भांगरभूंय | प्रतिनिधी
मुरगांव पालिकेची कारवाय; तीन गाडे जप्त
भांगरभूंय । प्रतिनिधी
मुरगांवः वरुणपुरी राष्ट्रीय म्हामार्गाचेर घातिल्ल्या बेकायदो गाड्यांचेर मुरगांव पालिकेन नगराध्यक्ष लियो रॉड्रिगीज हांच्या मार्गदर्शना खाला कारवाय करून तीन गाडे जप्त केले. ही कारवाय उच्च न्यायालयान दिल्ल्या आदेशा प्रमाण चालूच उरतली, अशी म्हायती नगराध्यक्ष रॉड्रिगीज हांणी दिली.
वरुणापुरीच्या मुख्य जंक्शनाचेर बिगर गोंयकारांनी राष्ट्रीय म्हामार्गाचेर बेकायदो तरेन गाडे घालून आपले वेवसाय सुरू केला. पालिकेचो आदेश आयकनासतना ते बिगर गोंयकार आपलो वेवसाय नेटान चलयतात. हे आदीं पालिकेन खूब खेपे कारवाय केल्या. तरी लेगीत ते परतून थंय आपलो वेवसाय सुरू करतात. मांगोरहील वरुणापुरी हें मुख्य जंक्शन आसा. थंय सकाळच्या आनी सांजेच्या आदेसाक लोकांची तशेंच गाडयांची गर्दी आसता. सकाळीं 7 ते 10 वरां मेरेन थंय दिसवड्याचेर कामाक वचपी कामगारांची गर्दी आसता. सांजे वेळारूय अशेंच चित्र आसता. ह्या गाड्यांचेर विवीध कारणां खातीर गर्दी आसता. ताका लागून एकाद्या वेळार व्हड अपघात जावपाची शक्यताय आसा. फाटल्या म्हयन्यांत एके बायलेक थंय अपघात जावन तिका मरण आयिल्लें. तशेंच ल्हान ल्हान अपघात एकसारके थंय चालूच आसतात. गाडे जरी ल्हान आसले तरी थंय जुगार हे सारके हेर बेकायदो वेव्हार चलतात, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
