भांगरभूंय | प्रतिनिधी
पणजी : म्हादय प्रस्नाचेर अभ्यास करपाक जलस्रोत मंत्री सुभाष शिरोडकार हांचे अध्यक्षते खाला स्थापन जाल्ल्या सभाघर समितीची बसका फाल्यां दनपरां विधानभवनांत जातली. वट्ट णव म्हयन्यां उपरांत ही बसका जाल्ल्यान ती बरीच पेटपाची शक्यताय आसा. फाटली बसका 10 जानेवारी दिसा जाल्ली.
कळसा – भांडुरा प्रकल्पा खातीर कर्नाटका वतीन म्हादयचें उदक वळोवपाचे सोपस्कार चालूच आसात. हेच फाटभूंयेर कर्नाटकाच्या यत्नांक आळ घालपा खातीर गोंय सरकारा वतीन हालींच्या काळांत चडश्यो कांयच हालचाली जावंक ना. प्रवाह समितीची बसकाय जावंक ना. सर्वोच्च न्यायालयांत प्रलंबीत आशिल्ल्या याचिकांवेली सुनावणीय ह्या तीन म्हयन्यांत जावंक ना. बसकाच जायनाशिल्ल्यान मध्यंतरी विजय सरदेसाय हांणी वांगडीपदाचो राजीनामो दिवपाची शिटकावणी दिल्ली.
म्हादय प्रस्नाचो अभ्यास करपा खातीर 2024 वर्सा सभाघर समिती स्थापन केल्ली. आतां मेरेन समितीच्यो दोन बसका जाल्यात. आमदार विजय सरदेसाय, अलेक्स रेजिनाल्ड, आमदार निलेश काब्राल, मायकल लोबो, कार्लुस फेरेरा, डॉ. चंद्रकांत शेट्ये, देविया राणे, वेंझी व्हिएगस, प्रेमेंद शेट, जीत आरोलकार, विरेश बोरकार हे समितीचे हे वांगडी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
