भांगरभूंय | प्रतिनिधी
नवी दिल्ली, खबरां संस्था: ’वन नेशन, वन इलेक्शन’ हें विधेयक सोमारा म्हळ्यार १६ डिसेंबराक लोकसभेंत मांडचे नात. हे संबंदीचीं दोनूय विधेयकां लोकसभेचे सुदारीत वळेरेंतल्यान काडून उडयल्यांत. हाचे पयलीं १३ डिसेंबराच्या कॅलेंडरांत सोमारा हें विधेयक लोकसभेंत मांडटले अशें सांगिल्लें.
सुत्रांनी दिल्ले म्हायती प्रमाण अर्थीक वेव्हार पुराय जातकच हें विधेयक सभाघरांत मांडटले. पूण लोकसभेच्या अध्यक्षाचे परवानगे उपरांत सरकार हें विधेयक निमाण्या खिणाक पुरवणी वळेरे वरवीं सभाघरांत मांडपाक शकतात. मंत्रीमंडळान १२ डिसेंबराक विधेयकाक मान्यताय दिल्ली.
१३ आनी १४ डिसेंबराक लोकसभेंत संविधानाचेर चर्चा जाली. आतां मेरेन प्रधानमंत्री मोदी, राहुल गांधी, प्रियांका गांधी आनी राजनाथ सिंह हे हाचेर उलयल्यात. आतां १६ आनी १७ डिसेंबराक राज्यसभा संविधानाचेर चर्चा जातली. संसदेचें गिमाचें अधिवेशन २५ नोव्हेंबर सावन सुरू जाल्लें आनी २० डिसेंबराक सोंपतलें.
ह्या विधेयकांत दुरुस्ती जातली
१. पयलें विधेयक: १२९ वी दुरुस्ती हाडटलें. संविधान दुरुस्ती वरवीं नवे कलम जोडून ३ कलमांत दुरुस्ती करपाची तजवीज जातली. संविधान दुरुस्ती करून कलम ८२ (अ) जोडटले, जाका लागून लोकसभा आनी राज्य विधानसभांची वेंचणूक एकाच वेळार जावंक शकतली. त्याच वेळार कलम ८३ (संसदाच्या सभाघरांचो कार्यकाळ), कलम १७२ (राज्य विधानसभांचो कार्यकाळ) आनी कलम ३२७ (संसदींच्यो वेंचणुको संबंदीत कायदे करपाचो संसदेचो अधिकार) हातूंत दुरुस्ती जातली.
२. दुसरें विधेयक: संघराज्यां संबंदीत ३ कायद्यांत दुरुस्ती करपाचें आसा. तातूंत केंद्रीय प्रदेश सरकार कायदो- १९६३, दिल्लीचो राष्ट्रीय राजधानी प्रदेश सरकार- १९९१ आनी जम्मू आनी काश्मीर पुनर्गठन कायदो- २०१९ हांचो आसपाव आसा. ह्या विधेयका वरवीं जम्मू-काश्मीराक पुराय राज्याचो दर्जो दिवपा खातीर दुरुस्तीय करपाक मेळटली.
रामनाथ कोविंद हांणी १४ मार्चाक अहवाल सादर केल्लो. २ सप्टेंबर २०२३ दिसा आदले राष्ट्रपती रामनाथ कोविंद हांच्या अध्यक्षते खाला ‘वन नेशन-वन इलेक्शन’ विचारांत घेवपा खातीर एक समिती तयार जाली. समितीन १४ मार्च २०२४ दिसा सुमार १९१ दिसांनी आपलो अहवाल राष्ट्रपती द्रौपदी मुर्मू हांचे कडेन सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
