भांगरभूंय | प्रतिनिधी
एक राजा आशिल्लो. आखांताचो श्रीमंत. ताचे कडेन सगल्यांत चड सैन्यबळ आशिल्लें. एक दीस ताच्या राज्यांत एक व्हड संत आयलो. राजान संताक सांगलें, आपल्याक दान दिवपाक जाय. तेन्ना संतान म्हणलें, “म्हाका कांयच नाका. पूण एक काम कर. तुज्या राज्यांतले हुशारांतले हुशार मनीस सगल्या राज्यांत धाड आनी सगल्यांत मूर्ख मनीस सोदपाक लाय. तो मेळटकच ताच्या हातांत एक लाकडाची बडी दी आनी ताका हांगाच तुमच्या मुखार दवर.” हें सांगून संत गेलो.
राजान आपले हुशार मनीस राज्यांत धाडले आनी तांकां एक मूर्ख मनीस सांपडलो. ताच्या हातांत एक बडी दिली. तो पलासींत रावपाक लागलो.
खूब वर्सां गेलीं. राजा दुयेंत पडलो. आपले चड दीस उरूंक ना हें ताका कळिल्लें. तो सगल्या लागींच्या मनशांक मेळपाक आपयतालो. एक दीस ताका मुर्खाची याद जाली. राजान ताका आपोवंक धाडलो. मूर्ख मनीस आयलो.
राजान ताका सांगलें, “हांव आतां खूब पयस वचपाचो आसां. देखून सगल्यांक मेळटां.” हें आयकून मुर्खान म्हणलें, “राजा म्हाका व्हरात न्हय तुमचे बाराबप.” राजान जाप दिली, “थंय कोणाकूच व्हरपाक मेळना.” मुर्खान विचारलें, “तुज्या सुंदर राणयांक व्हरचो ना?” हें आयकून राजा म्हणपाक लागलो, “तूं मूर्ख हें तुवें सिद्ध केलां. तुका कशें कळना, हांव जंय वतां थंय कांयच आनी कोणाकूच व्हरपाक मेळना.”
तेन्ना त्या मनशान ती लाकडाची बडी राजाच्या हातांत दिली आनी म्हणपाक लागलो, “तुवें जायतीं राज्यां जिखलीं, अमाप संपत्ती मेळयली. पूण वतना सादी सूय लेगीत व्हरपाक मेळना, हें तुका कळ्ळेंच ना. आनी जें व्हरूं येता तें तुवें एकठांय केलेंच ना. देखून तूं म्हामूर्ख.”
हें आयकून राजान ताका “तूं कोण?” अशें विचारलें. ताणें जाप दिली, “हांगा आयिल्ल्या संताचो शिश्य. तूं मरचे पयलीं हें सत्य तुका सांग अशें सांगिल्लें.”
ही काणी आमकां जिवितांतलें एक व्हड सत्य सांगता. मनीस वतना खंयचीच वस्त घेवन वचना. मागीर मनशां बाराबर सासणाचें किदें उरता? समाधान, तृप्तताय आनी अणभव. ह्यो तीन गजाली मनशाची खरी संपत. ती जोडपाक जाय.
वथांबे सोंपयतना
ज्या दिसा भांगरभूंयचो पयलोच अंक आयिल्लो, त्या दिसा म्हणल्यार 15 जुलय 2016 दिसा वथांबे सदरांतलो पयलो लेख छापून आयिल्लो. काणयेच्या माध्यमांतल्यान तत्वगिन्यान सांगप. सुरवात केल्ली तेन्ना 50 लेख बरयतलें अशी मोख धरिल्ली. मागीर 100 बरोवया अशें दिसलें. मागीर 150 आनी निमाणे कडेन 211 लेख बरोवन हें सदर सोंपयतां.
म्हज्या 14 वर्सांच्या ल्हान कारकिर्दींतलें सगळ्यांत चड काळ चलपी आनी सगळ्यांत लोकप्रिय सदर. ह्या सदराक वाचप्यांचें खूब प्रेम मेळ्ळें. सगळ्या वयोगटांतल्या लोकां कडल्यान प्रतिसाद मेळ्ळो. ह्या सदरान म्हाका ‘तत्वज्ञान बरोवपी’ ही नवी वळख दिली.
जें बरें चलता तें थांबोवप किद्याक? हो प्रस्न निर्माण जाता. मनशाक खंय तरी रावचेंच पडटा. खंय रावप तेंय बी कळपाक जाय. पूण जेन्ना किदेंय तरी सोंपता, दुसरें बरें तयार जावपाक संद मेळटा. अशेंच नवें आनी वेगळें किदेंय तरी घेवन परत येतलें. वथांबे सदराक आनी म्हाका वाचप्यांनी आपल्या मनांत जागो दिलो, ते खातीर हांव सदांच तांचे उपकारी उरतलें. म्हाका बरोवपाची संद दिल्ले खातीर भांगरभूंयचें उपकारी आसां.
संपदा कुंकळकार
9850149319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
