटकावणी दिली.
भुमिका देवस्थानाचे म्हाजन आनी सेवेकरी हांचे मदीं फाटल्या कितल्याश्याच वर्सां सावन वाद चल्ला. हाका लागून सुमार दोन म्हयन्यां आदीं भुमिका देवस्थानाच्या प्राकारांत नव्यान बांदिल्ल्या तुळस उजोवपा वयल्यान हो वाद चड वाडिल्लो. आतां सांखळेश्वर देवस्थानांतल्या वर्धापन दिसा निमतान परतून वाद निर्माण जाला.
गुंडे शेंवटिल्ल्यान उपनिरिक्षक जखमी
रातीं उसरां देवस्थानाच्या प्राकारांत व्हड प्रमाणांत संबंदीत म्हाजन गटाच्या भाविकांनी धुमशेण कांडलें. भुमिका देवस्थान बंद दवरपाचो दिल्लो आदेश तत्काळ फाटीं घेवचो आनी ज्या चार जाणांचेर गुन्यांव दाखल केल्यात ते रद्द करचे, अशी मागणी आंदोलकांनी केली. देवळाच्या वाठारांत तणावाची परिस्थिती निर्माण जाली. ह्या वेळार कांय जाणांनी गुंडे शेंवटिल्ल्यान पुलिसां मुखार लेगीत प्रस्नचिन्न उपस्थीत जालें. पुलीस थंयच्यान गेले, अशी म्हायती मेळ्ळ्या. मजगतीं, फातर शेंवटिल्ल्यान एक उपनिरिक्षक जखमी जालो. मजगतीं, सांखळी केरी हो बेळगांवां वचपी म्हामार्गार उजो घालून तो आडावपाचो यत्न केलो, पूण तो पुलिसांनी येसस्वी जावंक दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
