भांगरभूंय | प्रतिनिधी
पुलीस हे लोकांच्या रक्षणा खातीर आसतात. लोकांक मार- बडय करपा खातीर न्हय.
फाटल्या सप्तकांत मदुराय न्यायालयान तामिळनाडूंतल्या सथानकुलमांतल्या बापूय आनी पुताक पुलीस कोठडेंत मारिल्ल्या प्रकरणांत एक म्हत्वाचो निवाडो दिलो. हातूंत दोशी थारिल्ल्या णव पुलिसांक न्यायालयान मरण ख्यास्त फर्मायली. ह्या निवाड्यान ‘मनीस अधिकार’ जिवे आसात अशी एक आशा दाखयल्या.
बापूय जयराज हांकां कोविडाच्या काळांत ताणें तांचें दुकान सरकारान घालून दिल्ल्या वेळा परस चड वेळ उक्तें दवरिल्लें असो आरोप करून पुलिसांनी ताब्यांत घेतिल्लो. बापायक ताब्यांत घेतला म्हूण कळटकच पूत बेनिक्स पुलीस स्टेशनाचेर पावतकच आपल्या बापायक पुलीस मारतात तें पळोवपाक मेळ्ळें. ते खातीर ताणें पुलिसांच्या कृती आड आवाज काडलो. ते उपरांत पुलिसांनी ताकाय ताब्यांत घेतलो आनी बरोच बडयलो. कसलेंच मनीसपण दवरनासतना, कायद्याक पाळो दिनासतना आनी दादागिरी करून ह्या पुलिसांनी तांकां दोगांकूय इतले बडयले की ते दोगूय बापूय आनी पूत संवसाराक अंतरले.
ही केस सीबीआयक दितकच तांणी तपास सुरू केलो आनी जयराजान कोवीड लॉकडावनाचे नेम भंग करूंक नाशिल्ले अशें न्यायालयाक सांगलें. ‘पुलिसां वांगडा कशें वागचें’ हो धडो शिकोवपा खातीर पुलिसांनी तांकां मारपाचें कटकारस्थान रचलें अशें सीबीआयन न्यायालयाक पटोवन दिलें.
तांकां मारतकच घावे जाल्ले. ताचें रगत लेगीत पुसपाक पुलिसांनी तांकांच सांगलें आनी दुसऱ्या दिसा सकाळीं एका कामगाराक कामाक लावन पुलीस कोठडेंतलें पडिल्लें रगत पुसून पुरावे नश्ट करपाचें काम ह्या पुलिसांनी केलें. हे सगळेच धा पुलीस आशिल्ले. हातूंतलो एकलो पुलीस कोवीड काळांत मेलो.
2020 वर्सा घडिल्ल्या ह्या प्रकरणांत न्यायमूर्ती मुथुकुमार हांणी सगळ्या णव दोशी पुलिसांक मरण ख्यास्त फर्मायली आनी जयराजाच्या कुटुंबाक 1.40 कोटी रुपया लुकसाण भरपाय दिवपाचो आदेश दिलो. सीबीआयन हो तपास बरे तरेन मुखार व्हरून आनी सगळे पुरावे एकठांय करून जयराजाच्या कुटुंबाक न्याय मेळोवन दिलो म्हूण तांकां परबीं फावता.
पुलिसांनी ह्या बापूय आनी पुताची हत्त्या केली असो बोवाळ जातकच, तामिळनाडू भर आंदोलनां जालीं. मनीस हक्काची राखण करपाक वावुरपी लोकांनी आनी संस्थांनी पुलिसांच्या कृत्त्याचेर बोट दवरलें आनी न्यायाची मागणी केली. उपरांत मद्रास उच्च न्यायालयाच्या मदुराय खंडपिठान 24 जून 2020 वर्सा ताची दखल घेतली आनी न्यायालयीन चवकशीचो आदेश दिलो. तशेंच थळावे पुलीस ही केस सदळ करत ह्या हुस्क्यान सीबीआय केसीचो ताबो घे मेरेन ‘सीबी-सीआयडी’क ही केस हाताळपाक लायली. हांगाच्यान हे केसीक न्यायाचें वळण मेळ्ळें आनी फाटल्या सप्तकांत ह्या णव गुन्यांवकारांक मरण ख्यास्त न्यायालयान फर्मायली.
ज्या पुलीस स्थानकाचेर हो सगळो प्रकार घडिल्लो तांणी तपास करपी सीबीआयक सोंपेपणान तपास करपाक दिलो ना. तांणी तांकां आदार केलो ना. उलट कागदपत्रां दिवपाक कळाव केलो. तशेंच सीसीटीव्हीची सांठवण तांक आसून लेगीत तांकां फूटेज ना म्हूण सांगली. हाचे वयल्यानूच पुलिसांचें कृत्य उक्ताडार आयिल्लें. मात एका महिला हेड कॉन्स्टेबलान ते रातीं घडिल्ली गजाल न्यायालयाक खरी- खरी सांगली. अशे कांय बरेय पुलीस आसतात अशें म्हणल्यार अतिताय थारची ना.
फकत स वर्सां भितर हो निवाडो आयिल्ल्यान न्यायालयाक आनी तपास संस्थेक परबीं फावतात. दुसऱ्यांक मरसर मारपी पुलीस अधिकाऱ्यांनी दयेची याचिका बी सादर केल्यार, तांणी जे तरेन ह्या कुटुंबाची जीण पिसडून उडयली, तेच तरेन ती याचिका पिसडून कोयरा पेटयेंत उडोवची अशें हें भयानक कृत्य आशिल्लें.
गोंयांतय अशी एक घडणूक 1994 वर्सा घडल्या, जंय अब्दुल खान हाका पुलीस कोठडेंत मरण आयिल्लें आनी सुमार 23 वर्सां उपरांत दोगा पुलिसांक दोशी थारायिल्ले आनी धा वर्सांची बंदखण फर्मायिल्ली. सर्वोच्च न्यायालयाच्या ह्या निवाड्यांतल्यान थाकाय मेळची म्हूण ह्या पुलिसांनी राज्यपालां कडेन दया याचिका सादर केल्ली.
पुलीस हे लोकांच्या रक्षणा खातीर आसतात. लोकांक मार- बडय करपा खातीर न्हय. गुन्यांवकारांक धरून हाडले जाल्यार लेगीत तांकां मार-बडय करपाचें खंयच बरयिल्लें आसचें ना. तरीय पुलिसांची वर्दी घाल्ले कांय गुंडावृत्तीचे पुलीस कायदो हातांत घेतात. तामिळनाडूच्या लोकांनी जसो बापूय- पूत मरण प्रकरणांत आवाज काडलो तसो, अशा वृत्तीच्या पुलिसां आड आवाज काडपाची गरज आसा. नाजाल्यार गुंड आनी पुलीस हांची रेशा एका समान जातली आनी समाजाक ताचो धोको निर्माण जातलो.
कांय म्हयन्यां फाटीं एक गजाल कानार पडिल्ली की एका गुन्यांवकाऱ्यान एका बऱ्या मनशाच्या घराचेर अतिक्रमण केलां आनी ताका धमकायता. घरधनी कागाळ करपाक गेल्यार उत्तर गोंयांतलो एक पुलीस अधिकारी ताकाच घर सोडपाची धमकी दिता. म्हणल्यार ताका त्या गुन्यांवकारा कडल्यान फायदो आसा हें सिद्ध जाता. अशे तरेचे पुलीस लोकांक न्याय दिवपाक शकतात? काय ते आपलींच बॉल्सां भरपाक पुलीस सेवेंत भरती जातात?
घुंवळी वखदां प्रकरणांत भितर पडून भायर सरिल्ल्या दुबावितां कडेन संवाद सादल्यार, पुलीस कशे तरेन मनीस हक्कांचो भंग करतात आनी कसल्या फायद्या खातीर करतात तें कळटा.
खरें तर पुलीस सेवेची दशा जाल्या. गुंडागिरीचे वृत्तीचे पुलीस अधिकारी पुलीस सेवेचें नांव पिड्ड्यार करपाक लागल्यात. तांकां जाग्यार घाले ना जाल्यार समाजाक ताचो धोको तयार जातलोच, तेच बराबर लोकांचो पुलिसांचेर इल्लोसो आशिल्लो विस्वास मातयेभरवण जातलो.
स म्हयन्यां फाटीं नावेलीच्या ॲडबर्ग परेरा ह्या तरणाट्याचेर पुलीस स्थानकाचेर कसो हल्लो जाला तो गोंयच्या लोकांनी पळयला. पुलिसांचे चुकीक लागून ताका हॉस्पिटलांत त्रास काडचे पडले? ताचे बराबर ताच्या कुटुंबाकूय हे त्रास आयज मेरेन जातात. अशा प्रकरणांनी घुस्पल्ल्या पुलिसांचेर कारवाय जावंक जाय, नाजाल्यार दरेक ‘गुंडा’ वृत्तीचो पुलीस कायदो हातांत घेतलो आनी लोकांक त्रास करतलो.
राजकी फुडाऱ्यांच्या पावरान छाती फुलोवन पुलिशेची परिक्षा पास जाल्ल्या अशे वृत्तीक कायद्याचो भंय दाखोवप गरजेचो. नाजाल्यार आपल्याक कामाक लायिल्लो फुडारी आपल्याक दरेक प्रकरणांतल्यान सोडयतलो म्हूण तो गुन्यांवाचेर गुन्यांव करीत रावतलो.
दोन वर्सां आदीं फोंडें पुलिसांनी ज्या बिगर गोंयकार कामगाराक मायणा कुडतरी पुलीस स्थानकाच्या कार्यक्षेत्रांत व्हरून सोडिल्लो, तो उपरांत मेल्ले स्थितींत सांपडिल्लो. ह्या प्रकरणांत तिगा पुलिसांक तात्पुरते निलंबीत केल्ले. हो तपास खंय पावला आनी हातूंत पुलीस जापसालदार आसल्यार तांचेर कडक कारवाय केन्ना जातली हें जनतेक कळपाक जाय.
अशा गुंडागिरी प्रवृत्तीचेर कारवाय जावंकच जाय, नाजाल्यार तांकां जल मेळटलें. तांकां ख्यास्त फावो….
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
