भांगरभूंय | प्रतिनिधी
गांवकार आक्रमक; मामलेदार, तलाठ्याक परत धाडले
भांगरभूंय । प्रतिनिधी
दिवचल : मयें मतदारसंघांतल्या वन म्हावळींगे कुडचिरें पंचायतींतल्या उच्च न्यायालयाच्या आदेशा प्रमाण दिवचलचे मामलेदार, तलाठा आनी पंगड पुलीस फांट्या सयत कांय कडेन घरांचे सर्व्हेक्षण करपाक आयिल्ले. थंय गांवचे लोक एकठांय जाले आनी तांणी आक्रमक जावन सर्व्हेक्षण करपाक आयिल्ल्या अधिकाऱ्यांक जाब विचारलो. सर्व्हेक्षणाक खर विरोध करून तांणी अधिकाऱ्यांक थंयच्यान परत धाडले.
कसलेच तरेची पूर्वकल्पना दिनासतना वा नोटीस दिनासतना अचकीत थंय सर्व्हेक्षणा खातीर अधिकारी आयिल्ल्यान लोक आबूज जाले. तांणी पिराय गांव एकठांय केलो आनी अधिकाऱ्यांक सर्व्हेक्षण करपा पसून आडायले. ह्या वेळार व्हड प्रमाणार पुलीस बंदोबस्त आशिल्लो. खूब वेळ चर्चा चालू आसतना थळावे आमदार प्रेमेंद्र शेट थंय पावले. परिस्थितीचें गांभीर्य पळोवन तांणी आपूण कायदेशीर सल्लो घेवचे वकील नेमतलो, तशेंच ह्या प्रकरणांत आपूण गांवकारां वटेन रावतलों, अशी हमी दिले उपरांत लोक शांत जाले. हें प्रकरण न्यायालयांत आसा आनी 13 ऑगस्टाक ताचेर सुनावणी जातली, अशें ह्या वेळार सांगलें. मजगतीं, ह्या संबंदांत वन म्हावळींगे कुडचिरे पंचायतीक सर्व्हे नंबर घालून बेकायदो बांदकामां आनी हेर बाबतींत चवकशी करपा संबंदांत नोटीस जारी केल्ल्याचीय म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
