वडोदराच्या दांतसंग्रहालयाचो गिनीज बुक ऑफ रेकॉर्डांत आस्पाव
भांगरभूंय | प्रतिनिधी
वडोदरा, खबरां संस्था ः गुजरातांतल्या वडोदरांत आशिल्ल्या आशियांतल्या पयल्या दांतांच्या संग्रहालयान गिनीज बुक ऑफ वर्ल्ड रेकॉर्डांत सुवात मेळयल्या. डॉ. चंद्राणा डेंटल संग्रहालयांत टूथब्रशांचो सगळ्यांत व्हडलो संग्रह आसा आनी ह्या टूथब्रशांचें प्रदर्शन करपाचो हो विक्रम आसा.
ह्या संग्रहांत 2 हजार 371 टूथब्रश आनी 26 प्रकाराचे दांत आसात. तातूंत दातून आनी 19 व्या शेंकड्यांतले हाड आनी जनावरांच्या केंसांतल्यान तयार केल्ले टूथब्रशाचो आस्पाव आसा. हाचे आदीं सगळ्यांत चड टूथब्रशांचो संग्रह करपाचो विक्रम कॅनडियन चलये कडेन आशिल्लो, तिचे कडेन 1,678 टूथब्रश आशिल्ले.
2016 त डॉ. योगेश चंद्राणा हांणी हें संग्रहालय बांदलें. संग्रहालयांत सुरवेक दांतांटी तपासणी बेगीन करतात. पयलीं दांतांचो फोटो काडटात आनी 30-40 सेकंदां भितर दुयेंतीच्या मोबायलाचेर दंत समस्यांचो अहवाल मेळटा अशीं म्हायती चंद्राणा हांणी दिली.
संग्रहालय बांदपाची कल्पना अमेरिकेंतल्यान…
डॉ. चंद्राणा हांणी सांगलें, ह्या संग्रहालयाची संकल्पना पुराय नवीन आसा. बडोद्यांत येवन एसएसजी हॉस्पिटलांत नोकरी मेळ्ळी. हाचे उपरांत हांव अमेरिकेंत गेलो तेन्ना House on Rocks नांवाचें एक संग्रहालय थंय आशिल्लें. ते पळोवन आमी दांतवैज म्हणून दांतांच्या उत्पादनांचें संग्रहालय कित्याक करूंक शकनात? अशें दिसलें. उपरांत 2013 वर्सा तांकां ही कल्पना आयली आनी 2016 मेरेन भारत आनी आशियांतलें पयलें दांत संग्रहालय बांदलें. हाचे खातीर म्हाका राष्ट्रीय आनी आंतरराष्ट्रीय पुरस्कार मेळ्ळे अशेंय चंद्राणा हांणी सांगलें.
संग्रहालयांतलो संग्रह वाडटा…
संग्रहालयांत पयलीं 500 टूथब्रश आशिल्ले पूण ल्हव ल्हव ते वाडपाक लागले. सुरवेक ह्या संग्रहालयांत टूथब्रश, टूथपेस्ट, माउथवॉश, दांतांचे जतनाय घेवपा संबंदीत पोरणी भलायकी उपकरणां, जायराती, दाताची कदेल आदी 2 ते 3 हजार वस्तूंचो संग्रह आशिल्लो. ल्हव ल्हव ताचो विस्तार जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
