वन वे तिकेट टू द मून

भांगरभूंय | प्रतिनिधी

नव्या 2024 वर्साक येवकार, भांगरभूंय दिसाळ्याच्या सगल्या वाचप्यांक नमस्कार. 2023 वर्सा विखुरिल्लीं पत्रपानां माळेंतल्यान 35 पानां जोडटना अदीं मदीं पुस्तक जाय अशी मागणी येताली. माळ गुंथप थांबय, पुस्तकाची रोखडी बांदावळ कर अशेंय मायेन सांगपी पत्रकार भाव, भयणी, वळखीचीं आसात. विसव घेतकच कित्याक थांबलां? पणजे साबार कडेन खणून दवरलां, खणटना सगल्यां खातीर तुमकां, आमकां परतून डायरेक्ट चंद्रार हें गीत आयकूंक मेळत? अशे विचारपीय आशिल्ले.
लोकसभेची तिकेट केंद्रीयमंत्री श्रीपाद (भाऊ) नायक हांकां मेळटली काय ना सांग, तांकां ना जाल्यार 2024 क उत्तर गोंयांतल्यान कोणाक मत ना हो निश्चेव करपीय येतले. माफ करात, आमकांय भाऊंनी आतां विसव घेवचो अशें दिसतालें. सात- आठ म्हयन्याआदीं तसो विचार मेकळेपणान मांडिल्लो. एकादरे त्या विचारांतल्यान तिकेट, तिकेट, तिकेट म्हणपाचो म्हाका, तुका अधिकार आसा ही इत्सा परगटावपी फुडें सरले. तिकेट न्हय उमेदवारी मागात, उत्तर आनी दक्षिणेंतल्यान हें नव्यांक सांगचें पडटलें. तिसरो जिल्लो, पूर्व, पश्चिम लागीं आसा, भिवपाची गरज ना हीं उतरां रोखडींच आतां घराघरांनी पावतलीं.
एक गजाल खरी, श्रीपादभाऊंक पर्याय तयार जावंक लागले तेन्ना ताका, तुका, म्हाका करचेपरस भाऊच बरे असो आवाज उत्तर, दक्षिणेंतल्यान येतलो हेंय तितलेंच सत. मुख्यमंत्री डॉ. प्रमोद सावंत हांणी भाऊंचे उमेदवारीची घोशणा केल्ली ती वगीच?
तांचें मत भोव मोलाचें. भाऊंच्या कामकाजाची मोलावणी जातलीच, तांची पक्षनिश्ठा, अणभव वेंचून येवपाची तांक जोखपीय आसतले, भितल्ले आनी भायलेय.
गोंयांक राज्य पावंडो मेळटकच लोकसभेचें राजकारण कशें घुंवलें? भाऊ, भाई, अण्णा लोकसभेर कशे पावले? दक्षिणेंतल्यान येवन उत्तरेंतल्यान आदले खासदार शांतारामबाब नायक कशे जिखले? उत्तरेंतल्यान दक्षिणेंत माजी खासदार इराज्म सिकेर जैतवंत जाले कित्याक ? खासदार फ्रान्सिस सार्दिन परतून निमाणे कडेन वन वे तिकेट टू द मून म्हण्टले? जापो सोदूया, म्हायती मेळोवया हे माळेंतल्या विखुरिल्ल्या पानांनी.
भेस, भास, जात, धर्म वेंचणूक लागीं येतकीच तेंगशेर पावता. धर्म, जात कुशीक दवरप शक्य आसा? अयोध्येचें नवें राममंदिर, रामलल्ला ती वाट दाखयत? भारतांतच न्ही, हेर राष्ट्रांनीय जाताच न्ही कातीचें राजकारण. हें हालींच्या वेंचणुकांनी दिसपाक लागलां. सर्तींत देंवून वेंचून आयिल्ल्या राष्ट्राध्यक्षांक राजिनामे त्या राजकारणांतल्यान दिवचे पडल्यात. राजिनामांतल्यान परत्यो वेंचणुको, खर्चांत उदरगत शेणटा, उदरगती खातीर गरज आसा स्थैर्याची.
साडेतीन दसकांचे पत्रकारितेंत लागीं सावन पंतप्रधान, राष्ट्रपतींक पळोवपाची संद मेळ्ळी. ते दीस आयज ना, ताई, माई, अक्काय ना पूण तिकेट, तिकेट, तिकेट खातीर सर्त आसा. यादी आनी सर्ती पयलींय आशिल्ल्यो. त्यो आयकूया,
वाचूया ही माळ गुंथतना. अंदूं लोकसभेर वचपाक गोंयची एकय बळिश्ट अस्तुरी नासतली? आसल्यारय ती पत्रकारांक दिसना आसूंये.
उमेदवारी मेळोवपाची इत्सा आशिल्ल्यांक ती कित्याक दिसची न्हय? शिक्षणान ती ताचेपरस फुडें पावल्या म्हणून? तीय वन वे तिकेट टू द मून गीत म्हणत? गीतांचेय आयज रिमेक, रिमीक्स जातात.
रामाचे अयोध्येक संजीवनी दिवपी उत्तर प्रदेशचे मुखेलमंत्री योगी आदित्यनाथ फुडारांत पंतप्रधानपदाचें सर्तींतले एक. तांच्या उपरांत आनीकय योगी राजकारणात येवपाक
लागल्यात, रामदेवबाबा लोकसभेर
वतले व्हय? तिकेट, तिकेट, तिकेटींची सॉरी उमेदवार यादीचीं पानां आतां कंप्युटरार घालत जाल्यार तीं फाल्यां बदलचींना?
आसतल्योच काश्मीर ते कन्याकुमारी, शिर्डी ते अयोध्ये मेरेन. रेवड्यो आसल्यारुय विकत्यो घेवन खावप बऱ्यो. गोंयच्यान कोण वतले? येतले? वाचूया ह्याच पानांनी. तुमीय सांगात, अडचणी, अरिश्टांय.

सुहासिनी प्रभुगांवकार
9881099260