भांगरभूंय | प्रतिनिधी
पाश्चात्य देशांत नोकरी करपी लोकां मदीं घरा बसून वावर करप ‘वर्क फ्रॉम होम’ ही कल्पना बरे पैकीं प्रचलीत जाल्या खंय. भारतांत लेगीत कांय प्रमाणांत भोवराष्ट्रीय संस्थांनी ही कल्पना राबयतना दिसतात. जेन्ना कोवीड धामीन ह्या संवसाराक विळखो घालो तेन्ना सावन तिचो आवाठ वाडूंक लागलो तो आयज मेरेन वाडत आसा. बारीक विचार करीत जाल्यार ‘वर्क फ्रॉम होम’ घरांत रावन काम करप, कल्पना वायटशी न्हय. खास करून बायलमनशे खातीर उपेगी थारूंक हरकत ना. नोकरी करतले बायलमनशेक घर आनी ऑफीस सांबाळटना तारे वयली कसरत करची पडटा ती पळयत तर ‘वर्क फ्रॉम होम’ हो पर्याय उपेगी थारूंक शकता. ही कल्पना राबयतल्यांचो तशेंच अशा वेवसायीक संस्थांनी वावुरतल्यांचोय उर्जा, वेळ आनीक पयसो वाटावंक बरोच आदार जावंक शकता. सुमानांतल्यान एक दीस कामार वच्चें बाकीचे दीस घरा बसून काम करचें. ज्या दिसा ऑफिसांत वावुरचें आसता त्या दिसा खातें मुखेल्यान कामाचो नियाळ घेवचो. जंय गरज आसा थंय मार्गदर्शन वा सुचोवण्यो दिवच्यो. गरज उप्रासता तस तशी कचेरीत वचून उरिल्लीं कामां पुराय करूंक मेकळीक दिवचीं. वेगळ्यावेगळ्या खात्यांच्या प्रतिनिधीन लेगीत कामगारांच्यो सुचोवण्यो घेवन त्यो वरिश्ठां मेरन पोवोवच्यो. ही संकल्पना चालीक लायतले जाल्यार सगल्यांनी 100% प्रामाणीक रावन वावुरचें पडटले. हें खूब गरजेचें. जायत व्हय हें शिवधोनू पेलूंक?
धामी वेळार आमी ती स्थिती बरे भशेन पेल्ल्या. खंयचेय परिस्थितींत बरे तरेन वावरूंक शकतात हाची देख घालून दिल्या काय ना. ते भायर ताचे पासून जाल्लो लाव वा लुकसाण आमी पाशिंयेसान भोगलां हातूंत दुबाव ना. गोंयकारां भितर हे पद्दतीन काम करपाची कुवत नाअशी ना. बरे पैकीं कुवत आसाच पूण पिरंगण नासतना वावर हातांत घेत जाल्यार ही पद्दत सहज शक्य जांव येता. आतां सरकारी दरबारांत लेगीत ऑनलायन कामां जावंक लागल्यांत, देखून ही कल्पना लाबाची थारूं येता. उदरगत करून देश मुखार व्हरतले जाल्यार ‘आवट ऑफ द बॉक्स’ वेगळो विचार करूनच वावराक लागूंक जाय. ‘वर्क इज वरशीप’ काम म्हणल्यारच पुजा अशें समजून वावराक लागत तर मना सारकी उदरगत निश्चीत घडोवन हाडूं येता. आनीक एक गजाल निश्चीतपणान करूं येता ती म्हणल्यार गरज उप्रासता तशी आळीपाळीन वेळापत्रकांत बदल करून घेवन तो आपणावं येता. सरकारी दरबारांत कोणांक कोणाचें सोयर सुतक आसना. वळख आनी वशिलो आसत तर कामां जावन पडटात हो समज पयसावपाची गरज आसा. दरेकल्याचें काम वेळार करून दितले असो प्रण करून चालीक लागत तर कांयच अशक्य म्हणटा तें ना. हाचो लाव सामान्य मनशांक जावचो. कारण ह्याच सामान्य मनशांक आपली कामां पुराय करून घेवचे खातीर जोतीं झरयत सरकारी दरबारांत फावटी मारच्यो पडटात. ऑनलायन कामां बरे भशेन जावंक पावलीं जाल्यार भ्रश्टचाराक लगाम घालूं येता.
म्हज्या इश्टाचो चलो खाजगी मळार वावुरता. ताका घराबसून काम करपाची मेकळीक आसा. तो आपलीं सगलीं कामां वेळार पुराय करता. अडी अडचणीक हेरांकय मजत करूंक तत्पर आसता. ते भायर वेगळ्यावेगळ्या धर्मीक वा लग्ना कार्यांत लेगीत न चुकता हाजेरी लायता. उमेदीन जियेता बेचैन जाल्लो हांवें ताका केन्नाच पळयलो ना. तो सांगता ते प्रमाण ‘वर्क फ्रॉम होम’ ही संकल्पना ताका आनीक ताच्या सहकाऱ्यांक मानावल्या. बरी गजाल. पूण तांका बऱ्याक पडल्या म्हूण हेरांकय मानवतली अशातली गजाल मात न्हय ही. एका नाण्याच्यो दोन बाजू आसात, ते प्रमाण हे कल्पनेच्योय दोन बाजू आसूंक जाय अशें म्हाका दिसता. कारण ताचो बापूय जो म्हजो इश्ट अनमनासतना म्हाका ह्या कल्पनेचे बरे तशेच वायट गूण सांगत आसता. केन्ना केन्ना शीण उक्तायत म्हणटा शिक्षकी पेशाक ही कल्पना न्हय आ. तर दुसऱ्याच खिणाक म्हणटा ‘तुमचे आपले बरें बाबा, घांट वाजली रे वाजली साटली पोटली कंवळून धांवत सुटपाचें’ ताच्या त्या उतरांक मात हांव ओगी रावनासतना जाप दितां. घांट वाजले उपरांत धांवपाच्यो गजाली आतां फाटीं पडल्यो इतिहासात जमा जाल्यो. तुर्ताक तरी आमकां ‘वर्क फ्रॉम स्कूल’ आनीक ‘वर्क फ्रॉम होम’ दोनूय करचे पडटा. कारण 2019 उपरांत शिक्षणीक मळार बरोच व्याप वाडला. शिक्षकांक तकली वयर काडूंक मेळना. ते भायर केन्ना कसलो नवो सरकूलर येत हाचो नेम ना.
शाळेंत शिकतल्या भुरग्यांचो नव्यान तपशील धाडात, अमकी म्हायती जाय वा तमकी म्हायती धाडात. ते भायर खंयच्यो खंयच्यो कार्यावळी आयोजीत केल्यो तांतूंत कितल्या भुरग्यांनी वांटो घेतिल्लो. चले कितले चलयो कितल्यो. अशे अनेक संदेश वजा सरकूलर येत आसतात. हिशोब सामको तोंडपाठ आसूंक जाय. घाणाक लायिल्ल्या बैला वरी परिस्थिती जाल्या म्हणल्यार जाता. तीन-चार वर्सां जालीं शाळा, कॉलेजी दोन शिफ्टींनी वावर करतात म्हणल्यार म्हजी चूक जावची न्हय. एके वटेन आमी भुरग्यांक मोबायलाचो उपेग कमी करात, गरजे पुरतोच करात म्हणटात तर दुसरे वटेन सुचना येता विध्यार्थ्यांचे वॉट्सअॅप ग्रूप करात. तांकां त्या त्या विशयाची म्हायती दियात. आयज शिकपी भुरग्यांचे उपक्रम मोबायला बगर करूंक जमना. तांचो वॉट्सअॅप ग्रूप केल्ल्यान ते खंयच्याय वेळार प्रस्न विचारूंक मेकळे, मनांतल्यो शंका विचारूंक मेकळे. कांय प्रस्न अशे आसतात जे आडनदर करूंक शकनात तितलेच उमेदीन जापो दिवच्यो आसता. मागीर आमीय बी तांचे समाधान करतातच न्हय. हातूंत बरोच वेळ वता. ते भायर वेगळ्यावेगळ्या सर्ती खातीर तशेंच सांस्कृतीक कार्यावळी खातीर तांकां तयार करूंक वेळ दिवचोच पडटा.
वयर म्हणिल्ले प्रमाण वर्क फ्रॉम होम सोयिस्कर जावं येता, पूण ताचो गैरफायदो कोणे घेवचो न्हय. दरेकल्यान वेवस्थींत वावर करून ही संकल्पना मुखार व्हरूंक हरकत ना. पूण कारण नासतना वेळा-अवेळार अमकी फायल तपासून पळय. पुराय म्हायती झ्या झ्या धाड, अशें म्हूण फोन येत रावत तर दरेकल्याच्या वेळापत्रकाच्यो तिस्त्यो जावंक कळाव लागचो ना इतलें मात खरें.
एच. मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
